1 ታናዳን አማንያዋንቶ፥ ህንተንቱ ኡባይ ህግያ ኤርያ ድራዉ፥ ታን ግያዋ ሎይꬅ ኤሪታ፤ ህጊ እት አሳይ ፓጻ ደኤዳ ዎደ ጻላላን አ ሞዴ። 2 አያዉ ጎፐ፥ አስና ገሌዳ ምሽራታ እዝ አስናይ ፓጻ ደኤዳ ኬናን፥ ህግያን አናና ቃሸታ ኡታዱ፤ ሽን እዝ አስናይ ሀይቆፐ፥ አናና ጫቄዳ ህጊ እዞ ሞደና። 3 ሄዋ ድራዉ፥ እዛ ባረ አስናይ ፓጻ ደእሽን፥ ሀራ አቱማዋ ገሎፐ፥ አሳይ እዞ፥ “ዎሹመዉኖ” ጋና። ሽን እዝ አስናይ ሀይቆፐ፥ ህጊ እዞ ሞደና፤ እዛ ሀራ አስና ገሎፐነ እዞ ኦንነ፥ “ዎሹመዉኖ” ጌና።

4 ታናዳን አማንያዋንቶ፥ ሄዋዳን ህንተንቱ ቃይ ክርስቶሳ አሳተꬃፐ እት ባጋ ግድያ ድራዉ፥ ህንተንቱ አ ባጋና ሀይቄድታ። ቃይ ኑን ጾሳ ማድያ ኦሱዋ ኦꬃና ማላ፥ ህንተንቱ ጾሳይ ሀይቁዋፐ ደንꬄዳ ክርስቶሳዋንታ። 5 አያዉ ጎፐ፥ ኑን ኑ አሳተꬃይ ኮዬዳዋዳን ደእያ ዎደ፥ ህጊ ኑን ናጋራ ኦꬃናዳን፥ ኑና ደንꬄ፤ ኑ አሳተꬃ ግዶን ኢታ አሙ ደእያ ድራዉ፥ ኑን ሀይቆ አይፍያ አይፌዶ። 6 ሽን ሀእ ኑን ኑና ቃቼዳዎ ሀይቄዳ ድራዉ፥ ጾሳይ ኑና ህግያ ቃሹዋፐ ብሌዳ። ሄዋ ድራዉ፥ ኑን ጌሻ አያናይ ጊግሴዳ ኦራꬃ ኦግያን ጾሳዉ ኤኖ ጋናዋፐ አትን፥ ጻፈቴዳ ህጊ ኑዉ ጊግሴዳ ኤጫ ኦግያን ኤኖ ጎኮ።

7 ያትና፥ ኑን ዋጋኔ? ህጊ ባረ ሁጰዉ ናጋሬ? ሄዋ ግደና፤ ሽን ህጊ ናጋራይ አየንቶ ታና ኤርሴዳ። አያዉ ጎፐ፥ ታን ህጊ፥ “አሳባ አሞቶፓ” ግቤነንቶ፥ አሳባ አሞትያዌ አየንቶ ኤርከ። [a] 8 ሽን ናጋራይ ታን ኡባባ አሞታና ማላ፥ አዛዙዋ ባጋና ታ ቦላ ኦግያ ደሜዳ፤ አያዉ ጎፐ፥ ህጊ ባዌንቶ፥ ናጋራዉ ዎልቃይ ባዋ።

9 ካሰ ህጊ ባይና ዎደ ታን ፓጻ፤ ሽን አዛዙ ዬዳ ዎደ ናጋራይ ደኦ ስምና፥ 10 ታን ቃይ ሀይቃድ፤ ታና ፓጻ ዎꬃናዉ ጾሳይ ቆፔዳ አዛዙ፥ ታዉ ሀይቁዋ አሄዳ። 11 አያዉ ጎፐ፥ ናጋራይ አዛዙዋ ባጋና ታና ጭምያ ኦግያ ደሚደ፥ ሄ አዛዙዋን ታና ዎꬌዳ።[b]

12 ሄዋ ድራዉ፥ ህጊ ጌሻ፤ አዛዙካ ጌሻ፥ ጽላነ ሎአ።

13 ያትና፥ ሎኦባይ ታዉ ሀይቁዋ አሄዴ? ሄዋ ግደና፤ ሽን ታዉ ሄዋ ናጋራይ አሄዳ፤ አሳይ ናጋራይ አየንቶ ሻኪደ ኤራና ማላ፥ ናጋራይ ሎኦባ ባጋና፥ ታዉ ሀይቁዋ አሄዳ። ቃይ አዛዙ፥ “ኦንነ ናጋራ ኦꬃናዉ በሰና” ያግያ ድራዉ፥ ናጋራይ ካሰዋፐ አꬍ ኢቴዳ።

14 ኑን ህጊ ጾሳዋ ግድያዋ ኤሬቶ፤ ሽን ታን ታና ናጋራዉ ዛልኤዳ ሀይቂያ አሳ፤ 15 ታን ኦꬅያዋ ዎዛና አꬅከ፤ አያዉ ጎፐ፥ ታን እጽያዋ ኦꬃይፐ አትን፥ ታን ኦꬃናዉ ዶስያዋ ኦꬅከ።[c] 16 ታን እጽያዋ ኦꬅያዋ ግዶፐ፥ ህጊ ሎአ ግድያዋ ማርካታይ። 17 ሄዋ ግዶፐ፥ ሄ የዉዋ ታ ቦላ ደእያ ናጋራይ ኦꬅያዋፐ አትን፥ ሀእ ታን ኦꬅከ።

18 ታናን፥ ሄዌነ ታ አሳተꬃን ሎኦባይ ደኤናዋ ታን ኤራይ፤ አያዉ ጎፐ፥ ሎኦባ ኦꬅያ አሙ ታ ቦላ ደኦፐካ፥ ታን ሄ ሎኦባ ኦꬃናዉ ዳንዳይከ። 19 ታን እጽያ ኢታባ ኦꬃይፐ አትን፥ ታን ዶስያ ሎኦባ ኦꬅከ። 20 ሽን ታን እጽያዋ ኦꬅያዋ ግዶፐ፥ ሄዋ ታ ቦላ ደእያ ናጋራይ ኦꬅያዋፐ አትን፥ ሀእ ሄዋ ኦꬅያዌ ታና ግድከ።

21 ስም ታን ሎኦባ ኦꬃናዉ ዶስሽን፥ ኢታባ ኦꬅያዌ ታዉ ህገ ግድያዋ ደማድ። 22 አያዉ ጎፐ፥ ታን ታ ዎዛና ግዶን ጾሳ ህግያን ናሸታይ፤ 23 ሽን ታ ቦላ ግዶን ደእያ ታ ዎዛና ቆፋ ህግያና ዋትያ ዱማ ህግያ በአይ። ሄ ህጊ ታ ቦላ ግዶን ደእያ ናጋራ ኦስስያ ህግያን ታና ቃሽሴ። 24 ታን አይባ ናሸች ባይና አሴ! ታና ሀይቆ አፍያ ሀ አሳተꬃፐ አሻናዌ ኦኔ? 25 ኑ ጎዳ የሱስ ክርስቶሳ ባጋና ጾሳዉ ጋላታይ ግዶ።

ስም ታን ታ ዎዛና ቆፋን ጾሳ ህገዉ ኤኖ ጋይ። ሽን ታ አሳተꬃን ታና ናጋራ ኦስስያ ህገዉ ኤኖ ጋይ።

<- ሮመ 6ሮመ 8 ->