1 ግዶፐነ፥ ዋየቴዳዋንቶ ሀዋፐ ስንꬃዉ ꬉመና።[a] በን ዎደ ጾሳይ ዛብሎና ቢታነ ንፍታሌማ ጋድያ ካዉሼዳ፤ ሽን ስንꬃፐ ሄ ሜድተራነ አባ ኦግያን ደእያ ቢታነ ዮርዳኖሳ ሻፋፐ ሄፍንꬃ ባጋን ደእያ “አይሁዳ ግደና አሳይ ደእያ ጋሊላ” ግያ ጋድያ እ ቦንቻና።

2 ꬉማን ሀመትያ አሳይ ዎልቃማ ፖኡዋ በኤዳ፤ [b] ቃይ ባራ ꬉማ ጋድያን ደእያዋንቶ ፖኡ ፖኤዳ።

3 ኔን ካዉተꬃ አሳ ዳርሳዳ፤ ኡንቱንቶ ናሸቻ ጉጃዳ፤ አሳይ ካꬃ ጫክያ ዎደ ናሸትያዋዳን፥ ዎይ ኦሞዱዋ ግሺደ አክያ ዎደ ናሸትያዋዳን፥ ነ ስንꬃን ናሸታና። 4 አያዉ ጎፐ፥ ኔን ምድያማ ጋድያ ጾኔዳ ጋላሳዳን፥ ኡንቱንታ ዴጽያ ሞርገ ምꬃ፥ ኡንቱንቱ ሀሽያ ሞርገ ምꬃነ ኡንቱንታ ናቂያዋንቱ ጻምኣ መንሬꬃዳ። 5 ዎራጅያ ኦላንቻቱዋ ጫማይነ ሱꬃን ሙናቀቴዳ ማዩ ኡባይ ታማን ኤꬅያባ ግዳናዋ። 6 ናአይ ኑዉ የለቴዳ! አቱማ ናእ ኑዉ እመቴዳ! ካዉተꬃይ አ ሀሽያን ዎꬋና፤ አ ሱንꬃይ፥ “ማላልስያ ዞርያዋ፥ ዎልቃማ ጾሳ፥ መꬍና አዉዋ፥ ሳሮተꬃ ካፑዋ” ጌተታና። 7 አ ካዉተꬃ ዳሩዋዉነ አ ሳሮተꬃዉ ዛዋይ ባዋ፤ [c] ሀችፐ ዶሚደ፥ መꬍና ጋካናዉ፥ ሱረ ፕርዳንነ ጽሎተꬃን ምንሳናዉነ ኤሳናዉ ዳዊታ ካተቱዋ አራታንነ አ ካዉተꬃን እ ካተታና፤ ኡባፐ ዎልቃማ መꬍና ጎዳ ምሹ ሄዋ ፖላና።

8 ጎዳይ ያቆባ ዛራቱዋ ቦላ ፕርዳ ቃላ ኪቴዳ፤ እስራኤልያ ቦላ ኩንዴዳ። 9 አሳይ ኡባይ፥ ኤፍሬማ አሳይነ ሳማርያ ካታማን ደእያዋንቱ፥ አዩዋንነ ኦቶሩዋን ሃሳይያዋንቱ፥ ሀዋ ኦꬄዳዌ ጎዳ ግድያዋ ኤራና። 10 ኡንቱንቱ፥ “ጹብያፐ ኬጸቴዳዋንቱ ኮለቴድኖ፤ ሽን ኑን ኡንቱንታ ዛረꬂደ፥ ማሰቴዳ ሹቻቱዋን ኬጻና፤ ኤꬃቱ ቃንጸቴድኖ፤ ሽን ኑን ኡንቱንቱ ሳኣን ዝጋቱዋ ላማና” ያጌድኖ።

11 ሄዋ ድራዉ፥ መꬍና ጎዳይ፥ ራአሶና ሞርከቱዋ ምንሳና፥ ኡንቱንቱና ኦለቴዳ ሞርከቱዋ ኡንቱንቱ ቦላ ደንꬄዳ። 12 አዋይ ዶልያ ባጋፐ ሶርያ ጋድያ አሳቱነ አዋይ ዉልያ ባጋፐ ፕልስጼማ ጋድያ አሳቱ ባረንቱ ዶና ሀንጊደ፥ እስራኤልያ ሜድኖ። ሄ ኡባንካ ጾሳ ሀንቁ ስምቤና፤ አ ኩሺካ ብሮ ደንዴዳሳን ደኤ።

13 ግዶፐነ፥ አሳቱ ባረና ሾጬዳዋኮ ስምበይክኖ፤ ኡባፐ ዎልቃማ መꬍና ጎዳካ ኮይበይክኖ። 14 ሄዋ ድራዉ፥ መጽ እት ጋላስ መꬍና ጎዳይ እስራኤልያፐ ሁጲያነ ጎይና፥ ꬎቃ ዛምባ ዳሻነ ዝቃ ማቃ ቃንጻና። 15 ጭማቱነ ቦንቼቴዳዋንቱ ሁጲያ፤ ዎርዱዋ ታማርስያ ትምቢትያ ኦድያዋንቱ ጎይና። 16 ሀ አሳ ካለꬅያዋንቱ፥ ዎራ ካለꬂኖ፤ ኡንቱንታ ካልያዋንቱካ ባሊኖ። 17 ሄዋ ድራዉ፥ ጎዳይ ኡንቱንቱ ያላጋ አሳቱዋን ናሸተና፤ አዉ ባይና ናናቶነ አምኤቶ ቃረተና። አያዉ ጎፐ፥ አሳይ ኡባይ ኢታነ ጾሳ ኤረናዋ፤ አሳይ ኡባይ ባረ ዶናን ኢታባ ሃሳየ። ሄ ኡባንካ ጎዳ ሀንቁ ስምቤና፤ አ ኩሺካ ብሮ ደንዴዳሳን ደኤ።

18 ኢታተꬃይ ታማዳን ጹጌ፤ ክንድቹዋነ አጉንꬃ ም ꬋይሴ፤ ስኬዳ ዎራይ ኤጽና፥ ጩዋይ ቱሳዳን ስት ጊደ፥ ፑደ ከሴ። 19 ኡባፐ ዎልቃማ መꬍና ጎዳ ሀንቁዋን ጋዲ ጹገታናዋ፤ አሳይካ ታማን ኤꬅያባ ማላ ግዳናዋ፤ ኦንነ ባረ እሻ አሻናዉ ቆፐና። 20 ኡንቱንቱ ኡሸቻ ባጋፐ ቦንቃና፤ ሽን ኮሻታና፤ ሀድርሳ ባጋፐ ማና፤ ሽን ካልክኖ፤ ኡንቱንቱ ባረንቱ የሌዳ ናናቱዋ ማና። 21 ምናሰ ኤፍሬማ፥ ኤፍሬምካ ምናሳ ማና፤ ኡንቱንቱ እትፐ ግዲደ፥ ይሁዳ ቢታ ሞርካና። ሄ ኡባንካ ጾሳ ሀንቁ ስምቤና፤ አ ኩሺካ ብሮ ደንዴዳሳን ደኤ።

<- ኢስያሳ 8ኢስያሳ 10 ->