5 ጎዳይ ሀዋዳን ያጌ፤ “ታ ይሎ ጋትማ ግዴዳነ ታ ኤጽያ ሀንቆ ጻምኣ ግዴዳ አሶረ ጋድያ አሳዉ አየ አና![a] 6 ታን አሶረቱዋ ጾሳ ኤረና ካዉተꬃ ቦላ ኪታና፤ ኡንቱንቱ ዱረታ ኡባ ኦሞዳናዳንነ ቦንቃናዳን፥ ቃይ ኦግያን ደእያ ኡርቃዳን፥ ኡንቱንታ የꬋናዳን፥ ታና ሀንቀꬄዳ አሳ ቦላ ታን አሶረቱዋ አዛዛና” ያጌዳ።

7 ሽን አሶረ ካቲ ሀዋ ሀልችቤና፤ አ ዎዛናይካ ሀዋዳን ቆፕቤና። እ ሀልቼዳዌ ካዉተꬃቱዋ ኡባና ꬋይሳናሳ። 8 እ ጬቀቲደ፥ ሀዋዳን ያጌዳ፤ “ታ ጋዳዋቱ ኡባቱ ካትያ ግድክኖየ? 9 ካልኖ ካታማይ ካርካሚሻ ካታማ ማላ ግደኔየ? ሀማታ ካታማይ አርፋዳ ካታማ ማላ ግደኔየ? ሳማርያ ካታማይካ ዳማስቆ ካታማ ማላ ግደኔየ? 10 የሩሳላመንነ ሳማርያን ደእያ ማሰቴዳ ኤቃ ምስለቱዋፐ ዳርያ ምስለቶ ጎይንያ ካዉተꬃቱዋ ሙራናዉ፥ ታን ታ ኩሽያ የዳድ። 11 ታን ሳማርያ ካታማ ቦላነ አን ደእያ ኤቃ ምስለቱዋ ቦላ ኦꬄዳዋዳን፥ የሩሳላመ ካታማ ቦላነ አ ኤቃቱዋ ቦላ ኦꬅክታየ?” ያጌዳ።

12 ጎዳይ ጽዮነ ደርያ ቦላነ የሩሳላመ ቦላ ባረ ኦꬅያ ኦሱዋ ኡባ ፖሌዳዋፐ ጉይያን፥ አሶረ ጋድያ ካትያ አ አዩዋነ አ ኦቶሩዋ ሙራና። 13 አያዉ ጎፐ፥ አሶረ ካቲ ሀዋዳን ያጌ፤ “ታ ኩሽያ ምኖተꬃን፥ ታ አꬌዳ ኤራተꬃንነ ታዉ ደእያ አኬካን ታን ሀዋ ኡዳድ። ታን ካዉተꬃቱዋ ግዶን ደእያ ዛዋቱዋ ሾዳድ፤ ኡንቱንቱ ቢታቱዋን ደእያ አሳ አቁዋ ቦንቃድ፤ ታ ምኖ ቀስያን፥ ካተቱዋ አራታቱዋን ኡቴዳዋንታ ኡባ ዱገ ዎꬃድ። 14 አሳይ ካፉዋ ጎልያን ኩሽያ የድያዋዳን፥ ታን ካዉተꬃ ዱረተꬃ ቦላ ታ ኩሽያ የዳድ። ቃይ ዶገቲደ አቴዳ ቁቁለቱዋ ሺሽያዋዳን፥ ታን ቢታ ኡባ ሺሻድ። ፓላናዉ ባረ ቀፍያ ባቂያባይ፥ ዎይ ሃሳያናዉ ባረ ዶና ፖግያባይ፥ ዎይ ቃይ ዋስያዌ እቱነ ባዋ” ያጌዳ።

15 ቱሙ ካልታይ ባረናን ቃንጽያ ብታንያፐ፥ “ታን አꬋይ” ጋናዉ ዳንዳዪየ? ዎይ ማጋዚ ባረና ጎችያ ብታንያፐ፥ “ታን ዳራይ” ጊየ? ጻምአይ ባረና ኦይቂያ አሳ ደንꬂ? ጉፊ ኦይቂያ አሳይ ባይናን ሀመቲ? 16 ሄዋ ድራዉ፥ ጎዳይ፥ ኡባፐ ዎልቃማ መꬍና ጎዳይ፥ አ ምኖ ቶራንቻቱዋ ቦላ ላፈꬅያ ሀርግያ የዳና፤ አ ቦንቹዋፐ ጋርሳና ምሹ ኤጽያ ታማዳን ኤጽ ከሳና። 17 እስራኤልያ ፖኡ ታማ ግዳናዋ፤ እስራኤልያ ጌሻይካ ላጩዋ ግዳናዋ፤ ያቲደ አ አጉንꬃነ አ ክንድቹዋ እት ጋላስ ጹጋናነ ማና። 18 ጾሳይ ባረ ዎራ ምꬃ ቦንቹዋነ ባረ አራዳ ጋድያ ቦንቹዋ ꬋይሳና፤ ስም ሄዌ ሀርግያ አሳይ ስልያዋዳን ስላና። 19 አ ዎራን አታና ምꬃቱ ሎይꬅ ጉꬃ ግድያ ድራዉ፥ እት ጉꬃ ናአይካ ፓይድ ዉርሳናዋ።

20 ሄ ጋላሳን እስራኤልያፐ አቴዳዋንቱ ባረና ሾጬዳዋንቱን ዘምፕክኖ፤ ሽን ኡንቱንቱ ቱሙዋፐ መꬍና ጎዳን፥ እስራኤልያ ጌሻን ዘምፓና። 21 አተꬃይ፥ ይሁዳ አሳ አተꬃይ ዎልቃማ ጾሳኮ ስማና። 22 ኔኖ እስራኤልያዉ፥ ነ አሳይ አባ ማታን ደእያ ሻፍያ ኬሻ ግዶፐካ፥ ኡንቱንቱፐ አማሬዳዋንቱ ጻላላይ ስማና። ጽሎተꬃይ ኩም ፓላሄዳ ባሻይ አዋየቴዳ። [b] 23 ኤ፥ ጎዳይ፥ ኡባፐ ዎልቃማ መꬍና ጎዳይ ሳኣ ኡባ ቦላን አሀናዉ ቃቼዳ ባሻ አሀና።

24 ሄዋ ድራዉ፥ ጎዳይ፥ ኡባፐ ዎልቃማ መꬍና ጎዳይ ሀዋዳን ያጌ፤ “ጽዮነን ደእያ ታ አሳቶ፥ ግብጼቱ ኦꬄዳዋዳን፥ አሶረቱ ህንተና ጻምአን ሾጭያ ዎደነ ባረንቱ ጋትማ ህንተ ቦላ ደንꬅያ ዎደ ያዮፕተ። 25 ጺ ጉꬃ ዎድያፐ ጉይያን፥ ታን ህንተና ሀንቀትያዋ አጋና፤ ሄዋፐ ጉይያን፥ ታ ሀንቁ ኡንቱንታ ꬋይሳናዉ ባና” ያጌ።

26 ኡባፐ ዎልቃማ መꬍና ጎዳይ ኦሬባ ግያ ሹቻ ማታን ሚድያማቱዋ ሾጬዳዋዳን፥ ኡንቱንቱ ቦላ ልሱዋ ደንꬃና። እ ግብጼን ኦꬄዳዋዳን፥ ባረ ጋትማ አባ ቦላ ደንꬃና። 27 ሄ ጋላስ፥ አ ቶኩ ህንተ ሀሽያፐ ዎꬋና፤ አ ሞርገ ምꬃይካ ህንተ ሞርግያፐ ክቻና። ህንተ ኦርዴዳ ድራዉ፥ ሞርገ ምꬃይ መአና።

28 ሞርክያ ዎታዳራቱ አታ ካታማ ገሌድኖ፤ ምግሮናን አꬌድኖ፤ ባረንቱ ኦላ ሚሻካ ምክማሳ ካታማን ዎꬄድኖ። 29 ኡንቱንቱ ጋድያ አꬍያሳና ፕኒደ፥ ገባአ ካታማን አቄድኖ። ራማ ካታማን ደእያ አሳይ ኡባይ ኮኮሬዳ፤ ካትያ ሳኦላ ካታማን ግብአን ደእያ አሳይካ ባቃቴዳ። 30 ጋሊማ አሳዉ፥ ዋሱዋ ጹልስተ! ላይሻ አሳዉ፥ ስስተ! አናቶታ ካታማን ደእያ አሳዉ፥ ኦችያዋ ኦድተ! 31 ማድሜና ግያ ካታማ አሳይ ባቃቴዳ፤ ገቢማ አሳይካ ባረ ሸምፖ ቆሰቴዳ። 32 ሀቼ ሞርክያ ዎታዳራቱ ኖባ ካታማን ደኢኖ፤ ያን ኡንቱንቱ ባረንቱ ኩሽያ ቃꬂደ፥ ጽዮነ ደርያ፥ የሩሳላመ ካታማ ባብሲኖ።

33 በእተ፥ ጎዳይ፥ ኡባፐ ዎልቃማ መꬍና ጎዳይ ቃንካቱዋ ዎልቃማ ዎልቃን ቃንጻና፤ አዱቄዳ ምꬃቱካ ቃንጸታና፤ ቃይ ቦንቼቴዳዋንቱካ ካዉሻና። 34 ጾሳይ ስኬዳ ዎራ ካልታን ቃንጻና፤ ሊባኖስካ ዎልቃማ ስንꬃን ኩንዳና።

<- ኢስያሳ 9ኢስያሳ 11 ->