1 መꬍና ጎዳይ ታና ሀዋዳን ያጌዳ፤ “ዎልቃማ ጻꬃ ዋራቃታ አካደ፥ ‘ኦሞዶ ኤሌላ! ቦንቂያዉ ኤሌላ!’ ያጋደ፥ ናባበትያ ፕዶልያን ጻፋ። 2 ቄስያ ኦርዮናነ ይባራክያ ናኣ ዛካራሳ አማንꬅያ ማርካቱዋ ኦꬃደ ታን ሱንꬃና” ያጌዳ።

3 ሄዋፐ ጉይያን፥ ታን ትምቢትያ ኦድያ ታ ማቻትና ግሳድ፤ ያትና፥ አ ሻሃራደ እት ናኣ የላዱ፤ መꬍና ጎዳይ ታና ሀዋዳን ያጌዳ፤ “አ ሱንꬃ፥ ‘ማሀር-ሻላል-ሀሽ-ባዝ’ ያጋደ ሱንꬃ። 4 ናአይ፥ ‘ታ አዎ፥ ታ አቴ’ ያጊደ ጼስያዋ ኤራናፐ ካሰ፥ አሶረ ጋድያ ካቲ ዳማስቆ ዱረተꬃነ ሳማርያ ኦሞዱዋ አኪደ አፋና” ያጌዳ።

5 መꬍና ጎዳይ ቃይካ ታዉ ሀዋዳን ያጊደ ሃሳዬዳ፤ 6 “ሀ አሳይ ሎዳን ጎግያ ሳልሆማ ሃꬃቱዋ እጺደ፥ ራጺናነ ራማልያ ናኣ ናሸቲደ አኬድኖ። 7 ሄዋ ድራዉ፥ ታን ጎዳይ ምኖነ ዳሮ ግድያ ኤፍራጺሳ ሃꬃ፥ አሶረ ካትያ አ ቶራንቻቱዋ ኡባና አሀና ሀናይ። እ ሻፍያ ኡባ ኩሚደ ከሳና፤ ጋጻ ኡባ ማዪደ ጎጋና። 8 ክጺደ ጎጊደ፥ ይሁዳ ገላና፤ ኤሊደ ያና አꬋና፤ ኩንꬁ ቆꬍያ ጋካና። አቤት አማኑኤላ፥ ካፉ ባረ ቀፍያ ምጭያዋዳን፥ ሃꬃ ኩንꬁ ነ ጋድያ ኡባ ቦላን ምጨታና” ያጌዳ።

9 ህንተኖ ካዉተꬃቶ፥ እትፐ ሺቅተ! ሽን ህንተ መኤረታና! ሃኮ ቢታ ኡባን ደእያ አሳቶ፥ ስስተ! ኦላዉ ጊግተ! ሽን ህንተ መኤረታና! ኤ፥ ኦላዉ ጊግተ፤ ሽን ህንተ መኤረታና! 10 ኦላ ኦለታናዉ ማቀትተ፤ ሽን ህንተ ማቁ ላለታና፤ ህንተ ሀልቹዋ ሃሳይተ፤ ሽን ህንተ ሀልቹዋ ሀላና፤ አያዉ ጎፐ፥ ጾሳይ ኑናና ደኤ። [a]

11 መꬍና ጎዳይ ባረ ምኖ ኩሽያ ታ ቦላ ዎꬂደ፥ ታዉ ሃሳዬዳ፤ ታን ሀ አሳ ኦግያ ካለና ማላ፥ ታና ሀዋዳን ያጊደ ሴሬዳ፤ 12 “ሀ አሳይ ማካላ ማቆ ግያዋ ኡባ ማካላ ማቆ ጎፕተ፤ ኡንቱንቱ ያይያባዉ ያዮፕተ ዎይ ዳጋሞፕተ። [b] 13 ህንተ ጌሻ ጋናዉ በስያዌ ኡባፐ ዎልቃማ መꬍና ጎዳ፤ ህንተ አዉ ያያናዉነ ዳጋማናዉ በሰ። 14 እ ጌሻ ሳ ግዳናዋ፤ ሽን ይሁዳ ጋድያ አሳዉነ እስራኤልያ ጋድያ አሳዉ እ ꬉቢያ ሹቻነ ኩንድስያ ዛላ ግዳናዋ፤ የሩሳላመን ደእያ አሳዉ እ ግትያነ ጲረ ግዳናዋ። [c] 15 ኡንቱንቱፐ ዳሩ ꬉበታና፤ ኩንዲደካ መአና፤ ጲርያን ኦይቀቲደካ ኦሞደታና” ያጌዳ።

16 ታን ኦዴዳዋ ናጋ፤ ታ ኤርስያ ቆማቱ ግዶን ህግያ አታማ። 17 ታን ባረ ሶምኡዋ ያቆባ ዛራቱዋፐ ገንꬅያ መꬍና ጎዳ ናጋና፤ ቃይ አን አማነታና። [d]

18 ታናነ ታዉ መꬍና ጎዳይ እሜዳ ናናቱዋ በእተ። ኑን ጽዮነ ደርያን ደእያ ኡባፐ ዎልቃማ መꬍና ጎዳፐ እስራኤልያዉ ማላታነ ማርካ። [e]

19 “ሳሱኪደነ ዙዙሚደ ሃሳይያ ሻሬቾቱዋነ ሞይትልያ ሃሳይስያዋንታ ኦችተ” ያጊደ ህንተና ዞርያ አሳይ ደኤ። ሀይቄዳዋንታ ፓጻ ደእያዋንቱባ ኦችያዋፐ፥ አሳይ ባረንቱ ጾሳ ኦቻናዉ በሰኔ? 20 ህግያነ ጾሳይ ኦድያዋ ስስተ! ሄ አሳቱ ሀ ቃላዳን ሃሳያና ꬋዮፐ፥ ኡንቱንቶ ሳአይ ዎንተና።

21 አሳይ ዋየቲድነ ኮሻቲደ፥ ጋድያን ቶይላካታና፤ ኡንቱንቱ ኮሻቴዳ ዎደ ይሎቲደ፥ ፑደ ጼሊደ ባረንቱ ካትያነ ባረንቱ ጾሳ ሸቃና። 22 ሳኣኮ ዱገ ጼሊደ፥ ዋይያ፥ ꬉማነ ያሽያ ሾኑዋ በአና፤ ኡንቱንቱ ባራ ꬉማዉ ኦለታና።

<- ኢስያሳ 7ኢስያሳ 9 ->