2 CORINTIOS 4

1 Jwanꞌ nasa, nek lud naꞌndlyayod lazo' náꞌ, tak Dios, ta ndlat lazoꞌ Xa' náꞌ, mtanꞌno Xa' náꞌ sinꞌ reꞌ. 2 Che'la mbloꞌtal náꞌ re jwanꞌ nagaꞌs ta ndli men nde re jwanꞌ ta ngoꞌ yantho lo men, nakta náꞌ ngete kwinꞌno men, nekla ngeteseꞌ náꞌ xkiꞌs Dios. Cheꞌla, Dios ndowiꞌ, benꞌta jwanꞌ li ndej náꞌ lo men nde tamod re men toyal li lazoꞌ xaꞌ jwanꞌ ndej náꞌ. 3 Tez diꞌs wen chanꞌ Jesucrist ta ndej náꞌ reꞌ nzonga'sa, nzongaꞌsa per benꞌta lo re men jwanꞌ nakwentla luxa. 4 Tak lo na'ndlid lazo' xa', le' maxu' xa' nak dios lo izyo mtokow xaꞌ xgab re men ya, sa naꞌakta wiꞌ xaꞌ xni ndlyabel lo diꞌs wen chanꞌ Jesucrist, tak Jesucrist ndloꞌ xa nak Dios. 5 Tak naꞌndejta náꞌ leꞌga kwent chanꞌ náꞌ, leꞌ náꞌ ndej Jesucrist Xaꞌ Nyebeꞌ, nde lo ta nkeꞌ lazoꞌ náꞌ Jesús nak náꞌ men ndli sinꞌ lo goꞌ. 6 Tak Dios, Xaꞌ ta mnabeꞌ yo xni lo yalꞌkow,[a] leꞌga Dios ya mbli sa ngo xni lenꞌ lazon', sa xni ya li toyal winꞌ yalnaro chanꞌ Dios lo ta ndli lazon' Jesucrist.

Lipa lazoꞌ men Dios sa ban men

7 Leꞌ diꞌs ntak toz reꞌ ngeno ná'y lenꞌ lazo' náꞌ xa nak lenꞌ yet yo ba, sa loꞌ leꞌ yalne toz reꞌ naka chanꞌ Dios, naꞌnakte chanꞌ náꞌ. 8 Jwanꞌ nasa, tenyega ne ndaridndabno náꞌy reta plo ten' ngete ná', per naꞌndlyayotirta náꞌ, tenyega nzo re jwanꞌ ndaꞌ xgab yek náꞌ, per naꞌnchoched lazoꞌ náꞌ. 9 Tenyega nchubla men náꞌ, per namblaꞌyaꞌd Dios náꞌ, tenyega ntub men náꞌ per naꞌlid xaꞌ gan luꞌx xaꞌ náꞌ. 10 One ploja nda náꞌ thibka ndriꞌd náꞌ yalti jwanꞌ xa mbriꞌd Jesús lo nguj Xaꞌ, sa taga' lo yalnaban chan' ná' lo' ke naban Jesús. 11 Tak laj naban náꞌ, thiblaꞌ nzo náꞌ ro yalyuj lo ta ngetetej náꞌ xki's Jesús, sa tagaꞌ yalnaban chanꞌ Jesús ryoxo'ba lo belꞌ náꞌ jwanꞌ ta luxa. 12 Jwanꞌ nasa, laj ndoriꞌd náꞌ lo yalguj, leꞌ goꞌ ndokayaꞌ yalnaban.

13 Lo xkiꞌs Dios nchab: “Mblí lazoꞌn Dios jwanꞌ nasa mdej na xkiꞌs Xaꞌ”;[b] tagaꞌ náꞌ, taxa ndlipa lazoꞌ náꞌ Dios, ndli lazo' ná' Xa' nde ndej náꞌ xkiꞌs Xaꞌ. 14 Tak mne náꞌ leꞌ Dios ta mbli mbroꞌxban Jesús Xaꞌ Nyebeꞌ lo yalguj, tagaꞌ koꞌxban Xaꞌ náꞌ nde koꞌxban Xaꞌ goꞌ sa thita we Xaꞌ naꞌ tenꞌ ndob Xaꞌ. 15 Reta jwanꞌ reꞌ ndoriꞌd náꞌ tak nkeꞌ lazoꞌ náꞌ goꞌ, sa senꞌ lo bro toz men kayaꞌ yalwen chanꞌ Dios, tagaꞌ bro toz tir men taꞌ dyux lo Dios, sa yolo men yalnaro chanꞌ Dios.

16 Jwanꞌ nasa, nek lud naꞌndlyayod lazo' náꞌ, tak te'nyega belꞌ náꞌ reꞌ ndoya'xa, per lazo' náꞌ cheꞌ ndoyak nakuba wiz kon wiz. 17 Tak yalti ta ndriꞌd ná' lo izyo re' jwan' bixa, ben' ndarida, per ngoxo'ba ná' lo yalnaro toz tir jwan' adi' chan' Dios. 18 Naꞌntoblod náꞌ re jwanꞌ ta ndloꞌba, le' náꞌ ntoblo re jwanꞌ ta naꞌndloꞌda, tak re jwanꞌ ta ndloꞌ ndluxa, nde re jwanꞌ ta naꞌndloꞌda naka jwanꞌ adiꞌ.

<- 2 CORINTIOS 3 2 CORINTIOS 5 ->