1 Wasenga wabili wa Mulungu wa kuulanga wavika Sodoma mkipigiti cha ichungulo, na Loti kakala yakalile hana ulwivi lwa idiwambo. Loti viyawawene, kenuka kachola kuwabokela, kafugama mavindi kainamila mbaka hasi. 2 Kalonga, “Chonde, wandewa zangu, bagukeni kuing'anda ya mtumigwa wenu mganave magulu genu abaho muwase, na ihavika imitondo mogendelela na mwanza wenu.”

Na hewo wamwidika, “Bule, towasa bahano hana ulubuga.”

3 Ila kawagong'ondeza ng'hani, hakimambukizo, wachola hamoja na heyo na kwingila mng'anda yake. Loti kawalongela watumigwa zake wawatendele mandia iwahenza, avo wawokela mikate ilibule mela, na hewo waja.

4 Kipigiti iwahenza hawanachola kuwasa, wanhu wose kulawa ng'ambu zose za idiwambo da Sodoma waizunguluka ing'anda, wadodo na wakulu. 5 Wamkema Loti na kumuuza, “Wakwahi wanhu wezile kumwako ichungulo ino? Walave hanze kumwetu giladi tuwawase.”

6 Loti kalawa hanze, kahinda ulwivi hachugu chake. 7 Kawalongela, “Viha hivo, wambwiga zangu, sambimtende mbuli zino zihile! 8 Loleni, nna wandele zangu wabili wang'hali hawanawasa na mbigalo. Beteni niwalavile hanze muwatendele vumulonda. Ila sambimuwatende mbuli wanhu wano. Kwavija weza mng'anda yangu.”

9 Ila hewo wamulongela Loti, “Segele hano.” Abaho wailongela, “Munhu ino keza hano kamba muhenza na sambi kolonda kuwa mulamula!” Abaho wamulongela Loti kabili, “Tokutenda gweye gehile kubanza hewo.” Wamkunhiza Loti na kum'bweza kisengelenyuma wakala behi na kulubomola ulwivi. 10 Ila waja iwanhu wabili wakalile mng'anda wauvugula ulwivi wagolosa makono gao na kumkwenhela Loti mng'anda abaho wahinda ulwivi. 11 Waja iwanhu wakalile hanze ya ulwivi lwa ing'anda wageligwa umbugumbugu giladi sambiwadahe kulona ulwivi, wose wadodo na wakulu.

12 Waja iwanhu wabili wamulongela Loti, “Hana ndugu yako hano mdiwambo? Wakwe zako, wanago wakitwanzi na wakimbigalo, ama munhu yoyose yali ndugu yako? Walave kunze ya idiwambo, 13 kwavija tohabananga hanhu hano. MNDEWA kahulika mbuli zihile ng'hani zowotenda wanhu wa wambo dino, avo katulagiza tweye tudibanange.”

14 Avo Loti kachola na kuwalongela wakwe zake, awo wakalile wakasono wa wandele zake, kawalongela, “Hima, laweni hanhu hano, kwavija MNDEWA ka mmabehi kudibananga wambo dino.” Ila wakwe zake wagiza kotenda uponela.

15 Mkipigiti cha nzogolo zikwika, wasenga wa Mulungu wa kuulanga wamulopoza Loti, walonga, “Lopola, msole mtwanzi wako na wandele zako wabili wali hano, ama kokwangama kipigiti idiwambo dihabanangigwa.” 16 Loti kasinhasinha. Ila waja iwanhu wabili wamgoga mkono wake, na mkono wa mtwanzi wake, na wandele zake wabili na kuwalava hanze ya idiwambo, kwavija MNDEWA kakala yowonela bazi. 17 Abaho imwe wa wasenga wa Mulungu wa kuulanga kamulongela, “Kimbila uuhonye ugima wako! Sambiulole kukisogo ama sambiwime hanhu hohose kubonde. Kimbilila kumigongo, giladi sambiukomigwe.”

18 Ila Loti kawalongela, “Bule, chonde, wandewa zangu! 19 Mtumigwa wenu kapata ngekewa hameso genu. Mweye mundagusila nie unozi mkulu mkuukombola ugima wangu. Ila migongo ya kutali ng'hani, mwangalo uno wonivika na nodanganhika kipigiti sinavika kuja. 20 Lola, hana kiwambo hano kili behibehi. Beta nikimbilile hiko. Kiwambo kidodo ng'hani, nihonye ugima wangu!”

21 Kamulongela, “Vinoga ng'hani, nikuhulika. Sikibananga ikiwambo chuulonga. 22 Hima! Kimbilila! Kwavija sitenda kinhu chochose mbaka vondauvike hiko.”

Kwavija Loti kakikema kidodo, avo kiwambo kija kikemigwa Soali.[a]

23 Zua dikala disimbuke kipigiti Loti viyavikile mkiwambo cha Soali. 24 Abaho MNDEWA kauhumulusa moto na baluti kulawa kuulanga mmiwambo ya Sodoma na Gomola. 25 Kaibananga imiwambo na idibawe jose, hamoja na wanhu wose wakalile muja mmiwambo na miche yose ikalile muja mdibawe. 26 Ila mtwanzi wa Loti kahinduka kukisogo, avo kagaluka nguzo ya munyu.

27 Imitondo iyagwe Ablaham hima kachola hanhu hayakalile yemile haulongozi wa MNDEWA. 28 Kalola ng'ambu ya Sodoma na Gomola na idibawe jose, kona yosi dofuka kulawa muisi, kamba yosi da tanuli. 29 Ila Mulungu viyaibanange imiwambo ya kudibawe ako kuyakalile yokala Loti, kazigelegeza nhambiko za Ablaham, na kumkombola Loti kulawa mdihekaheka da ubananzi.

30 Loti na wandele zake wabili wahalawa mkiwambo cha Soali na kukala muisi ya migongo, kwavija kadumba kukala Soali. Heyo na wandele zake wabili wakala mmhango. 31 Ija imndele mkulu kamulongela mdodo wake, “Tata wetu m'vyele, na haduhu munhu muulumwengu wose wa kutusola tweye giladi tupate wana kamba viili ha wanhu wose. 32 Avo izo tumng'weze ugimbi tata wetu, abaho tuwase nayo, giladi tupate wana kubitila heyo, na lukolo lwetu lugendelele.” 33 Avo wamng'weza tataao ugimbi ikilo ija, na ija imndele mkulu kengila mmhango na kuwasa na tataake. Ila tataake havitangile kipigiti mndele wake viyatambalale ama viyenuke.

34 Zua diyagwe ija imndele mkulu kamulongela mdodo wake, “Ikilo ibitile niwasa na tataangu. Beta tumng'weze ugimbi kabili tataetu ikilo ya lelo, na gweye uwase nayo, giladi tupate wana kubitila heyo.” 35 Avo vivija wamng'weza ugimbi tataao ikilo ija, na ija imndele mdodo kengila mmhango na kuwasa na tataake. Vivija tataake havitangile kipigiti mndele wake viyatambalale ama viyenuke. 36 Avo wandele wose wabili wa Loti wapata inda kubitila tataao. 37 Ija imndele mkulu kapata mwana mbigalo, kamgwelela twaga dikemigwa Moabu. Heyo iyo muhenga wa Wamoabu wa lelo.[b] 38 Vivija na ija imndele mdodo kapata mwana mbigalo, kamgwelela twaga dikemigwa Ben-Ami. Heyo iyo muhenga wa Waamoni wa lelo.

<- MWANDUSO 18MWANDUSO 20 ->