1 MNDEWA kamulawilila Ablaham behi na mibiki mikulu ya mwaloni ya munhu imwe yakemigwe Mamle kipigiti viyakalile hanhu ha kwingilila muihema yake mkipigiti cha keakea da imisi. 2 Ablaham kenula meso gake, kawona wanhu wadatu wema behi na heyo. Viyawawene, hima kalawa hanhu ha kwingilila muihema yake kawakimbilila na kuwafugamila mavindi kainamila mbaka hasi haulongozi wao. 3 Kalonga, “Mndewa wangu, kamba nipata ngekewa hameso gako, sambiunibite mtumigwa wako. 4 Beta niwalagizile mazi mnave magulu genu, na muhumule hasi ya m'biki uno, 5 niwagwelele kinhu cha kuja mpate mhiko abaho mgendelele na mwanza wenu, kwavija mmwizila mtumigwa wenu.”

Na hewo walonga, “Tenda kamba vuulongile.”

6 Ablaham hima kengila mdihema kamulongela Sala, “Hima, sola gunia da usage wako unogile woke mikate.” 7 Abaho Ablaham kakimbila kuchola mdidale da ng'ombe, kasola mwanang'ombe yanonile na kumgwelela mtumigwa, na heyo kamchinja himahima na kumsasala. 8 Ablaham kasola mtindi, matombo ga ng'ombe, na nyama ya mwanang'ombe iyamsasale, kawekila haulongozi wao. Kipigiti viwakalile woja, Ablaham kema behi nao, hasi ya um'biki.

9 Abaho wamuuza, “Kakwahi mtwanzi wako Sala?”

Na heyo kawedika, “Ka haja mgati ya idihema.”

10 Imwe mmwanza wao kamulongela Ablaham, “Kweli nokubwelela mkipigiti kamba kino cha mulao ukwiza, na mtwanzi wako Sala kowa na mwana.”

Sala kakala hachugu chake yotegeleza, hanhu ha kwingilila mdihema. 11 Ablaham na Sala wakala wavyele ng'hani, na kipigiti cha Sala kupata wana kikala kimalile. 12 Avo Sala kaseka munda kwa munda, yolonga, “Vodahikaze kikongwe kamba nie mhate ndeng'ha ino, ihawa na mbigalo wangu vivija m'vyele ng'hani?”

13 Abaho MNDEWA kamuuza Ablaham, “Habali Sala yoseka na kulonga, ‘Kweli nie nodaha kupata mwana kipigiti kino cha uvyele?’ 14 Hana mbuli ileka kudahika ha MNDEWA? Nokubwelela mkipigiti kamba kino cha mulao ukwiza, na Sala kowa na mwana.”

15 Sala kadumba, avo kabela na kulonga, “Nie sisekile.”

Ila heyo kamulongela, “Ona, kuseka.”

16 Abaho waja iwanhu wenuka haja hawakalile, walongoza nzila ya Sodoma, na Ablaham kachola hamoja na hewo giladi yawasindikize. 17 Abaho MNDEWA kalonga mngelegeza, “Nimfise Ablaham kija kinilonda kutenda? 18 Kwavija lukolo lwake lowa undewa wene mhiko, na kubitila heyo ndewa zose zili muisi zomotezwa. 19 Nie nimsagula heyo giladi yawafundize wanage na wanhu wali mng'anda yake na waja wondawavumbuke hamwande kuigoga nzila yangu mkugatenda ganogile na galibule uzenzeleganye, giladi nie, MNDEWA, nizitende mbuli zose ziniilagane nayo.”

20 Abaho MNDEWA kamulongela Ablaham, “Mbuli zihile za Sodoma na Gomola zibanza ng'hani na vilozo vao viwa vikulu ng'hani. 21 Nohumuluka hasi nilole kamba sang'hano zao zowotenda ziha kamba vija vinihulike. Kamba ihawa sio, novitanga.”

22 Abaho waja iwanhu wabili wahalawa wachola Sodoma, ila MNDEWA kasigala na Ablaham. 23 Ablaham kamkwenhukila MNDEWA kamuuza, “Kweli kom'bananga munhu yalibule uzenzeleganye hamoja na munhu yali na uzenzeleganye? 24 Kamba hana wanhu malongo matano mdiwambo walibule uzenzeleganye, kodibananga wambo jose? Huleka kudibananga idiwambo giladi wanhu waja malongo matano wakomboligwe? 25 Sambiutende kamba avo, kumkoma munhu yalibule uzenzeleganye hamoja na munhu yali na uzenzeleganye, ama kumtendela munhu yalibule uzenzeleganye galingile na gaja ga munhu yali na uzenzeleganye. Sambiutende avo, Mulamula wa ulumwengu wose halondigwa yawebule uzenzeleganye?”

26 MNDEWA kalonga, “Kamba nihawavika wanhu malongo matano walibule uzenzeleganye mdiwambo da Sodoma, wambo jose nodileka kudibananga sama yao.”

27 Ablaham kamuuza mwanza uyagwe, “Chonde, Mndewa, nigele kumgongo avija vinigendelela kukuuza, nie si kinhu, ila timbwisi na mitozi. 28 Ila kamba uhawavika wanhu malongo mane na watano walibule uzenzeleganye, kodibananga idiwambo kwavija viwahunguke wanhu watano?”

MNDEWA kamwidika, “Kamba nihawavika wanhu malongo mane na watano walibule uzenzeleganye, sidibananga.”

29 Ablaham kamuuza mwanza uyagwe, “Vilihi kamba uhawavika wanhu malongo mane?”

MNDEWA kamwidika, “Sidibananga idiwambo kamba nihawavika wanhu malongo mane.”

30 Ablaham kalonga, “Chonde, sambiwone lusango, Mndewa, ila leka nikuuze mwanza uyagwe. Vilihi kamba uhawavika wanhu malongo madatu weiyeka walibule uzenzeleganye?”

MNDEWA kamwidika, “Sidibananga idiwambo kamba nihawavika wanhu malongo madatu.”

31 Ablaham kalonga, “Chonde, Mndewa, nigele kumgongo avija vunigendelela kukuuza. Vilihi kamba uhawavika wanhu malongo mabili walibule uzenzeleganye?”

MNDEWA kamwidika, “Sidibananga idiwambo kamba nihawavika wanhu malongo mabili walibule uzenzeleganye.”

32 Ablaham kalonga, “Chonde, sambiwone lusango, Mndewa, nokuuza mwanza uno tu. Vilihi kamba uhawavika wanhu longo dimwe weiyeka walibule uzenzeleganye?”

MNDEWA kamwidika, “Sidibananga idiwambo kamba nihawavika wanhu longo dimwe walibule uzenzeleganye.” 33 Viyeshile kulonga na Ablaham, MNDEWA kachola, na Ablaham kabwela ukae.

<- MWANDUSO 17MWANDUSO 19 ->