MADIU 16

Tomotoga nuanuadi 'eba 'isa toketokena

(Madiu 12:38-41; Malika 8:11-21; Luke 12:54-56)

1 [a] Tamu tutuya me Diu to'edakumetavo 'ifwaidi i maia Iesu 'waineye, taunidi totafalolo 'adi wagava Falisi wata Sadusi. Nuanuadi i na silubuya bega i voneni i vo, Nuanuama tamu 'eba nuavogana wata 'eba nua'ewa 'u na 'idewai bega 'a na 'asetamu ma yamu veimea Yaubada 'wainega.” 2-3 Siwe Iesu yadi vona i tutuli i vo, 'Ai'edi 'wa na 'iseni Malayaubani i na laka 'wa na 'asetai tutuya kumaga, wata 'ai'edi 'wa na 'iseni waowa i na vetovotovoia 'wa na 'asetai 'ako i na 'wei. Tugusanidi i na vemi bega 'ami fata 'wa na 'asetai ava'ai i na souyedi, we'e 'eba 'isa toketokedi Yaubada i 'i'idewadi matamie tutuya i mimaiga faifaina kebu 'wa da 'isa'inanadiga. 4 [b] 'Omi tutuya de'e 'ana tomotoga yami sauluva sakoidi wata kebu nuanuami Yaubada yana nuanua. 'Wa vonavona nuanuami 'eba nuavogana wata 'eba nua'ewa, a na 'idewai siwe a nuani kebu tamu sai'afo a na 'idewaiga. We'e tamu nani a na veifufuyeni yami 'eba 'isa. 'Eba 'isanina 'asa'aiana Iona, taunina Yaubada yana tolu'ivona, igana bwaikina kamoneye i miamia 'aiata 'aitonu, mulieta i souyeni.” Iesu i vona'a'ava, i 'iawedi i nago tulineye.

Iesu i vona-awatabai Falisi wata Sadusi faifaidi

5 Mulieta Iesu ma yana tovetutuyamavo i damana lavu vi'ainega, siwe tovetutuyamavo nuadi i fani, kebu tamu 'ani'ani i da 'ewaiga. 6 [c] Iesu vona-awatabaiega i velu'ase'asedi bega tomotoga yadi sauluva sakoidi kebu i na tunuvedamanidi i vo, Taunimi 'wa na 'i'isave'avinimi i na nunago Falisi wata Sadusi yadi isita i na vedamanimi i na 'ivesakoimi.”

7 'Aise'avadi i veifufu i vo, Isita[d] beledi 'ana 'eba 'ivebwaika, bani'odi i voneyediga fai 'ida beledi kebu ta da 'ewadiga.” 8 Iesu yadi vona i 'asetai bega i vonedi i vo, Awale nuafoumi i veviga 'wa veveifufu beledi faifaina? Yami vetumagana mweana. 9 [e] Bola kebu 'wa da 'asetakuga yau 'aku fata 'ani'ani a na velemi. 'Wa na nuani basenadi 'ani'ani 5 a 'ivividi, tomotoga 5,000 i 'ani, mulieta i 'ani-wayogeni bayawa 'ifwaidi 'wa veadagidi. 10 [f] Wata 'wa na nuani basenadi 'ani'ani 7 'waidiega tomotoga 4,000 a ve'anidi wata bayawa 'ifwaidi 'wa veadagidi. 11 Awale yaku vona kebu 'wa da 'asetaiga. 'Omi 'wa vo 'ako yau a vonavona beledi faifaina, siwe kebu. Begaidi a na veifufu-vaitugana 'waimie, taunimi 'wa na 'i'isave'avinimi i na nunago Falisi wata Sadusi yadi isita i na vedamanimi i na 'ivesakoimi.” 12 Nika tovetutuyamavo i 'asetai Iesu kebu i da vonavona isitanina beledi 'ana 'eba 'ivebwaika faifaina, we'e mogitana i vonavona Falisi wata Sadusi yadi ve-vekavekali kebu i na vedamanidiga.

Fita yana 'aseta Iesu faifaina i sivemageseni

(Malika 8:27-38; Luke 9:18-27)

13 Iesu ma enavo i nagoi tamu 'awalawa 'waineye 'atamana Sisalia Filifai lilivaneye, bei yana tovetutuyamavo i velutoliedi i vo, 'Wa da nogaiga tomotoga yadi veifufu yau a vetomotogaotoga aitoi?” 14 [g] Tovetutuyamavo yana velutoli i tutuli i vo, 'Ifwaidi tomotoga i vonaga 'omu Ioni Tobafitaiso i yawasa-vaitugana, 'ifwaidi i vonaga 'omu Ilaitia abamayega i obuma wata 'ifwaidi i vonaga 'omu Ielemaia 'alo tamu Yaubada yana tolu'ivona wafayega i tovoi.” 15 Iesu yana tovetutuyamavo i velutoliedi i vo, We'e 'omi, 'wa da nuaniga yau aitoi?” 16 [h] Saimoni Fita i vo, 'Omu Keliso,[i] Yaubada miamia-vagaina Natuna wata 'ana Venua'ivina.” 17 Iesu i voneni i vo, Saimoni, 'omu Iona natuna, Yaubada i vesauluva 'atumaina 'waimuye fai 'aku 'aseta kebu tomotogaotoga i da vemu, yamu 'asetanina tonovina i mai abamayega Tamaku 'wainega. 18 Fai 'u 'asetakuga begaidi a na vonemu. 'Omu Fita, (wagavanina 'ana 'aseta Kileu), kileunina bababana tabwaneye yaku 'Aila'a a na va'augidi bega i na vefue. Yaku 'Aila'a i na mia-vagata, towafa yadi 'eba mia[j] toketokena kebu 'ana fata i na tala'avui. 19 [k] Veimea a na velemu tomotoga yadi luku Yaubada yana 'Eba Veimea 'waineye faifaina. Ava'ai sauluvaga 'u na talabodeni fwayefwayeye, wata abame Yaubada i na talabodeni, ava'ai sauluvaga 'u na tauyeni fwayefwayeye, wata abame Yaubada i na tauyeni.”

20 Mulieta Iesu yana tovetutuyamavo i talabodebodedi i vo, Kebu tamu aitoi 'wa na voneni yau Keliso, Yaubada 'ana Venua'ivina.”

Iesu yana veviga wata yana wafa i veifufuyedi

(Malika 8:31-9:1; Luke 9:22-27)

21 Tutuyanina 'waineye Iesu i velamu i kikiavemageta yana tovetutuyamavo 'waidie i lubwaineni i na nago Ielusalema, bei veviga bwaikina i na veluagai me Diu yadi to'edakumetavo 'au'auveadi, tovelomu yadi to'edakumetavo wata ve'etoboda 'adi tovevo 'waidiega. I na veimea i na wafa siwe 'aiata 'ana vetonu 'waineye Yaubada i na sivetovoia.

22 Fita Iesu i voneni i nagoi tulidie bega i talabodeni i vo, 'Auvea, kebu bani'odi 'u na voneyediga. Veviga wata wafa 'u veifufuyediga Yaubada i da talabodedi bega kebu i da sousouyedi 'waimuye.” 23 Iesu i sivilai Fita i voneni i vo, 'U vaganago, yamu nuanuananina Seitani yana nuanua. Yaku 'eda 'u totovibodai, yamu nuanuananina tomia fwayafwaya yadi nuanua, kebu Yaubada 'wainega.”

24 [l] Wata Iesu i vona yana tovetutuyamavo 'waidie i vo, 'Ai'edi aitoi nuanuana mogitana i na mai 'waikuye taiadi 'a na nagoga, nagami taunina yana nuanua i na bailedi. Fai i na vematayakeyakeku veviga bwaikina i na veluagai yau bani'odi a na veluagai. Voke i na wafa faifaiku yau bani'odi a na wafa 'ai lagalagana 'waineye. 25 [m]'Ai'edi aitoi yana mia 'ana 'atumaina i na ve'o'oleni, kebu nuanuana yawaina i na tauyeni faifaiku, taunina i na wafaotoga. We'e 'ai'edi aitoi yana mia 'ana 'atumaina wata yawaina i na tauyedi faifaiku, mia 'atumaina wata miamia-vagaina i na veluagai. 26 'Ai'edi tamu aitoi fwayafwaya matatabuna 'ana kukua i na 'ewadi mulieta yawaina i na 'a'ava, ava'ai 'ana 'atumaina? Kebu 'ana fata tamu nani 'wainega yawaina i na kimwanei. 27 [n] Fai 'awaie yau a vetomotogaotoga a na souyeku Tamaku yana mageta mataududulina 'wainega, yaku anelose taiadi, mulieta tomotoga matatabudi a na tutulidi yadi sauluva 'aitamogana 'aitamogana 'adi 'isa'isa bani'odi. 28 A vona mogitana 'waimie, 'omi 'ifwaimi bola ma yawaimi 'wa na miamiani, yau a vetomotogaotoga 'wa na 'iseku a na mai tomotoga matatabumi a na veimeyemi.”

<- MADIU 15 MADIU 17 ->