MADIU 15

Me Diu tubudiavo yadi ve faifaina

(Malika 7:1-23)

1-2 Mulieta 'ifwaidi me Diu totafalolo Falisi wata ve'etoboda 'adi tovevo i maia Ielusalemayega Iesu i velutolieni i vo, Awave'eda'eda i maiga tubudavo 'waidiega, awale yamu tovetutuyamavo kebu i da ve'ililibuyediga i geugeudi? 'Ani 'ana tutuya 'waineye kebu nimadi i da 'i'ilekoa we'e i 'ani'animo.” 3 Iesu yadi velutoli i tutuli i vo, We'e 'omi awale Yaubada yana veimea kebu 'wa da ve'ililibuyediga 'wa geugeudi, ma'itufa taunimi yami ve'etoboda 'wa vematayakeyakedi? 4 [a]Yaubada i vonaga i vo, Tamamu wata inamu 'u na ve'ililibuyedi,’ wata i vo, 'Ai'edi aitoi tamana 'alo inana i na awavesakoyedi bega vita i na veluagai, i lubwaineni 'wa na luvewafai.’ 5-6 Veimeanidi 'wa geugeudi fai 'wa veve 'wa vo, 'Ai'edi aitoi ma yana mani, siwe kebu nuanuana tamana wata inana i na 'ivaisediga, 'omi 'wa tauyeni bega i na vonedimo i na vo, Mani de'e a na 'aniveleneni Yaubada faifaina,’ vonanina 'wa fali'atumaieni. We'e mogitana i lubwaineni tamana wata inana i da ve'ililibuyedi, maninina 'wainega i da 'ivaisedi. De'e bani'odi Yaubada yana Vona 'wa venani-'avo'avovoyeni, ma'itufa ve'etoboda tubumiavo 'waidiega 'wa vevematayakeyakedi. 7 'Omi mogitana tovekali. Basenadiotoga Yaubada yana tolu'ivona Aisea, Yaubada yana Vona 'wainega i vona-samula faifaimi. I vonaga mogitana i vo,

8 [b]De'e 'aila'anidi 'awakebuladiega i ve'ililibuyeku,

siwe kebu mogitana i da nuakalikalieku.

9 Taunidi yadi nuanuayega i veve igodina Yaubada 'wainega,

begaidi 'waikuye i 'o'odu-maimaiga.’ ”

Naninidi tomotoga i na 'ivesakoidi

10 Iesu 'aila'a i goledi i nagoi 'waineye i vonedi i vo, A na vonemiga 'wa na venua'ivineni nika 'wa na 'asetai. 11 Ava'ai i na luku tomotoga 'awadiamo kebu 'ana fata tomotoga i na 'iveyokedi, we'e mogitana vona 'alo nuanua sakoidi tomotoga 'waidiega i na souyediga, 'ana fata tomotoga i na 'iveyokedi.”

12 Mulieta Iesu yana tovetutuyamavo i maia i voneni i vo, Yamu vona 'wainega Falisi i kamogala, 'u 'asetai?” 13 Iesu i vonedi i vo, Welavinidi Tamaku abame kebu 'ana bakubakulaga, matatabuna i na siabudi. 14 [c] Falisinidi kebu faifaidi 'wa na nuanua. Avinodi taunidi tomotoga 'ada to'edakumeta, siwe bani'odi tomatasako fai Yaubada yana Vona kebu i da 'isa'inanadiga. Kebu 'ana fata tamu tomatasako iana tomatasako i na siveikani fai bola i na be'uluga vakavakale.”

15 Fita i voneni i vo, Nuanuaku vona-awatabainina 'u da kiavemagetai 'waimeye.” 16 Iesu i vo, 'Alo 'omi wata bola 'wa bavubavu? 17 I lubwainemi 'wa da 'asetai naninidi i na luku tomotoga 'awadiamo i na nago kamodie mulieta yogo yana 'edeye i na nago. 18 [d]We'e naninidi sakoidi 'awadiega i na souyediga, 'ana fata tomotoga i na 'iveyokedi Yaubada mataneye, fai yadi nuanua 'waidiega i mai.

19 Sauluvanidi side, nuanuana sakoidi, luvewafa, lauobu, ve'avula-'avo'avovo, vainago, vekali wata vebonaivo. 20 Naninidi de'e 'ana fata tomotoga i na 'iveyokedi Yaubada mataneye. 'Ai'edi nimami kebu 'wa na lekoadi Falisi yadi nuanua bani'odi, mulieta 'wa na 'ani, 'ako kebu 'ana fata i na 'iveyokemiga.”

Vavine yadi vetumagana

(Malika 7:24-30)

21 Mulieta Iesu ma enavo bei i miamiaga i 'iaweni, i nagoi tamu 'awalawa 'waineye, 'atamana Taia wata Saidoni lilivadie. 22 I miamiani nika tamu vavine Kenani i le'wa, vavinenidi 'awalawanina 'waineye i miamia. Taunidi kebu vavine Diu siwe i mai i toke i velu'ui Iesu 'waineye i vo, 'Auvea, 'omu Kini Devida tubuna, 'u da 'isanuakalikaliema. Natuku vevinena yaiaina i agei bega i veveviga bwaikina.” 23 Siwe kebu tamu ava'ai Iesu i da voneyeni 'waidie. Mulieta yana tovetutuyamavo i maia 'waineye i lukakadeni i vo, 'U veugeugedi, mulideye i mimai i vevetaniga-logilogi.”

24 Tovetutuyamavo i vonavonaga begaidi Iesu vavine i vonedi i vo, Yaubada i vetunekuga me Isileli 'aise'avadi 'waidie, taunidi vuyovuyodi 'wa da vo sifi, we'e 'omi mali tomotoga kebu.” 25 We'e vavine i nogai Iesu yana vona i mai ma yadi ve'ililibu i 'odu 'ageneye, i vo, 'Auvea 'u da 'ivaisema.” 26 Iesu i vo, Kebu i da lubwaineku kwakwama 'adi'adi a na elodi a na 'anivelenedi 'ou'ou 'waidie.” 27 Vavine i 'asetai Iesu i vonavona nagami i na folova taunina yana 'aila'a me Diu 'waidie, begaidi i voneni i vo, 'Auvea we'e mogitana. Siwe tutuyanina kwakwama i na 'ani'ani, 'ou'ou siaidi mukumuku i na luluyamuyamu. Begaidi sai'afo 'u da 'ivaisema.” 28 Iesu yadi vona i nogai i vonedi i vo, Yami vetumagana toketokena, ava'ai nuanuami 'ana mogitana i na souyeni 'waimie,” nika mogitana natudi i ve'atumai.

Toviga fuedi Iesu i 'ive'atumaidi

29 Iesu ma enavo 'awalawanina i 'iaweni, Lavu Galili balebaleamo i nagoi, i laka tamu 'oya siaina 'waineye i miabui. 30 Tomotoga fueotogidi i maia, yadi toviga fuedi i miedi, toviganidi 'ifwaidi 'agedi sakoidi, tomatasako, tubusakosako, tomotoganidi kebu 'adi fata i na welavaga wata 'ifwaidi i vigaotoga. Toviganidi i miedi Iesu 'waineye matatabudi i 'ive'atumaidi. 31 Tomotoga i 'iseni nuadi i voganidi fai egavo kebu i da welawelavaga siwe i welava, tubusakosako wata 'agedi i sakoga i yogodewa wata tomatasako i 'isa-vaitugana. Naninidi faifaidi tomotoga fuedi me Isileli yadi Yaubada i subiai.

Tomotoga 4,000 Iesu i ve'anidi

(Malika 8:1-10)

32 Iesu yana tovetutuyamavo i goledi i nagoi 'waineye i vonedi i vo, Tomotoga de'e faifaidi a nuavita fai 'akonadi 'aiata 'aitonu taiadi ta miamiani siwe kebu 'adi'adiga. Kebu nuanuaku ma 'adi lase a na vetunedi i na nagoi yadi vanuge fai bola 'edeye i na mwea.” 33 Yana tovetutuyamavo i voneni i vo, De'e kebu tomotoginaga, ava'aibe bei 'ani'ani ta na veluagai tomotoga de'e ta na ve'anidi?” 34 Iesu i velutoliedi i vo, We'e 'omi, 'aivia 'ani'ani 'waimie?” I vo, Kebu fuediga, 'ani'ani mwadodoudi 7 wata igana siaidi.” 35 Iesu 'aila'a i vonedi fwayefwayeye i vemiamiabui. 36 Mulieta 'ani'aninidi 7 igana taiadi i 'ewadi, i vekaiwa Yaubada 'waineye, i 'a'avana i 'ivividi wata igana i baidi tovetutuyamavo i veledi 'aila'a i veutadi. 37 Matatabudi i 'ani, 'adi fata, mulieta yana tovetutuyamavo tomotoga nikilidi i va'augidi bayawa bwaikidi 7 i veadagidi. 38 To'aninidi iaveta tulai'avadi i lu'iawawadi 'adi 'aila'a 4,000, we'e vevine tulaidi wata yavayavava kebu taiadi i da lu'iawawadiga.

39 'Ani i 'a'avana, Iesu tomotoga i vonedi i nagoi, we'e i dodoga wakeye i nago 'awalawa Magadani.

<- MADIU 14 MADIU 16 ->