Watagusa 14

Samsoni kanguhesa

1 Samsoni nakaluta mbaka Timuna, nakamona mdala ako Timuna yawele ndo yumwe wa wahinza wa Wafilisti. 2 Hamba, nakahiluka na kuwalonjela mhaza na mayake, yolonga, “Ndimona mdala ako Timuna, yumwe wa wahinza wa Wafilisti, lelo mng'hundize ndimhole.” 3 Mayake na mhaza wa heye nawamlonjela Samsoni, “Ndaze, haduhu mdala ne yumwe hali wang'holozo ama kuli nhanzi ya heni yeng'ha, mbaka kwamula kuluta kuhola kwa Wafilisti wano wohambe wenjile ikumbi?” Samsoni nakamlonjela mhaza wa heye, “Mng'hundize heni ndimhese ayo kwa vila nojezwa na heye.” 4 Ila mhaza wa heye na mayake hawavizelele kota mbuli ayi nayali ya Mkulu Nguluwi, kwa vila nayali yogana chiwalo kulawa kwa Wafilisti. Lelo mhela wula Wafilisti nawali wowalongoza Waisilaeli.

5 Samsoni na mhaza wa heye na mayake nawadulika mbaka Timuna. Nalowafichile kuli migunda ja zabibu ako Timuna, baho du isimba nalimuwinza kuno limng'hanuchila. 6 Muhe wa Mkulu Nguluwi naumuyila kwa mong'ho ng'hatu, naye Samsoni nakalidadula alyo isimba kota kanguchidadula chinyehe. Hawele na chinhu choneche mmoko mwa heye. Hawalonjele mhaza na mayake choyaditile.

7 Hamba Samsoni nakadulika na kulonga na ayo mdala na nakanojezwa na heye. 8 Hamba, nakahiluka leka yamhole ayo mhinza. Lole, nzuchi nyinji nazali mgati mwa itufi lya alyo isimba na hanombwa. 9 Nakahola yila hanombwa kwa moko ga heye na kulutilila na majendo kuno yolya ayo hanombwa mnzila, nakawafika mhaza na mayake na nakawapa yila hanombwa nawo nawalya, ila hambe yawalonjele kota hanombwa ayo nakailavya kulawa kuli itufi lya isimba.

10 Lelo mhaza wa heye nakaluta kwa ayo mdala, naye Samsoni nakadita mnvina ako kwa vila ndo chihendo kwa wasongolo kudita ahyo. 11 Lelo Wafilisti vyowamuwene Samsoni, nawawegala wasongolo makumi gadatu wawe hamwe na heye kuli mnvina. 12 Samsoni nakawalonjela, “Heni ndowagwilliza hemwe kwa chitendawili, wone moweza kutang'hula chitendawili acho kuli mazuwa aga saba ga mnvina na kuvizela, aho ndo ndowapa mivalo makumi gadatu ga kitani na mivalo jinji makumi gadatu. 13 Ila wone molemwela kutang'hula, aho ndo hemwe momha heni mivalo ajo makumi gadatu ga kitani na mivalo jinji makumi gadatu.” Lelo hewo nawamlonjela, “Goya, longa leka hetwe tukuhulichize.” 14 Heye nakawalonjela,

“Kulawa kwa yalingulya,

nachilawa chilyo,

kulawa kwa ayo yawele na mong'ho

nachilawa chinonile.”

Nawo nahawawezile kutang'hula chitendawili acho kwa mazuwa gadatu.

15 Kuli zuwa lya kane, nawamlonjela mchewake Samsoni, “Mhembulize mlume wa hegwe leka yatutang'hulile acho chitendawili, leka tuleche kukulakaza kwa chiluli hegwe na ivyazi lya mhaza wa hegwe. Ndaze, namtuchema leka mhole lufufu lwa hetwe ama hebu?” 16 Lelo mchewake Samsoni nakalila hali heye, nakalonga, “Hegwe kwangunzudila hambe ungane. Hegwe nakuwawichila chitendawili wano wanhu wa heni na hundonjele.” Samsoni nakamlonjela ayo mdala, “Lole, siwalonjele mhaza na mayangu, lekachoni ndikulonjele hegwe?” 17 Naye nakamlilila mbaka mnvina hoiwele habehi kumala. Lelo kuli zuwa lya saba, Samsoni nakamlonjela ayo mdala kwa vila nayali yomhimiliza ng'hatu yamlonjele. Mdala ayo nakawalonjela wala wanhu wa heye kutang'hula kwa chitendawili acho. 18 Nawo wanhu wa muji awo nawamlonjela Samsoni zuwa lya saba kung'hali kufika kuzinga kwa isanya,

“Ndo chinhu chachi chinonile kusinda hanombwa?

Ndo chinhu chachi chiwele na mong'ho kusinda isimba?”

Naye nakawalonjela,

“Wone mwahalimile na isenga lya heni,

mwahatang'hule chitendawili cha heni.”

19 Muhe wa Mkulu Nguluwi naumuyila Samsoni kwa mong'ho, naye nakadulika mbaka Ashikeloni, nakawakopola walume makumi gadatu na kuhola mivalo ja hewo na kuwapa wala watang'hule chitendawili cha heye. Kuno yawele na ng'halazi nakakwina kuhiluka haluga ha mhaza wa heye. 20 Ila ayo mchewake Samsoni nakahesigwa na mlume yunji yawele mtanzi wa Samsoni zuwa lya kuhesa.

<- Watagusa 13 Watagusa 15 ->