1 Sauli loyahiluche kulawa kitowa na Wafilisti, wanhu nawamlonjela kota Daudi ka kuli chiwala cha Eni-gedi. 2 Lelo Sauli nakahola wanhu elufu zidatu wazidahe kitowa ngondo kulawa Isilaeli yeng'ha, nakaluta nawo kumpala Daudi habehi na Mitalawe ja Mhene za Kisolo. 3 Nakafika honhu hawele na mibani ja ming'holo hafungo ha nzila, aho nakwali na mhalika, Sauli nakenjila amo nakaluta kitanza. Daudi na wanhu wa heye nawali mumo mgati lukami mwa ayo mhalika. 4 Wanhu wa Daudi nawalonga, “Ulole, lehano ndo lila zuwa lyoyakulonjele Mkulu Nguluwi kota kumuwika mng'honyo wa hegwe mmoko mwa hegwe nagwe komditila heye chinhu choneche choulinguchona chinoga.” Lelo Daudi nakajenda chinyele na kudumula lupembo lwa ivalo lya Sauli.

5 Daudi vyoyaditile ahyo, nakaluka kitagusa mnhumbula mwa heye kwa vila nakadumula lupembo wa ivalo lya Sauli, 6 ahyo Daudi nakawalonjela wanhu wa heye, “Mkulu Nguluwi yandemeze kudita chinhu kota achi kwa mkulu wa heni, yabakalizwe mafuta na Mkulu Nguluwi. Ndeche kumlumiza munhu yawele Mkulu Nguluwi nakambakaliza mafuta.” 7 Kwa ulonzi awo, Daudi nakawalemeza wanhu wa heye waleche kumtowa Sauli. Hamba Sauli nakenuka, nakalawa kuli mhalika nakalutilila na majendo ga heye.

8 Aho ndo Daudi nakalawa kuli mhalika na kumchema Sauli, yolonga, “Mndewa, mkulu wa heni.” Mndewa Sauli loyalolile kumbele, Daudi nakenamiza kumeho kwa heye kwa kumfugamila Sauli. 9 Daudi nakamuuza Sauli, “Lekachoni kwanguhulichiza ulonzi walingulonga wanhu, howokulonjela, ‘Daudi kangugana kukuditila wihe?’ 10 Lelo ulole, lehano meho ga hegwe nagona Mkulu Nguluwi vyoyakuwichile kuli moko ga heni. Wanhu wanji nawandonjela ndikukopole, ila ndikuleka kwa kukonela isungu. Nandiwalonjela kota ndemwela kumlumiza mkulu wa heni kwa vila heye ka mbakalizwa mafuta wa Mkulu Nguluwi. 11 Ulole, mhaza wa heni, dedede ulole lupembo alu lwa ivalo lya hegwe mmoko mwa heni. Ndumula lupembo lwa ivalo lya hegwe ne kukukopola, lelo koweza kuvizela kota heni ndahela nongwa ya kudita wihe ama kukubelenhuka. Siditile wihe kwa hegwe, ila hegwe kwangumhala leka ung'hopole. 12 Mkulu Nguluwi yatutaguse hetwe na yakuhilusile chibida kwa wihe wounditile, ila heni sikulumiza hegwe. 13 Kota ulonzi wa katali vyoulingulonga, ‘Wihe wangulawaga kwa wanhu wehile,’ ila heni hambe ndikulumize hegwe. 14 Ndaze, mndewa wa Isilaeli nakalawa leka yamuwinze munhu whachi? Ndaze, kupelemba libwa lifile ama sewe imwe? 15 Mkulu Nguluwi yawe mtagusa wa hetwe na yataguse hali hetwe. Heye yalole mbuli ayi, yanhowanile na kundohola kulawa kuli moko ga hegwe.”

16 Daudi loyalonjile hila, Sauli nakalonga, “Ndaze, alyo ndo lizi lya hegwe mwana wa heni Daudi?” Sauli nakalila kwa usungu. 17 Hamba Sauli nakamlonjela Daudi, “Hegwe ndo kutanganika kusinda heni, mina hegwe nakunditila ganojile, ila heni ndikuditila gehile. 18 Lehano nakundajila vyoulingunditila ganojile. Mkulu Nguluwi nakambika mmoko mwa hegwe, ila hegwe hung'hopole. 19 Ndaze, munhu wone yamibate mng'honyo wa heye komleka yalute ne kumditila chinhu choneche chihile? Lelo Mkulu Nguluwi yakuhilusile ganojile kota vyounditile lehano. 20 Kukomya, ndivizela kota kowa mndewa wa Isilaeli na undewa wa Isilaeli wowa nzinzili kuli ulongozi wa hegwe. 21 Lelo wilahe kwa Mkulu Nguluwi kota huweza kuwakopola wang'holozangu ne ivyazi lya heni leka itagwa lya ivyazi lya heni lilutilile.”

22 Daudi nakelaha. Hamba Sauli nakahiluka kaye kwa heye, ila Daudi na wanhu wa heye nawahiluka kuli ngome ya hewo.

<- 1 Samweli 231 Samweli 25 ->