1 Kimki tǝrbiyini ⱪǝdirlisǝ, bilimnimu sɵygüqidur;

Lekin tǝnbiⱨkǝ nǝprǝtlǝngǝn nadan-ⱨamaⱪǝttur.

2 Yahxi niyǝtlik adǝm Pǝrwǝrdigarning iltipatiƣa erixǝr;

Əmma Pǝrwǝrdigar ⱨiylǝ-mikirlik adǝmning gunaⱨini bekitǝr.

3 Adǝmlǝr yamanliⱪ ⱪilip amanliⱪ tapalmas;

Lekin ⱨǝⱪⱪaniylarning yiltizi tǝwrǝnmǝs. [a]

4 Pǝzilǝtlik ayal erining tajidur;

Əmma uni uyatⱪa salƣuqi hotun uning ustihinini qiritǝr. [b]

5 Ⱨǝⱪⱪaniy adǝmning oy-pikri durus ⱨɵküm qiⱪirar;

Yamanlarning nǝsiⱨǝtliri mǝkkarliⱪtur. ◼«... oy-pikri durus ⱨɵküm qiⱪirar» — yaki: «...oy-pikri durustur».

6 Yamanlarning sɵzliri ⱪan tɵkidiƣan ⱪiltaⱪtur;

Lekin durusning sɵzi adǝmni ⱪiltaⱪtin ⱪutuldurar. [d]

7 Yamanlar aƣdurulup, yoⱪilar;

Lekin ⱨǝⱪⱪaniylarning ɵyi mǝzmut turar. ◼«Yamanlar aƣdurulup, yoⱪilar» — baxⱪa birhil tǝrjimisi: «Yamanlar aƣdurulƣanda, yoⱪilar».  [f]

8 Adǝm ɵz zerikliki bilǝn mahtaxⱪa sazawǝr bolar;

Əgri niyǝtlik kixi kɵzgǝ ilinmas.

9 Peⱪir turup hizmǝtkari bar kixi,

Ɵzini qong tutup aq yürgǝn kixidin yahxidur. [g]

10 Ⱨǝⱪⱪaniy adǝm ɵz uliƣinimu asrar;

Əmma rǝzil adǝmning bolsa ⱨǝtta rǝⱨimdilliⱪimu zalimliⱪtur. [h]

11 Tirixip teriⱪqiliⱪ ⱪilƣan deⱨⱪanning ⱪorsiⱪi toⱪ bolar;

Əmma ham hiyallarƣa berilgǝn kixining ǝⱪli yoⱪtur. [i]

12 Yaman adǝm yamanliⱪ ⱪiltiⱪini kɵzlǝp olturar;

Əmma ⱨǝⱪⱪaniy adǝmning yiltizi mewǝ berip turar.

13 Yaman adǝm ɵz aƣzining gunaⱨidin tutular;

Ⱨǝⱪⱪaniy adǝm muxǝⱪⱪǝt-ⱪiyinqiliⱪtin ⱪutular. ◼«Yaman adǝm ɵz aƣzining gunaⱨidin tutular» — yaki «Eƣizdiki itaǝtsizliktin rǝzil tuzaⱪ qiⱪar».  [k]

14 Adǝm ɵz aƣzining mewisidin ⱪanaǝt tapar;

Ɵz ⱪoli bilǝn ⱪilƣanliridin uningƣa yandurular. [l]

15 Əhmǝⱪ ɵz yolini toƣra dǝp bilǝr;

Əmma dǝwǝtkǝ ⱪulaⱪ salƣan kixi aⱪilanidur. [m]

16 Əhmǝⱪning aqqiⱪi kǝlsǝ, tezla bilinǝr;

Zerǝk kixi ⱨaⱪarǝtkǝ sǝwr ⱪilar, sǝtqilikni axkarilimas. ◼«...ⱨaⱪarǝtkǝ sǝwr ⱪilar, sǝtqilikni axkarilimas» — ibraniy tilida bu ikki ibarǝ «ikki bisliⱪ» bir sɵz bilǝnla ipadilǝngǝn.

17 Ⱨǝⱪiⱪǝtni eytⱪan kixidin adalǝt bilinǝr;

Yalƣan guwaⱨliⱪ ⱪilƣuqidin aldamqiliⱪ bilinǝr. [o]

18 Bǝzlilǝrning yeniklik bilǝn eytⱪan gepi adǝmgǝ sanjilƣan ⱪiliqⱪa ohxar;

Biraⱪ aⱪilanining tili dǝrdkǝ dǝrmandur. [p]

19 Rastqil mǝnggü turƣuzulidu;

Lǝwzi yalƣan bolsa birdǝmliktur. ◼«rastqil» — ibraniy tilida «ⱨǝⱪiⱪǝtning lewi». «lǝwzi yalƣan bolsa birdǝmliktur.» — ibraniy tilida «yalƣanqi til bolsa birdǝmliktur».

20 Yamanliⱪning koyida yürgüqining kɵnglidǝ ⱨiylǝ saⱪlanƣandur;

Amanliⱪni dǝwǝt ⱪilƣuqilar huxalliⱪⱪa qɵmǝr.

21 Ⱨǝⱪⱪaniy adǝmning bexiƣa ⱨeq külpǝt qüxmǝs;

Ⱪǝbiⱨlǝr bala-ⱪazaƣa qɵmülǝr.

22 Yalƣan sɵzlǝydiƣanning lǝwliri Pǝrwǝrdigarƣa yirginqliktur;

Lekin lǝwzidǝ turƣanlarƣa U apirin eytar.

23 Pǝmlik adǝm bilimini yoxurar;

Biraⱪ ǝhmǝⱪ nadanliⱪini jakarlar. [r]

24 Tirixqan ⱪol ⱨoⱪuⱪ tutar;

Ⱨurun ⱪol alwanƣa tutular. [s]

25 Kɵngülning ƣǝm-ǝndixisi kixini mükqǝytǝr;

Lekin meⱨribanǝ bir sɵz kixini roⱨlandurar. [t]

26 Ⱨǝⱪⱪaniy kixi ɵz dosti bilǝn birgǝ yol izdǝr;

Biraⱪ yamanlarning yoli ɵzlirini adaxturar. ◼«Ⱨǝⱪⱪaniy kixi ɵz dosti bilǝn birgǝ yol izdǝr» — baxⱪa hil tǝrjimiliri: «Ⱨǝⱪⱪaniy kixi ɵz dostining kɵnglidikini tǝkxürǝr», «Ⱨǝⱪⱪaniy kixi dost tutuxta sǝgǝk bolar» yaki «Ⱨǝⱪⱪaniy kixi ɵz dostiƣa yol kɵrsitǝr».

27 Ⱨurun ɵzi tutⱪan owni pixurup yeyǝlmǝs;

Biraⱪ ǝtiwarliⱪ bayliⱪlar tirixqanƣa mǝnsuptur. ◼«Biraⱪ ǝtiwarliⱪ bayliⱪlar tirixqanƣa mǝnsuptur» — baxⱪa birhil tǝrjimisi: «Biraⱪ tirixqan kixi ɵz tǝǝlluⱪatini ǝtiwarlaydu».

28 Ⱨǝⱪⱪaniyliⱪning yolida ⱨayat tepilar;

Xu yolda ɵlüm kɵrünmǝstur.