1 Падиша Сулайманниң пәнд-несиһәтлири: —

Дана оғул атисини шат қилар;

Әқилсиз оғул анисини қайғу-һәсрәткә салар. [a]

2 Һарам байлиқларниң һеч пайдиси болмас;

Һәққанийәт инсанни өлүмдин қутулдурар. [b]

3 Пәрвәрдигар һәққаний адәмниң җенини ач қоймас;

Лекин у қәбиһләрниң нәпсини боғуп қояр.

4 Һорунлуқ кишини гадай қилар;

Ишчанлиқ болса баяшат қилар. ◼«Һорунлуқ» — ибраний тилида: «қол бошлуғи». «Ишчанлиқ» — ибраний тилида: «әстайидиллиқниң қоли».  [d]

5 Язда һосулни жиғивалғучи — дана оғулдур;

Лекин орма вақтида ухлап ятқучи — хиҗаләткә қалдуридиған оғулдур.

6 Бәрикәт һәққаний адәмниң бешиға чүшәр;

Амма зораванлиқ яманларниң ағзиға урар. ◼«Амма зораванлиқ яманларниң ағзиға урар» — башқа бир хил тәрҗимиси: «Амма яманларниң ағзи зораванлиқни йошурар».

7 Һәққаний адәмниң ядикари мубарәктур;

Яманларниң нами болса, сесиқ қалар.

8 Дана адәм йолйоруқ-несиһәтләрни қобул қилар;

Кот-кот, надан киши өз айиғи билән путлишар. [f]

9 Ғубарсиз жүргән кишиниң жүрүш-туруши турақлиқтур,

Йоллирини әгир қилғанниң кири ахири ашкарилиниду.

10 Көз ишаритини қилип жүридиғанлар адәмни дағда қалдурар;

Кот-кот, надан киши өз айиғи билән путлишар.

11 Һәққаний адәмниң ағзи һаятлиқ булиқидур,

Амма зораванлиқ яманниң ағзиға урар. ◼«һаятлиқ булиқи» — бәлким «Ерәм бағчиси»дики «һаятлиқ беридиған дәрәқ»кә охшитилғандур. «Амма зораванлиқ яманниң ағзиға урар» — яки «Амма яманниң ағзи зораванлиқни йошурар».  [h]

12 Өчмәнлик җедәл қозғар;

Меһир-муһәббәт һәммә гуналарни япар. [i]

13 Әқил-идрәклик адәмниң ағзидин даналиқ тепилар;

Әқилсизниң дүмбисигә палақ тегәр. [j]

14 Дана адәмләр билимләрни зиядә топлар;

Лекин ахмақниң ағзи уни һалакәткә йеқинлаштурар.

15 Мал-дуниялири гоя мәзмут шәһәрдәк байниң капалитидур;

Мискинни һалак қилидиған иш дәл униң намратлиғидур.

16 Һәққанийларниң әҗирлири җанға җан қошар,

Қәбиһләрниң һосули гунанила көпәйтиштур. ◼«...гунанила көпәйтиштур» — яки «...гунайини бекитәр».

17 Несиһәтни аңлап уни сақлиғучи һаятлиқ йолиға маңар;

Тәнбиһләрни рәт қилған киши йолдин азғанлардур.

18 Адавәт сақлиған киши ялған сөзлимәй қалмас;

Төһмәт чаплиғанлар ахмақтур. ◼«Адавәт сақлиған киши ялған сөзлимәй қалмас» — ибраний тилида: «Адавәт сақлиғучиниң ләвлири ялған болиду».

19 Гәп көп болуп кәтсә, гунадин халий болмас,

Лекин ағзиға егә болған әқиллиқтур.

20 Һәққаний адәмниң сөзи худди сап күмүч;

Яманниң ойлири толиму әрзимәстур. ◼«Һәққаний адәмниң сөзи» — ибраний тилида: «Һәққаний адәмниң тили». «Яманниң ойлири» — ибраний тилида: «яманниң көңли».

21 Һәққаний адәмниң сөзлири нурғун кишини қувәтләр;

Ахмақлар әқли кәмлигидин өләр.

22 Пәрвәрдигарниң ата қилған бәрикити адәмни дөләтмән қилар;

У бәрикитигә һеч бир җапа-мушәққәт қошмас. ◼«У бәрикитигә һеч бир җапа-мушәққәт қошмас» — башқа бир хил тәрҗимиси: : «Вә җапа-мушәққәт униңға һечнемини қошмас».

23 Ахмақ қәбиһликни тамашә дәп биләр;

Амма даналиқ йорутулған кишиниң хурсәнлигидур. ◼«йорутулған» — ибараний тилида «ишни, башқа адәмни убдан чүшинидиған» дегән мәнада.  [p]

24 Яман киши немидин қорқса шуниңға учрар;

Һәққаний адәмниң арзуси әмәлгә ашурулар.

25 Яман адәм қуюндәк өтүп йоқар;

Лекин һәққаний адәм мәңгүлүк һулдәктур.

26 Адәм аччиқ су жутувалғандәк,

Көзигә ис-түтәк кирип кәткәндәк,

Һорун адәмни ишқа әвәткәнму шундақ болар. ◼«Адәм аччиқ су жутувалғандәк...» — ибраний тилида: «Аччиқ су чишларға тәккәндәк...».

27 Пәрвәрдигардин әйминиш өмүрни узун қилар,

Яманниң өмри қисқартилар. [r]

28 Һәққаний адәмниң үмүти хурсәнлик елип келәр;

Лекин рәзилниң күткини йоққа чиқар. [s]

29 Пәрвәрдигарниң йоли дурус яшаватқанларға башпанаһдур;

Қәбиһлик қилғучиларға болса һалакәттур. [t]

30 Һәққанийларниң орни мустәһкәмдур;

Яманлар зиминда узун турмас.

31 Һәққаний адәмниң ағзидин даналиқ чиқар;

Лекин шумлуқ тил кесип ташлинар.

32 Һәққаний адәмниң сөзи кишигә мок хушяқар;

Яман адәмниң ағзидин шумлуқ чиқар.