ဧဖက်
ဧဖက် သင်းတော်ဟှို ပေါလုရဲ့ ပေးစာ
နိဒါန်း
ဧဖက် သင်းတော်ဟှို ပေါလုရဲ့ ပေးစာ ဟှာ ခရစ်တော် မွီးဘီးန ၆၀ ခုနှစ်လော့‑က်ဟှ ကောလောသဲ သင်းတော်ဟှို ပေါလုရဲ့ ပေးစာန တခီဒဲ ရေးဟှားဟှယ်။ စာရေးသူဟှာ သူကိုယ်သူ တမန်တော် ပေါလုဖြစ် ဖော်ပြဟှားဟှယ် (၁.၁)။ ကောလောသဲကျမ်းထဲမာ လူပေါက်ကိုလေဟှို နှောက်ဆစ်ဟှားဇာ တွိရဘေမဲ့ ဧဖက်ကျမ်းထဲမာ နဲနဲဟှားဘဲ တွိရဟှယ်။ ပေါလုဟှာ အယ်ပေးစာဟှို ရေးဟှားဟှယ် ဆိုဘီး ကျမ်းစာပညာရှင်လေဟှ ဘောတူဟှားဟှယ်။ အယ်ကြောန်းကြောန့် အယ်ပြည်ဟှ သင်းတော်လေထဲမာ ပ္လံ့နှံ့ဟှို့ ရည်ရွယ်ဟှားဟှယ်။ ပေါလုဟှာ အယ်ပေးစာဟှို ထောန်ထဲဟှနေ ရေးဟှားဟှယ် ဆိုဘီးလည်း ဖော်ပြဟှားဟှယ် (၃.၁; ၄.၁; န ၆.၂၀)။ ပေါလုဟှာ ဧဖက် သင်းတော်ဟှို ခရီးပြုနေဟှူ တုခိတ်နတူးဒူ အယ်ပေးစာဟှို ဆောန်းဗါးပါးလိုက်ဟှယ် (၆.၂၁–၂၂)။
ဧဖက်ဗြို့ဟှာ အာရှမိုင်းနားပြည်ရဲ့ ရရာတိုင်း ကီးမားဟှူ ရောမဗြို့တော်ဖြစ်ဟှယ်။ အယ်ဗြို့ဟှာ ဂရိနတ်ဖုရားမ အာတေမိဟှို ပူဇော်ဟှူ ဗိမာန်ရှိဟှူကြောန့် ထန်ရှားလေဟှယ် (တ ၁၉.၂၃–၃၁)။ ဧဖက် သင်းတော်ဟှာ စမာ အားကောန်းဘေမဲ့ နော့‑က်ပိုင်းမာ အားပျော့လာဟှယ် (ဗျာ ၂.၁–၇)။
ပေါလုဟှာ အယ်ပေးစာရဲ့ တဝပ်လော့‑က်မာ ဘုရားသခင်ဟှာ သူ့ရဲ့ လူမျိုးတော်လေဟှို ဖယ်မျိုး ဝီးကော့‑က်ခံရဘီး ယေရှုခရစ်တော်အားဖြင့် သူးနို့ရဲ့ ပြစ်ဟှနေ ဖယ်မျိုး ကယ်တန်ခံရဟှယ် ဆိုဇာဟှို ရှင်းပြဟှားဟှယ်။ သူဟှာ ခရစ်တော်ရဲ့ ကိုယ်ခန္ဓာဖြစ်ဟှူ သင်းတော်ဟှို ဦးခေါန်းဖြစ်န ခရစ်တော်ရဲ့ ဆောက်ဦးဟှို တိုက်ဒေါ့‑က်ချောက်ဖြစ် နှိုင်းယှဉ်ဟှားဟှယ်။ သင်းတော်ဟှာ ဒို့သမီးဖြစ်ဘီး ခရစ်တော်ဟှာ ဒို့သားဖြစ်ဟှယ် ဆိုဘီး နှိုင်းယှဉ်ဟှားဟှယ်။ ပေါလုဟှာ အယ်ပေးစာရဲ့ ဒုတိယတဝပ်မာ ခရစ်ယာန်သတ်တာန ဆိုင်ဟှူ ညွန်းကြားချစ်လေဟှို ပေးဟှားဟှယ်။
ကြောန်းရာ ကျဉ်းချောက်
၁။ ခန်းဂီး ၁ ထဲမာ ပေါလုဟှာ သူ့ကိုယ်သူ မိတ်ဆစ်ဟှားဘီး ဧဖက် သင်းတော်ဟှို နှောက်ဆစ်ဇာအားဖြင့် နိဒါန်းပျိုးဟှားဟှူကြောန်း (၁.၁–၂)
၂။ သူဟှာ ခရစ်တော်န သင်းတော်ရဲ့ ဆစ်နွယ်ရှင်းဟှို ရှင်းပြဟှားဟှူကြောန်း (၁.၃—၃.၂၁)
၃။ ပေါလုဟှာ ခရစ်ယာန်လေ သတ်ရှင်ရမယ့် နည်းလမ်းဟှို ရေးဟှားဟှူကြောန်း (၄.၁—၆.၂၀)
၄။ ပေါလုဟှာ ညွန်ကြားချစ်တချို့ဟှို ပေးပြီး နိဂေါင်းချောက်ဟှားဟှူကြောန်း (၆.၂၁–၂၄)

1 [a]ဘုရားသခင်ရဲ့ လိုတော်အားဖြင့် ခရစ်တော်ယေရှုရဲ့ တမန်တော်ဖြစ်ဟှူ ငါပေါလုဟှာ —

ခရစ်တော်နှိုက် သစ်စာရှိဘီး ဧဖက်ဗြို့[b] မာနေဂေ့ဟှူ သန့်ရှင်းသူလေနားဟှို စာရေးလိုက်ဟှယ်။

2 နို့လေရဲ့ဖဖြစ်ဟှူ ဘုရားသခင်န ယေရှုခရစ်တော်နားဟှနေ ကျေးဇူးတော်န ငြီသတ်ရှင်းဟှာ နန်းနို့လေဟှာ ခံစားရပါစေ။

ခရစ်တော်အားဖြင့်ရဟှူ ဝိညာဉ်ဆုကျေးဇူးကြောန်း

3 နို့လေဟှာ သခင်ယေရှုခရစ်တော်ရဲ့ဖ ဘုရားသခင်ရဲ့ ကျေးဇူးတော်ဟှို ချီးမွမ်းဂေ့ဇို့။ ဖြားဖြစ်ကြောန့်နူးဆိုဟှာ ကိုယ်တော်ဟှာ ကောန်းဂန်လောကနဆိုင်ဟှူ ဝိညာဉ်ကောန်းဂျီးမင်္ဂလာလေဟှို ယေရှုခရစ်တော်အားဖြင့် တလောင်းတဝဒဲ ဖြစ်ဟှူ နို့လေဟှို ပေးသနားဟှားကြောန့် ဖြစ်ဟှယ်။ 4 နို့လေဟှာ ခရစ်တော်န တလောင်းတဝဒဲ ဖြစ်ဟှူကြောန့် ရှေ့တော်မာ သန့်ရှင်းဘီး ပြစ်တန်ဇာမှေ့ဘဲန လွတ်ကင်းဟှူ လူလေ ဖြစ်ဂေ့ဟှို့တွပ် အယ်ကမ္ဘာလောက မှေ့ခန်ဒူးဟှ နို့လေဟှို ဘုရားသခင်ဟှာ ဝီးကော့‑က်ဟှားဇာ ဖြစ်ဟှယ်။

ကိုယ်တော့် မြစ်တာကြောန့် 5 ဘုရားသခင်ဟှ[c]သူ့ရဲ့ သားမီးလေ ဖြစ်စေဟှို့တွပ် ယေရှုခရစ်တော်အားဖြင့် ကြိုတန်ဘီး သတ်မှတ်ဟှားရှင်း ဖြစ်ဟှယ် — အယ်မူဇာဟှာ ကိုယ်တော်ရဲ့ လိုတော်န ကြံစည်တော်လေဘဲ့ ဖြစ်ဟှယ်။ 6 ကိုယ်တော်ဟှာ ရရာတိုင်း ရှစ်ဟှူ သားတော်အားဖြင့် နို့လေဟှို လတ်ဆောန်ပေးဟှူ ဖောင်းသရေတော်န ပ္လဲ့ဇောင်ဟှူ ကျေးဇူးတော်တွပ် နို့လေဟှာ ဘုရားသခင်ဟှို ချီးမွမ်းဂေ့ဇို့။ 7 [d]ဘုရားသခင်ရဲ့ ကျေးဇူးတော်ဟှာ ကြွယ်ဝဟှူကြောန့် နို့လေဟှာ ခရစ်တော်ရဲ့ သွီးတော်အားဖြင့်[e] ဝီးကော့‑က်ရှင်းဖြစ်ဟှူ လွန်ကျူးဟှူပြစ်လေ ခွမ့်လွှတ်ရှင်းကျေးဇူးဟှို အယ်သားတော်အားဖြင့် ရရှိဂေ့ဟှယ်။ 8 ဘုရားသခင်ဟှာ အယ်ကျေးဇူးတော်ဟှို နို့လေမာ ကြွယ်ဝပ္လဲ့ဇောင်စေဘီး ဂူလောင်းဟှို သိဟှူ ဉာဏ်ပညာနရော၊ သိပညာလေနရော၊

9 သူ့ရဲ့ရည်ရွယ်ချစ်တိုင်း လောက်လိုက်ဟှယ်။ ခရစ်တော်ကြောန့် နတ်နဲဟှူ ကြံစည်လေဟှို နို့လေဟှို သိစေဟှယ်။ 10 အယ်မျိုးကြံစည်လေဟှာ ခီက္လလာဟှူ ခီမာ ကောန်းဂန်ဘောင်မာရှိဟှူ ဇာလေရော၊ မ္လေဂီးထတ်မာရှိဟှူ ဇာလေရော ဂူလောင်းဟှို ခရစ်တော်အော့‑က်မာ ပေါန်းစည်းဟှို့တွပ် စီမံဘီးဟှာ ခွဲခန့်ဟှားဇာ ဖြစ်ဟှယ်။

11 ရှိမျှဂူလောင်းဟှို ဘုရားသခင်ရဲ့ ကြံစည်န ဆောင်းဖြတ်ဟှားတိုင်း ဖြစ်လာရဟှယ်။ ဘုရားသခင်ဟှာ သူ့ရဲ့လိုတော်ကြောန့် ရှေးရှေးဒူးဟှနေ စီရင်ဘီး ဆောင်းဖြတ်ဟှားဟှူတိုင်း နို့လေဟှို ခရစ်တော်န တလောင်းတဝဒဲ ဖြစ်စေဘီးဟှာ သူ့ရဲ့ လူမျိုးတော်ဖြစ်န ဝီးကော့‑က်ဟှားဇာ ဖြစ်ဟှယ်။ 12 အယ်ကြောန့် ခရစ်တော်ဟှို ဦးဆောင်းပထမ မျှော်လင့်ဟှူနို့လေဟှာ ဘုရားသခင်ရဲ့ ဖောင်းသရေတော်ဟှို ချီးမွမ်းဂေ့ဇို့။

13 နန်းနို့လေဟှာ ကယ်တန်ရှင်းနဆိုင်ဟှူ ဒန်းကောန်းဖြစ်ဟှူ သမ္မာတရားဟှို ကြားရဟှူ ခီမာ ဘုရားသခင်ရဲ့ လူမျိုးလေ ဖြစ်လာဂေ့ဟှယ်။ နန်းနို့ဟှာ ခရစ်တော်ဟှို ယောင်ကြည်ဘီး ဘုရားသခင်ဟှာ သူ့ရဲ့ ဂဒိထားဟှားတိုင်း သန့်ရှင်းဟှူဝိညာဉ်တော်ဟှို ပေးဇာအားဖြင့် နန်းနို့ဟှို သူပိုင်ဟှူကြောန့် ဇိခတ်ဇာဟှို ခံရဂေ့ဟှယ်။ 14 ဝိညာဉ်တော်ဟှာ ဘုရားသခင်ရဲ့ လူမျိုးတော်ဟှို ဂဒိထားဟှားတိုင်း နို့လေဟှား ခံစားရမယ်ဖြစ်ကြောန်း အာမခံချစ်ဖြစ်ဟှယ်။ အယ်ကြောန့် ဘုရားသခင်ဟှာ သူပိုင်ဟှူလူလေဟှို လွတ်မြော့‑က်စေမယ် ဖြစ်ဟှူကြောန့် နို့လေဟှာ ယောင်ကြည်စိခ္လနိုင်ဟှယ်။ နို့လေဟှာ ကိုယ်တော်ရဲ့ ဖောင်းသရေတော်ဟှို ချီးမွမ်းဂေ့ဇို့။

ပေါလု ဆုတောန်းကြောန်း

15 အယ်ကြောန့် နန်းနို့ဟှာ သခင်ယေရှုဟှို ယောင်ကြည်ဘီး သန့်ရှင်းသူလေဟှို ရှစ်ဟှူကြောန်းဟှို ကြားရဟှူခီဟှစဘီး၊ 16 ငါဟှာ နန်းနို့ကြောန့်မြဲဒမ်း ကျေးဇူးတော်ဟှို ချီးမွမ်ဟှယ်။ နန်းနို့တွပ်လည်း ဆုတောန်းပေးနေဟှယ်။ 17 နို့လေရဲ့ သခင်ယေရှုခရစ်တော်ရဲ့ ဘုရားသခင်ဖြစ်ဟှူ ဖောင်းသရေတော်န ပ္လဲ့ဇောင်ဟှူဖဟှာ သူ့ဟှိုသိဟှို့တွပ် ဉာဏ်ပညာဟှို ပေးဘီး ဗျာဒိတ်တော်နဆိုင်ဟှူ ဝိညာဉ်ဟှို နန်းနို့ဟှို ပေးဟှို့ကြောန်းန၊ 18 ဘုရားသခင်ဟှာ နန်းနို့ရဲ့ စိနှလောင်းမျစ်စိဟှို ဖွမ့်ဟှို့တွပ်န ခေါ်ဟှားဟှူဇာနဆိုင်ဟှူ မျှော်လင့်ဇာဟှာ ဖယ်မျိုးဇာဖြစ်ဟှယ် ဆိုဇာရော၊ သန့်ရှင်းဟှူသူလေဟှ ခံရဟှူမွီဟှာ ဖောင်းသရေတော်န ဖယ်မျှလော့‑က် ကြွယ်ဝဟှူဇာရော၊ 19 ကိုယ်တော်ရဲ့ စွမ်းသတ္တိန ပ္လဲ့ဇောင်ဟှူ တဂိုးရှီဝါရဲ့ လောက်ဆောန်ဇာအားဖြင့် ယောင်ကြည်ဟှူ နို့လေထတ်ဟှို ရော့‑က်လာဟှူတဂိုးဟှာ ဖယ်မျှလော့‑က်ထူးခြားဘီး ရရာတိုင်း ကီးဟှယ် ဆိုဇာဟှိုရော နန်းနို့လေဟှာ သိဟှို့တွပ် ငါဆုတောန်းဟှယ်။ 20 ခရစ်တော်ဟှို သေရာဟှနေ ပ္လန်ရှင်စေဘီး ကောန်းဂန်ဘောင်မာ သူ့ရဲ့ ညာဖတ်မာ ထိုင်နေဟှူခီဒူးဟှ ဘုရားသခင်ဟှ သောင်းပြုလိုက်ဟှူ တဂိုးတော်ဘဲ့ ဖြစ်ဟှယ်။ 21 အယ်ကောန်းဂန်ဘောင်မာ ခရစ်တော်ဟှာ ကောန်းဂန်လောကဟှို အောက်စိုးဟှူသူလေ၊ အာဏာပိုင်လေ၊ တဂိုးလေန သခင်ဂူလောင်းရဲ့ ဘွဲ့နာမလေထတ်မာ အောက်စိုးဘီး ကိုယ်တော်ရဲ့ နာမတော်ဟှာ ဗြင်နေရဟှူလောကန နာဂတ်လောကမာ ခေါ်နေဟှူဘွဲ့နာမ ဂူလောင်းထတ် ကီးမြတ်ဟှယ်။ 22 [f]ဘုရားသခင်ဟှာ ရှိမျှဂူလောင်းဟှိုလည်း ခရစ်တော်ရဲ့ ခေဖွားအော့‑က်မာ ခ္လဟှားဘီးဟှာ ကိုယ်တော့်ဟှို ရှိမျှဂူလောင်းရဲ့ထတ်မာ ဦးခေါန်းဖြစ်စေဘီး သင်းတော်ဟှို ပေးဟှယ်။ 23 အယ်သင်းတော်ဟှာ ရှိမျှဂူလောင်းဟှို ပ္လဲ့ဝစောင်လင်စေဟှူ ခရစ်တော်ရဲ့ ကိုယ်ခန္ဓာ ဖြစ်ဟှယ်။[g]

ဧဖက် 2 ->