1 ငါးရစ်ကြာဘီးန ယဇ်ပုရောဟိတ်မန်း အာနနိဟှာ သတ်ဂီးဝါဂီးတချို့န တေရတုလု နာမယ်ရှိဟှူ ရှေ့နေနတူးဒူ ကဲသရိဗြို့ဟှို ရော့‑က်လာဟှယ်။ အယ်လူလေဟှာ ဗြို့ဝန်မန်းဖေလဇ်ရှေ့ဟှို ဝမ်ဘီးဟှာ ပေါလုဟှို တရားစွဲဂေ့ဟှယ်။ 2 ဗြို့ဝန်မန်းဟှာ ပေါလုဟှို ရှေ့ဟှို ခေါ်ဟှူ ခီမာ ရှေ့နေ တေရတုလုဟှ၊

“ဗြို့ဝန်မန်းဖေလဇ်! သခင်ရဲ့ ကီးမြတ်ရှင်းကြောန့် ကျွန်တော့်လေဟှာ ရရာတိုင်း ငြီးငြီးချမ်းချမ်းန နေရဂေ့ဟှယ်။ သခင်ဟှာ ကျွန်တော့်လေရဲ့ တိုင်းပြည်န လူမျိုးလေတွပ် လိုအပ်ဟှူ ပြုပြင်ပ္လောန်းလဲဇာလေဟှို ဘောင်ဂီးလောက်ပေးနေဟှယ်။”

3 “မြတ်ဟှူဖေလဇ်၊ ကျွန်တော့်လေဟှာ အယ်မူဇာဟှို နေရာတိုင်းမာ ရရာတိုင်း ကျေးဇူးတန်ဘီးဟှာ ကြိုဆိုဂေ့ဟှယ်။ 4 ကျွန်တော့်ဟှာ သခင်ရဲ့ ခီဟှို ဘောင်ဂီးယူရှင်ဘဲကြောန့် ကျဉ်းချောက်နဘဲ့ လျှော့‑က်ဟှားဇာဟှို ကြင်နာဟှူစိန နားထောန်ပေးဟှို့ တောန်းဗန်ဟှယ်။ 5 အယ်လူဟှာ ပြဿနာကောန်ဖြစ်ဘီး ကမ္ဘာတဝန်းလောင်းမာရှိဟှူ ယုဒလူလေဟှို ဆူပူအောင်ကြွမှု ဖြစ်အောန် နှိုးဆော်ပေးနေဟှယ်။ အယ်ဘီးဟှာ သူဟှာ နာဇရက်ဂိုဏ်းရဲ့ ခေါန်းဆောန် တယော့‑က်လည်း ဖြစ်ဟှယ် ဆိုဇာဟှို ကျွန်တော့်လေ တွိရဟှယ်။ 6 ဗိမာန်တော်ဟှိုလည်း ညစ်ညူးအောန်လောက်ဟှို့ ကြိုးစားဟှယ်။ အယ်ကြောန့် သူ့ဟှို ကျွန်တော့်လေဟှာ ဖမ်းဘီးဟှယ်။ 7 [a] 8 သခင်ဟှာ အယ်လူဟှို စစ်ဆေးမယ် ဆိုဟှာ သူ့ဟှို ကျွန်တော့်လေဟှ စွပ်စွဲနေဟှူဇာလေ ဂူလောင်းဟှို သခင်ကိုယ်တိုင် သိရလေ့မယ်” ဆိုဘီး လျှော့‑က်ဟှယ်။ 9 ယုဒလူလေဟှလည်း အယ်စွပ်စွဲချစ်ဟှာ မှန်ဟှယ် ဆိုဘီး ပေါလုဟှို ဝိုင်းဘီးဟှာ ပြောဂေ့ဟှယ်။

10 ဗြို့ဝန်မန်းဟှာ ပေါလုဟှို ပြောဟှို့တွပ် လတ်ပြလိုက်ဟှူ ခီမာ ပေါလုဟှ

“သခင်ဟှာ အယ်လူမျိုးဟှို နှစ်ကြာဂီး တရားစီရင်သူ ဖြစ်ဟှယ် ဆိုဇာဟှို ကျွန်တော်သိဟှယ်။ သခင့်ရှေ့မာ ကျွန်တော်ကိုယ်တိုင် ချေပခွမ့်ရဟှူကြောန့် ဝန်းသာဟှယ်။ 11 ကျွန်တော်ဟှာ ဘုရားသခင်ဟှို ဝတ်ပြုကိုးကွယ်ဟှို့တွပ် ယေရုရှလင်ဗြို့ဟှို သွားဟှူဇာ ဆယ်နှေ့ရစ်လော့‑က်ဘဲ့ ကြာသေးဟှယ် ဆိုဇာဟှို ကိုယ်တော်ကိုယ်တိုင် စောင်ဇမ်းသိနိုင်ဟှယ်။ 12 ကျွန်တော်ဟှာ ဗိမာန်တော်မာ တယော့‑က်ယော့က်န ငြင်းခူဘီး ဝါလယ်ဇရပ်မာဘဲ့ဖြစ်ဖြစ်၊ ဗြို့ထဲမာဘဲ့ဖြစ်ဖြစ် လူလေဟှို ဆူပူအောင်ကြွအောန် လောက်နေဟှယ် ဆိုဇာဟှို ယုဒလူလေဟှာ တွိရဂေ့ဟှ။ 13 ခု ကျွန်တော်ဟှို စွပ်စွဲနေဂေ့ဟှူ ဇာလေဟှိုလည်း သူးနို့ဟှာ သခင့်ရှေ့မာ သတ်သေပြနိုင်ဂေ့ဟှ။ 14 အယ်ဘေမဲ့ အယ်လူလေဟှ လွဲမှားဟှယ် ဆိုဘီး ယူဆဟှူ လမ်းစဉ်ရ ကျွန်တော်ဟှာ ဘိုးဘေးလေရဲ့ ဘုရားသခင်ဟှို ကိုးကွယ်ဟှယ် ဆိုဇာဟှို သခင့်နားမာ ဝန်ခံဟှယ်။ အယ်ဘေမဲ့ ကျွန်တော်ဟှာ မောရှေရဲ့ ပညတ်ကျမ်းန ပရောဖက်ကျမ်းလေမာ ပါဟှူဇာ ဂူလောင်းဟှို ယောင်ကြည်ဟှယ်။ 15 သူးနို့ ကိုယ်တိုင်လည်း ဘုရားသခင်ဟှို မျှော်လင့်ဟှူမျိုးဘဲ့ လူဆိုး၊ လူကောန်းဝီးဘဲန လူလေ ဂူလောင်းဟှာ သေရာဟှနေ ထမြော့‑က်ဂေ့လေ့မယ် ဆိုဇာဟှို ကျွန်တော်ဟှာ မျှော်လင့်ဟှူလူ ဖြစ်ဟှယ်။ 16 အယ်ကြောန့် ကျွန်တော့်ဟှာ ဘုရားသခင်ရှေ့၊ လူလေရှေ့မာ ပြစ်တန်ဇာမှေ့ဘဲဟှို့ သိစိမြဲဒမ်းရှိဟှို့တွပ် ကောန်းဆောင်း လောက်ဆောန်ဟှယ်။

17 [b] “ကျွန်တော်ဟှာ ယေရုရှလင်ဗြို့ဟှ ထွပ်ဘီး နှစ်ပေါန်းဘောင်ဂီး ကြာဘီးန ကိုယ့်လူမျိုးလေဟှို ပေးကမ်းစွန့်ကြဲဟှို့တွပ်န ဘုရားသခင်ဟှို ပူဇော်ဆစ်သဟှို့တွပ် ရော့‑က်လာဟှယ်။ 18 ဗိမာန်တော်ထဲမာ ကျွန်တော့်ဟှာ စင်ကြယ်ရှင်းဟှို လောက်ဘီးန ပူဇော်သကာ ဆစ်သနေဒူးမာ အယ်လူလေဟှာ ကျွန်တော့်ဟှို တွိဟှားဂေ့ဟှယ်။ အယ်နေရာမာ လူအောက်ဂီးလည်း ကျွန်တော်နတူးဒူ မှေ့ဟှ။ ရောင်းရင်းဆန်ခတ်လည်း ဖြစ်ဂေ့ဟှ။ 19 အယ်ဘေမဲ့ အယ်နေရာမာ အာရှိပြည်ဟှ ယုဒလူတချို့ရှိဟှယ်။ ကျွန်တော့်ဟှို စွပ်စွဲမယ် ဆိုဟှာ သခင်ရှေ့မာ သူးနို့ကိုယ်တိုင် လာဘီး စွပ်စွဲသင့်ဟှယ်။ 20 အယ်မျိုးမှုဘဲနေဟှာ အယ်မူရှိနေဟှူ လူလေဟှ သခင်ရှေ့မာ ကျွန်တော် ကျူးလွန်ဟှူပြစ်လေဟှို ဖော်ပြဘီး စွပ်စွဲသင့်ဟှယ်။ 21 [c]ကျွန်တော်ဟှာ တရားလွှတ်တော်ရှေ့မာ ရပ်ဘီး ‘သေဟှားလူလေဟှာ ရှင်ပ္လန်ထမြော့‑က်လေ့မယ် ဆိုဇာဟှို ယောင်ကြည်ဟှူကြောန့် အယ်နေ့ နန်းနို့ရှေ့မာ ကျွန်တော်ဟှာ စစ်ဆေးခံနေရဟှယ်’ ဆိုဘီး စကားတခွန်းဟှိုဘဲ့ ကြွေးကြော်ဟှယ်” ဆိုဘီး ပြောလေဟှယ်။

22 ဖေလဇ်မန်းဟှာ အယ်လမ်းစဉ်ကြောန်းဟှို ကောန်းကောန်းဟှား သိဟှူလူ ဖြစ်ဟှူကြောန့် မှုစစ်ဆေးဇာဟှို အယ်ခီမာ ရွှေ့ဆိုင်းလိုက်ဟှယ်။ သူဟှ “တပ်မှူးလုသိ ရော့‑က်လာဟှူ ခီမာ အယ်မှုဟှို ငါဟှာ စီရင်ချစ်ခ္လမယ်” ဆိုဘီး သူးနို့ဟှို ပြောဟှယ်။ 23 ပေါလုဟှို စောန့်လေန ထားဟှားဟှို့န လွတ်လပ်မှုဟှို နဲနဲပေးဘီး သူ့မိဆွေလေရဲ့ ပြုစုဇာဟှို ခွမ့်ပြုဟှို့ တပ်မှူးဟှို မိန့်ပေးဟှားဟှယ်။

24 ရစ်နဲနဲကြာဘီးန ဖေလဇ်မန်းဟှာ သူ့မယား ဒြုသိလေနတူးဒူ ရော့‑က်လာဟှယ်။ ဒြုသိလေဟှ ယုဒလူမျိုးဖြစ်ဟှယ်။ ဖေလဇ်မန်းဟှာ ပေါလုဟှို ခေါ်ခိုင်းဘီးဟှာ ယေရှုခရစ်တော်ဟှို ယောင်ကြည်ရှင်းန ဆိုင်ဟှူကြောန်းဟှို ပေါလုနားဟှနေ ကြားနာလေဟှယ်။ 25 ပေါလုဟှာ ဖြောန့်မတ်ရှင်း၊ ကာမဂေါင်ချောက်တီးရှင်းန ရော့‑က်လာမယ့် တရားစီရင်ရှင်း ကြောန်းလေဟှို ပြောဟှူ ခီမာ ဖေလဇ်မန်းဟှာ ကြော့‑က်လန့်ဘီး “ခု နန်သွားနိုင်ဘီ။ နော့‑က်ခွမ့်ကြောင်ဟှူ ခီမာ နန့်ဟှို ငါပ္လန်ခေါ်မယ်” ဆိုဘီး ပြောဟှယ်။ 26 အယ်ခီမာဘဲ့ ပေါလုဟှ သူ့ဟှို ကပ်ပေးမယ် ဆိုဘီး မျှော်လင့်နေဟှူကြောန့် သူဟှာ ပေါလုဟှို မကြာမကြာခေါ်ဘီးဟှာ စကားပြောဟှယ်။

27 နှေ့နှစ်လော့‑က်ကြာဘီးန ဖေလဇ်မန်းရဲ့ ဗြို့ဝန်မန်းရာထူးဟှို ပေါကိဖေတ္တုဟှ ဆစ်ခံဟှယ်။ ဖေလဇ်မန်းဟှာ ယုဒလူလေဟှို ကျေးဇူးပြုရှင်ဟှူကြောန့် ပေါလုဟှို ထောန်ခ္လဟှားရစ်ဟှယ်။

<- တမန်တော် 23တမန်တော် 25 ->