Luke 15

Faalaalii é ʋilɛ baalagi ʋa nii toai ya,
é ɠa ʋolu

(Matiyo 18:12-14)

1 Mulu zo nuiti ta kotoba nuiti ti ɠɛni maaɓuɠazu ba ga ti goomɛni. 2 Faliziɛinti ta tɔ kalamɔinti ti ɠɛni unsuyelii losu, ti ɗa ɠɛ ma: «Zunui nii ɠa yeezeizu kotoba nuiti bu, ti ɗa daamii wo ta naati.»

3 Kɛlɛ Yesu niima vaalaalii woni ti ma, é ɠɛ ma: 4 «Wo zaama zunui ɓɛ ɠa, ni baala ungila (100) ka ɠɛ zea, gila ge loo ya, ni é la puutaaʋuugɔ maazu taaʋuugɔiti (99) zɛga daami wosuʋɛ, é ʋa li zɔ ɠilagi ɠaiziɛzu, nii toai ya, eyɛsu é ka? 5 Siɛgi zu é kaazu la, toɠa pɛɛ ɠɔma ga koozunɛɛi. 6 A ɠalena ma pɛlɛi wu, toɠa ɗa bɔɔlaiti ta seiɲɔɠɔiti toli pɔ bɛ, é ɠɛ ti ma: ‹Ade ɠoozunɛ ʋɔɔma, mazɔlɔɔ gè nà-baalagi ɠaa ʋolu, nii é ɠɛa looni ya.› 7 Gè bo wo ma, ʋele nɔ ɠana koozunɛɛi ɠa ɠɛ la geeɠɔlɔgi zu, kotoba nu ɠila kpegi naa faa zu, nii é siɛ ʋelei maavalibosu, é leʋe telebo nu ʋuutaaʋuugɔ maazu taaʋuugɔiti (99) ba, niiti ti ɓɛdɛ la ba ga ti ti-ziɛ ʋelei maavalibo.»

Faalaalii é ʋilɛ wali ɠaei ʋa nii toai ya,
é ɠa ʋolu

8 «Ɓaa ni wali ɠae puugɔ a ɠɛna anzanui ɠila zea, gila ge loo ya, é la lanboi ɠaazoga, é ʋa pɛlɛi wu ɓale ɓaa, eyɛsu é ka? 9 Siɛgi zu é kaazu la, toɠa bɔɔlaiti ta seiɲɔɠɔiti toli, é ɠɛ ti ma: ‹Ade ɠoozunɛ ʋɔɔma, tɔɔzei gè nà-wali ɠaei ɠaa ʋolu, nii é ɠɛa looni ya.› 10 Gè bo wo ma, ʋele nɔ ɠana, koozunɛɛi ɠa ɠɛ la GALA ná-geezuɠeelaiti gaazu, kotoba nu ɠila kpegi naa faa zu, nii é siɛ ʋelei maavalibosu.»

Faalaalii é ʋilɛ zunu loungoi ʋa nii toai ya,
é ɠale ma

11 Yesu ɠɛni ma mɔnɔ: «Doun zunu felegɔ ɠɛni zunu ɠila zea. 12 Loungo gelei ɠɛni kɛɛɠɛ ma: ‹Nɔ̀nɔi veena poganii zu.› Doun kɛɛɠɛi ɗa kɔligiti gaaɠwɛ su ná-doun zunu felegɔiti ba.

13 «Folo mɔinɗa la vɔlɔ leʋeni, loungoi nɔnɔiti pɛ gaalɛɛni ba, é li zou ɠili su, ɠoozama, ʋɛ é ná-naavoloiti pɛ gaaʋalani ba ná, ziimaɠɛɛ wolai zu. 14 Kpegai ma ga ti pɛ dɔ, pulu wolai looni naama yooi zu, anii pɛ ge tɔɔzeini ga ʋalaga zea. 15 É liini, é ɓɔɠɔ ɠaliva zooi naa zu nui gila ma, naa teʋe ná-boigiti makɛsuʋɛ dɔɓɔi zu. 16 Wɔin ɠɛni ma ga é ɠogi laave ga boigiti kɔnɔgi, kɛlɛ nu nɔpɛ ge la ɠɛni ani nɔpɛ feezu zea.

17 «É tɔɔzeini ga ɠisiaa, é ɠɛ ɓɔɠɔ ma: ‹Botiɠɛ nui mɔinʋɛ kɛ̀ɛ ya, ti daamii wosu mɔtai yɛ, nɔ̀un, gè ʋɛ, gè ɗa za ga pului. 18 Nà wuzeɠezu, gè li kɛ̀ɛ ʋɔ bɛ, gè ɠɛ ma: Kɛ̀ɛ, gè kotoi ɠɛa GALA daalɔɠɔma, é ʋɛɛ è ʋa. 19 Màa la mɔ nɛɛni, gè ʋa loli ga è-loun zunu. Ʋelei è ɗa-wotiɠɛ nuiti sosu da, sò ɠana.› 20 É wuzeɠeni, é li kɛɛɠɛ ʋɔ bɛ.

«É yɛni poun, kɛɛɠɛ kaa, maawɔin naa zo, é ɓizɛ, é li, é daaɠomi, é nɛɛnɛ. 21 Doun zunui ɠɛni ma: ‹Kɛ̀ɛ, gè kotoi ɠɛa GALA daalɔɠɔma, é ʋɛɛ è ʋa. Màa la mɔ nɛɛni, gè ʋa loli ga è-loun zunu.› 22 Kɛlɛ doun kɛɛɠɛi ɠɛni ná-botiɠɛ nuiti ma: ‹À ʋa fala ga ɗobo papagi, wo too kɔba, wo balaɠaegi lɔ zeeɓeɠai ʋa, wo saʋalagi lɔ kɔɠɔa. 23 À ʋa ga nikɛ yiʋoi nii gulɔai, wo paa, ade daamii wo, de koozunɛɛi ɠula. 24 Tɔɔzei wɛlɛ dòun zunui ʋa, é ɠɛa zaani, é wuzeɠea, é ɠula saai ya, é ɠɛa looni ya, é ɠaa ʋolu.› Ti tɔɔzeini ga koozunɛɛi ɠulaa.

25 «Tama doun zunu mɔungi ɠɛni kpalagaʋɛ. Siɛgi zu é ʋaa la, é maaɓuɠa pɛlɛi ʋa, é gɛingɛin ganigiti ta kua wo tugi mɛnini. 26 É botiɠɛ nui gila tolini, é gaazaɠa ga nii kɛai, naa bo ma. 27 Naa ɠɛni ma: ‹È-leɠei ɠa galegai ma, é ʋa, tɛi tama kɛdɛgai ʋa, è-ɠɛɛ nikɛ yiʋoi ʋaaʋɛ, nii gulɔai.› 28 É yiiɠaawanani, é ɠɛlɛ tɛɛ vai ʋa pɛlɛi wu. Kɛɛɠɛ ɠulani tolisu ga é lɛ. 29 Kɛlɛ é kɛɛɠɛ wooɠaaʋoteni, é ɠɛ ma: ‹Kona mɔinmɔin ka gè ɗa botii ɠɛ è ʋɛ, kaipa gè la dɛ ɗa-levei gila kpalaa koloɠoloni, tama kaipa è la dɛ ɓalaa boli yiʋo veeni zèa, gi ʋa koozunɛɛi ɠula gá bɔ̀ɔlaiti. 30 Kɛlɛ tɛi è-loin ɠalega ma, é ʋa, nii é è-ɠɔligiti pɛ suɠoloɠologai koloɠolo anzanuiti polu, tɔ ɠa è nikɛ yiʋoi ʋaazu bɛ, nii gulɔai!› 31 Kɛɛɠɛ ɠɛni ma: ‹Dòun, ɗɔun ɗa bà yeenɔpɛ, tama nii kpein é zèa, ɗa ɠa ɗɔnɔ ga ti pɛ. 32 Kɛlɛ kɛni ada la ɠoozunɛ, de fɛtii ɠula, tɔɔzei wɛlɛ è-leɠei ʋa, é ɠɛa zaani, é wuzeɠea, é ɠula saai ya, é ɠɛa looni ya, é ɠaa ʋolu.› »

<- Luke 14 Luke 16 ->