Luke 13

Nu ziɛ ʋelei maavalibo

1 Naama ziɛgi zu, nui tanigaa ti ʋaani, ti Galilé nuiti ta-vai zuɠula Yesu ma, niiti Pilate ti ʋaani, ti ɠɛai ma ta-zalaɠai ɠulazu. 2 É ti wooɠaaʋoteni, é ɠɛ ma: «Wa ɠisiɛzu ga Galilé nui naati ti ɠɛni ga kotoba nu, é leʋe Galilé nui zɔiti pɛ ba, naa ɠa é kɛa ti nuuma ɓɔlɔi zɔlɔɔgai ɓaa? 3 Ɓa-o, gè bo wo ma, ni wo la wo-ziɛ ʋelei maavaliboni, wo pɛ wo undaa ɠa ʋilisu ga ti ɠɛʋele. 4 Nu puugɔ maazu lɔsaʋai (18), niiti Silowe ʋɛlɛ gaaɠoozagi looni ti ma, é ti ʋa, wa ɠisiɛzu ga ti ɠɛni ga sɔba nu, é leʋe Zeluzalɛme nuɓusɛi mɔtaiti pɛ ba ɓaa? 5 Ɓa-o, gè bo wo ma, ni wo la wo-ziɛ ʋelei maavaliboni, wo pɛ wo undaa ɠa ʋilisu ga ti ɠɛʋele.»

Faalaalii é ʋilɛ
kooleɠoole gului ʋa

6 É niima vaalaalii ɓalaa boni, é ɠɛ ma: «Zunui ta kooleɠoole gulu ɠila siinni ná-leezɛn ɓelei zu. É ʋaani ga é ma waai ta ɠula, kɛlɛ é la tanɔpɛ kaani. 7 É ɠɛni kpele makɛ nui ma naazu: ‹Wɛlɛ, é ɠɛa ga kona saʋagɔ, gè ɗa ʋa kooleɠoole gului nii ma waai ʋolu, nà ma, gè la ani ɠaazu ga. Pɔ mu, lee vaa zu a zooi maazeɠe nɔ fuun?› 8 Kɛlɛ kpele makɛ nui ɠɛni ma: ‹Kalamɔn, zɛ ná ɲɔmɔ ɠona gilagi, nà zeɠei leʋezu, gè kaku ma, gè kpoɠa pɔlɔi ʋu su. 9 Tanisu toɠa waa ʋelela ʋelei, ni naa la ɠɛɛni, ɗa pɔ niina.› »

Yesu seeɓɛ anzanui ɠɛdɛ fai
dooɠo foloi

10 Dooɠo foloi ta, Yesu ɠɛni kalagi wosu GALA dɛbi ʋɛlɛi gila bu. 11 Anzanui ɠila ge ɠɛni ná, nii zɛnvu ɲɔi ta ɠɛni su, naa seeɓɛi ʋilini ma, é kɛɛni su ga kona puugɔ maazu lɔsaʋa (18). Kpiligai, é la ɠɛni zoosu é ʋa ɠaalɔ pɛ. 12 Yesu kaai ma, é ɓɔɛni pɔ, é ɠɛ ma: «Anzanui, é viega ɗa-zeeɓɛi zu.» 13 Naa ʋoluma é yeeiti daani ma. Gaamago nɔ, naa ɠaalɔni, é zɔle, é ɗa lɛbiyai ve GALA bɛ.

14 Kɛlɛ GALA dɛbi ʋɛlɛi ma ɠundiɠii yiiɠaawanani, tɔɔzei Yesu kɛdɛgi woni dooɠo foloi. É ɠɛni bɛbɛi ma: «Botiɠɛ voloi ɠa lɔzita. À ɗa ʋa wo ɠɛdɛ fai ma naama voloi gila su, kɛlɛ dooɠo foloi laade.» 15 Maliɠii gooɠaaʋoteni, é ɠɛ ma: «Woovele nuiti! Wo ɠilagilagi, dooɠo foloi, wo la ɗa ga wa-nikɛiti ɓaa wa-zoovalegiti fiega ta-laami aniɲakai ʋa, wo ʋa li ga tiye kpɔɔle wosuʋɛ ɓaa? 16 Anzanui tɛi ma, Abalaame mavofodai, nii Setana ɠɛa gilini kona puugɔ maazu lɔsaʋa (18) laawu, é la vizɔni ɓaa ga é vie dooɠo foloi?» 17 Naama wooɠaaʋotegi unfegi yeini ga sili nuiti pɛ. Kɛlɛ bɛbɛi wola ɠoozunɛɛni, tɔɔzei faa ʋapa golaiti ba, é ɠɛni kɛɛzu.

Faalaalii é ʋilɛ
mutaalede kaei ta lɛʋɛi ʋa

(Matiyo 13:31-33;
Maleke 4:30-32)

18 Yesu ɠɛni ma: «GALA ná-masadai ɠulaʋɛ ga ɓɛgele? Nà pokɔɠɔsu ɓɛgele ma? 19 Kulaʋɛ ga mutaalede kae ɠilagi, nii zunui ta seɠeni, é sin ná-kpelei zu. É ʋɔnɔni, é ɠɛ ga gulu, wɔniiti ti ɗa laɠagi lo ma ɓekegiti su.»

20 Yesu ɠɛni ti ma mɔnɔ: «Nà GALA ná-masadai ʋokɔɠɔsu ɓɛgele ma? 21 Kulaʋɛ ga lɛʋɛi, nii anzanui ta seɠeni, é ti ɠaayɔ ta ɓulu vukɔ mɔinmɔingi. Gaaɓelagi, ɓulu vukɔ ɠaayɔgai naa pɛ ge ɓokoloni.»

À lɛ ga daa lɔizu ʋelei

(Matiyo 7:13-14, 21-23)

22 Yesu ɠɛni leʋesu taa wolaiti ta taa goiti su, é ɗa kalagi wo, é ɗa li ga Zeluzalɛme ʋele. 23 Nui ta ɠɛni ma: «Màliɠii, nui tago nɔ ɠa é ɠizosu ɓaa?» É ti wooɠaaʋoteni, é ɠɛ ti ma: 24 «À ɠaaɓa, wo lɛ ga daa lɔizu ʋelei, tɔɔzei gè bo wo ma, nu mɔinmɔin ka kɔɠɔ ga ti lɛ, kɛlɛ ti la zooga. 25 Siɛgi zu pɛlɛ kɛɛɠɛi wuzeɠezu la, é pɛlɛi laaɠulu, wo yɛ eteaʋɛ, wo tɔɔzei niina ga daaloɠaa, wo ɗa ɠɛ ma: ‹Màliɠii, pɛlɛi laalao gi ʋɛ.› Toɠa wo wooɠaaʋote naazu ga: ‹Gè la wo zeɠezu ɠwɛɛ.› 26 Naama ziɛgi zu, wa ʋaazu ɠɛɛzu ma: ‹Kɛbɛ tama ade ɠɛni daamii ta kpɔɔlei wosu ʋɔɔma, è ɠɛni kalagi wosu gá-ɠoi yɔɠɔzuʋɛti.› 27 Toɠa ɠɛ wo ma: ‹Gè bo wo ma, gè la wo zeɠezu ɠwɛɛ. À maaɠooza bà, wɔi pɛ wo ga telebotala nuiti.›

28 «Miná ɠa gɔlɔi ta ɲiiga ziɛgai ɠa ɠɛ ná, siɛgi zu wo Abalaame, Izaake, ta Zakɔɓe ta GALA goo wo nuiti pɛ kaazu la GALA ná-masadai zu, wa ma, wo ʋiligai ya etea ʋelei. 29 Nuiti ta zeɠe folo ɠulazu ʋelei ta folo liizu ʋelei, é ɓɔ nu ɠɔʋɛzu ʋelei ta nu yeezazu ʋelei ʋa, ti ʋa, ti zei fɛti laamii wo taɓalii ɠakala GALA ná-masadai zu. 30 Naazu nu ɠaaɓelagi tanigaa ta ɠɛ ga ma mɔungiti, ma mɔungi tanigaa ti ɠɛ ga ma ɠaaɓelagiti.»

Yesu ɠɔlɔ vai Zeluzalɛme ná-faa zu

(Matiyo 23:37-39)

31 Naama yeeɠɛɠalai zu, Faliziɛin tanigaa ti maaɓuɠani Yesu ʋa, ti ɠɛ ma: «Zeɠe ʋɛ, è li ada ɠili, tɔɔzei Elɔde ɠa pɔ ga é è ʋa.» 32 Kɛlɛ Yesu ti wooɠaaʋoteni, é ɠɛ ti ma: «À li, wo ɠɛ zazago zuwuzui naa ma: Nà inɛgiti kpɛɛzu, nà nuiti kɛdɛsu za ta lina, foloi zaʋasiɛi nà nà-botii ɠaaɓela niina. 33 Kɛlɛ kɛni gè ziɛ za ta lina, naa ʋɛɛ lina ɠa leʋena ʋa, tɔɔzei é la zolooni ga GALA goo wo nu nɔpɛ ge za Zeluzalɛme ʋolu.

34 «Ee, Zeluzalɛme, Zeluzalɛme, ɗɛi ɗa ɗa GALA goo wo nuiti paa, è ɗa yɛ naati sɔɔzu ga kɔtui eyɛsu ti za, niiti GALA ge ti leʋesu è ma! Wɔin wola ɠɛa mà ga gè è zu nuɓusɛiti gaalɛ ba kòbaʋɛ, eɠɛʋelei tɛɛ leei a ɗa ma yiʋoiti gaalɛ la ba koʋegiti bu! Kɛlɛ wo la vaani bu pɛ! 35 Wɛlɛ, wa-ʋɛlɛi wuuɲakai ɠana yɛ. Gè bo wo ma, wo la mɔ ɠaazulaa mà pɛ, eyɛsu voloi wa ɠɛ la ma: ‹Maliɠii tuya loo naama nui ʋɛ, nii é ʋaazu daaseigi zu!›[a]»

<- Luke 12 Luke 14 ->