1 Masagiti ta Aman ti zeelini masa anzai Ɛsetɛɛl ʋɔ bɛ ga ti fɛtii ɠula ta tiye. 2 Foloi velesiɛi naa, ti ɠɛai ma dɔɔi ɓɔlezu, masagi ɠɛni mɔnɔ Ɛsetɛɛl ma: «È ɓɛdɛma vai ɠa ga leeni? Leeni ɠa è pɔ ga é ɠɛ è ʋɛ? Anɛɛ ɓalaa toɠa ɠɛɛzu ga nà-masadai ɠilazuʋɛ pɛ, toɠa ve è ya.»

3 Masa anzai Ɛsetɛɛl masagi wooɠaaʋoteni, é ɠɛ ma: «Ni gè zaala zɔlɔɔga masagi ɠaazu, ta è ɗa-nuɓɔɠɔlai makɛgɛ bɛ̀, soma è gi-yɛnvuiti kizo, gá nà-nuɓusɛiti, naa ɠa gè pɔ, kpɛ̀dɛma vai ɠana gè ɠɛɛzu è kɛ bɛ̀. 4 Mazɔlɔɔ gá nà-nuɓusɛiti gi ʋɔdiʋɛ ga ti gi ɠɔdaaleʋe, ti gi ʋa, ti gi zuwuɠaaleʋe. Ni ti gi ʋɔdini nɔ ga gi ɠɛ ga duɔiti, naazu gè la ɓena faa wo è ma, mazɔlɔɔ naazu gá-maanɔɠɔi la ɠɛa ga faa nii nu a masagi ɓɔlɔ ma vaa zu.»

5 Masagi ɓɔɛni naazu Ɛsetɛɛl ʋɔ, é ɠɛ ma: «Ɓɛ ɠa é naa ɠɛɠala ɠisiɛi wogai? Mini ɠa é ná?» 6 Ɛsetɛɛl gooɠaaʋoteni, é ɠɛ ma: «Gi-ɓɔɛɲɔɠɔi ta gi zili nui ɠa ga Aman nu ɲɔi tɛi.» Dualuagi lɔɔni Aman zu gaamanɔ masagi ta Ɛsetɛɛl ɠaazu. 7 Masagi zeɠeni ga ziiɠaawanai fɛti laamii wosuʋɛ, é li masa pɛlɛi ma ɠoi wolai zu. Aman gaaɠaani ga masagi ɓega ga saa vai leve yiimaʋɛ, é yɛni pɛlɛi wu, é ɗa masagi anzai Ɛsetɛɛl maanɛɛnɛ ga naa zɛnvui ɠizo. 8 Masagi zeɠeai ma kpelei zu, é ɠale ma fɛti laamii wo pɛlɛi wu, é Aman ɠaani laani kpɔkpɔ koozagi zu, ʋɛ masagi anzai Ɛsetɛɛl zakpa maalega ɠɛni de ná. Masagi zɛba é ɓain, é ɠɛ ma: «Nu laali nii ɠa pɔ ga é ʋu ànzai ma gàazu, pɛlɛi nii wu ɓaa?»

Naama wooi ɓeni nɔ ga ɠula masagi la-o, ná-botiɠɛ nuiti ti ʋaa, ti Aman ɠaazuʋɛ ɠili. 9 Ti zaama, zɔi daa ɠɛni ga Ɠaaleɓona, naa ɠɛni masagi ma: «Masagi, gului ɠa ʋɛ nii Aman kpɛtɛai ga Maledosé zɛlɛ ba, zunui nii kpɔɛ wooi ɠɛai ga zaɓui masagi yɛnvui yɛ zea, ma gului ɠa loni Aman ná-pɛlɛlaʋɛ, koozaʋɛ ga mɛtɛlɛ ʋuufele maazu lɔɔlu (25).» Masagi ɠɛni ti ma: «À Aman zɛlɛ gului naa ʋa.» 10 Aman zɛlɛni gului naa ʋa, nii é kpɛtɛni Maledosé laalɔɠɔma. Naa ɠɛai ma, masagi ná-ziiɠaawana ɠaayeini.

<- Ɛsetɛɛl 6Ɛsetɛɛl 8 ->