1 Naama yee ɓidii, masagi la ɠɛni zoosu é ʋa ɲi. É ɠɛni ti ʋa ga sɛʋɛi nii ná-masa zooi zu vaa wɔlɔmaiti sɛʋɛai su, ti ʋaani la, ti kala gaazu. 2 Ti adɛ ta ɠalani, ʋɛ zunu zɛɛɠaga felegɔiti Ɓigitan ta Telɛse ta-vai zɛʋɛai ná, niiti ti ɠɛni masagi ná-pɛlɛlaʋɛ makɛsu, ta ti ɠɛni pɔ ga ti masagi Zɛɛlesɛse ʋa, ta ʋelei Maledosé ta-yaavai ʋoluɠulani la. 3 Masagi gaazaɠagi woni, é ɠɛ ma: «Tosuʋɛ ɓaa unfemai ɓɛgele ɠa é veeni Maledosé ya naazu ga ná-kulanumai?» Ná-botiɠɛ nuiti ti gooɠaaʋoteni, ti ɠɛ ma: «É la ɠɛni kulanuma nɔpɛ sɔlɔɔni.»

4 Masagi ti ɠaazaɠani ʋolu, é ɠɛ ma: «Ɓɛ ɠa é koizuʋɛ?» Tama Aman ʋaani masagi ná-koi wolai zu ga é bo masagi ma ga ti Maledosé zɛlɛ gului ʋa, nii é kpɛtɛni naa ʋɛ. 5 Ná-botiɠɛ nuiti ti ɠɛni ma: «Aman ɠa é loni koi wolai zu.» Masagi ɠɛ ti ma: «À bo ma, é lɛ bu.» 6 Aman lɛɛni pɛlɛi wu, masagi ɠɛ ma: «Nui nii gè pɔ ga gè bɔɔlɔ, kɛʋelei ma ɓɛgele ɠa nà kɛɛ la?» Aman ɠɛni bosu ɠisu ga: «Ɓɛ ɠili ka masagi pɔ ga é bɔɔlɔ, é ɠula nɔ̀un polu?» 7 Aman masagi wooɠaaʋoteni, é ɠɛ ma: «Masagi, ni nui ta ɠa ná, è pɔ è bɔɔlɔ, 8 bo ti ʋa ga ɗa-masa seɠei gila, nii è toai ɠɔba ɓalaa ɠila, ti ʋa ga ɗa-zooi gila, nii è zeiɗai kɔma ɓalaa ɠila, ti masa bɔɔlɔgi lɔ sooi unma. 9 Ti seɠei ta sooi ve ɗa-wotiɠɛ nu wolai gila zea, é seɠei loo zunui naa ɠɔba, nii è pɔ ga é bɔɔlɔ, é naa zei ɗa-zooi ɠɔma, é lo tuɠɔ taa zaamaʋɛ, é ɗa ɠɛ ma: ‹Nui nii masagi pɔ ga é bɔɔlɔ, ʋele ɠa a ɗa kɛɛ la ga ma nu.› »

10 Masagi ɠɛni Aman ma: «Liina fala, è seɠei ta sooi zeɠe, ʋelei è bogai la, è kɛ ɠana Maledosé ʋɛ, Zuifui nii é botii ɠɛɛzu masa pɛlɛi wu. Nii kpein è bogai, mina gila kpalaa da ɠoba.» 11 Aman liini, é seɠei ta sooi zeɠe, é Maledosé maaɠili, é tɛ sooi ɠɔma, é lo naa luɠɔ taa zaamaʋɛ, é ɗa ɠɛ ma: «Nui nii masagi pɔ ga é bɔɔlɔ, ʋele ɠa a ɗa kɛɛ la ga ma nui!»

12 Naa ʋoluma Maledosé ɠaleni ma ná-botii ɠɛɛzuʋɛ masa pɛlɛi laaʋɛ, Aman ɠale ma ga gaazuvilɛi ná-koii zu, é seɠei ʋɛɛni ɠaazu unfegi maaʋele ma. 13 Aman naa kpein suɠulani anzai Zelɛse ma, ta ná-tɛnɛbo nuiti. Naati ti ɠɛni ma: «Maledoséi nii è tɔɔzeiɗai ga è ɗa loo bu kakala, tɛi tama é ga Zuifui ta, è la mɔ ziaa bu faa nɔpɛ su, kɛlɛ ɗa yɛsu loozu bu nɔ niina ɠɔ.»

14 Ti la vɔlɔ ɠɛni ɓeni dɛ ga ɓɔɛ Aman ʋɔ, eyɛsu masagi ná-keelaiti ti ʋa Aman laaɠomisu, ti soni ga gaazuvilɛi, ti lii la fɛti ɠulazuʋɛ nii Ɛsetɛɛl kpɛtɛni.

<- Ɛsetɛɛl 5Ɛsetɛɛl 7 ->