1 Ɓɛlesazaal Ɓaɓilɔne masagi ná-masadai ma ɠona mɔungi zu, Daniyɛle yɛni laani ná-betei zu, é segi ta wo, é kulakɛlɛmaiti ka kigi zu. Naa zeɠeai ma ga, é ná-segi zɛʋɛni. Tɔ ɠa é ga nii. 2 Pelegi é suɠulani la, é ɠɛ ma:

«Kulakɛlɛmaiti su kpidii zu, gè fiilɛi ɠaani, é zeɠe ʋepema naanigɔiti geeɠɔlɔgi wu, é yei ga zeeɠaaɓaai kpoloɗɛ wolai ɠa. 3 Sua wola naanigɔiti ti ɗa ɠula kpoloɗɛi wu, ti ma zii la ɠɛni ɓɔni. 4 Sua mɔungi ɠulani eɠɛ zalai, kɛlɛ koɠɛ ɠoʋegiti ka ti ɠɛni ba. Tɛi gè ɠɛni wɛlɛzu, koʋegiti ti ɠulani ba, buzeɠeni zooi ma, é loni ʋoluzu ɠɔɠɔzapala felegɔiti ga eɠɛ nu vului, nuɓusɛ ɠigi veeni zea. 5 Suai velesiɛi ɠulani eɠɛ filɛ zuai taɠili. Tago wuzeɠea ɠɛni de, sua ɠaka ɠaegi saʋagɔ ɠɛni daaʋɛ ɲiigaiti zɔɠɔzu. Devei veeni zea ga é li, é laami ga sua mɔinmɔin. 6 Gè ɠɛni ba, gè ɗa wɛlɛ, gè suai taɠili kaani, kulaai ga kɔii, wɔni ɠoʋegiti ti ɠɛni ba ga naanigɔ poluʋelei, nɔungi ɠɛ ba ɓalaa ga naanigɔ, zobogi veeni zea ga é masadai ɠɛ. 7 Gè ɠɛni ba, gè ɗa wɛlɛ kulakɛlɛmaiti ba ti ɠɛni ɠulazu bɛ̀ kɛlɛma kpidii. Suai naanisiɛi gè kaani, gola maaluani, maayikini gola, zeeɠaaɓa é leʋe kɛɛzu ʋa. Kɔlu ɲiiga wolaiti ka ti ɠɛni daa. É ɗa ná-ani zogaiti mi, é ɗa ti leʋeleʋe su, é ɗa ɠɔɠɔziɛ naa zu, nii é la ɠɛni miizu. Ma zii ɠɛni yɛ. É la ɠɛni ʋɛɛni sua saʋagɔ mɔungiti ba. Minɛ puugɔ ɠɛni ba. 8 Tɛi gè ɠɛni minɛi naati pɛtɛsu, gè ɗa ɠida ta-vaiti bu, minɛ niinɛi, gola lɔiɗai, é tɔɔzeini ga wuzeɠea zɔiti saama, é minɛ saʋagɔ lɔɔɠula, é ti loo. Sua minɛ niinɛi ɠaazuʋɛti ti ɠɛni ba eɠɛ nu vului, ta daaʋɛ ɠɛni ba, é ɗa waso kpɔɛiti bo.

9 «Gè yɛni wɛlɛzu, masa kpɔkpɔgiti ti ʋilɛ, Kɛwola Wɔlɔi[a] ʋaani, é zei. Seɠe ɠolegi ɠɛni kɔba, koleai eɠɛ kobe kolegi, ta nɔundeɠai ɠoleai eɠɛ baala deɠa ɠole pepegi. Ná-masa kpɔkpɔgi ɠɛni eɠɛ abuzogi, kɔɠɔiti kiliɠiligai eɠɛ wotolo ɠɔɠɔi, ti ɠɛ eɠɛ abu ɠɛzɛi. 10 Abui ɠɛni yeizu eɠɛ ziɛ wola, é ɗa leʋe kakalaʋɛ. Nuɓusɛ waa mɔinmɔin seizu waa mɔinmɔin ge ɠɛni loni kakalaʋɛ, ti ɗa botii ɠɛ bɛ. Tukpɔɠaaleʋe nuiti ti zeini, ti sɛʋɛiti daalao.

11 «Gè yɛni wɛlɛzu naazu, tɔɔzei waso kpɔɛiti ba ma minɛ goi ɠɛni bosu, é ɗa zɔngɔ. Gè yɛni nɔ wɛlɛzu, ti suai naanisiɛi ʋaa. Ti kpusɛi ɠoloɠoloni, ti pili abui zu ga é ɠala. 12 Zɔɔma zuaiti ti ʋalani ta-ɠundiɠilai ma, kɛlɛ é veeni ti ʋɛ ga ti-zii zuɠooza yeeɠɛɠala laawu.

13 «Gè ɠɛni nɔ wɛlɛzu kulakɛlɛmaiti ba niiti ti ɠɛni ɠulazu bɛ̀ kɛlɛma kuai. Nu ná-doun zunui ta ʋaani geeɠɔlɔgi ma lonaɓiingiti maazu. É liini kɛwola wɔlɔi ʋɔ pelei, ti liini la naa ɠakala. 14 Kundiɠilai ta lɛbiyai ta masadaiti ti veeni zea, naa ɠa a kɛ zooiti kpein su nuɓusɛiti, ta ziiti kpein, ta zii woo wo nuiti kpein ti botii ɠɛ bɛ. Ná-kundiɠilai ɠa lɛbi eyɛsu ɠɔ, kpela ge la ɠɛa ba, ta ná-masadai la ɠoloɠologa eyɛsu ɠɔ.»

15 «Nà Daniyɛle, zìi wola ɓɔlɔni kòozu, kulakɛlɛmai naati ti ɗa màalua. 16 Gè maaɓuɠani nui naati gila ba ti ɠɛni loni ná, gè gaazaɠa ga nii gè kaai, é ma ɠaama ɠitei lɛ ga ze. É poluʋɛ lɛɛni ga ze naazu: 17 ‹Naama zua maayikiaiti ta ga etea masada naanigɔiti tɔɔzeizuʋɛ. 18 Ti ʋoluma, GALA é Anii-Pɛ-Unda, naa ná-nu ɲadegaiti ta masadai zɔlɔɔ. Toɠa yɛ ti ya eyɛsu ɠɔ.›

19 «Naa ʋoluma gè ɠɛni pɔ ga suai naanisiɛi ná-fai ɠole bɛ̀, nii zɔɠɔzu ɠɛni ti ʋa ta zɔ saʋagɔiti, gola maaluani, é leʋe kɛɛzu ʋa, ná-kɔlu ɲiigaiti maaʋele ma, ta ná-kɔlu ɓɔigi zaingiti, é ɗa ná-ani zogaiti mi, é ɗa ti leʋeleʋe su, é ɗa ɠɔɠɔziɛ naa zu, nii é la ɠɛni miizu. 20 Gè ɠɛa pɔ gè ɠi sɔlɔɔ ɓalaa, é lo suai ʋa nii minɛ puugɔiti ti ɠɛni unba, ta é lo zɔɔma minɛi ʋa, é ʋɔnɔni, é saʋagɔ loo bu ti zaama, minɛi naa gaazuɠɛzɛiti ti ɠɛni ba, ta daaʋɛ é ɗa waso kpɔɛiti bo da, é ɠɛ eɠɛ a wɔɔlɔ é leʋe zɔiti ba. 21 Siɛgi zu gè ɠɛni wɛlɛzu la, é kɔɔi ʋɛɛni nu ɲadegaiti ba, é ɠɛni pilɛ sɔlɔɔsu ti ma. 22 Kɛlɛ kɛwola wɔlɔi ʋaani, nii é ga GALA nii é Anii-Pɛ-Unda, é ná-nuɓusɛiti tukpɔɠaaleʋe. Siɛgi zu yeeɠɛɠalai zeelini la, nuɓusɛ ɲadegaiti ti masadai zɔlɔɔni, é ɠɛ ga tɔnɔ.

23 «É ɠɛni mà: ‹Suai naanisiɛi ɠa ga masadai naanisiɛi nii tɔɔzeiɗai zooi ma, ti yeeɠaaɠwɛɛʋɛ ta zɔiti kpein. Naama masadai ɠa zooi ná pɛ mi, é ɠɔɠɔziɛ su, é teʋeleʋe su. 24 Ma minɛ puugɔiti ta ga masa puugɔiti ti yɛsu zeizu ɓɔɠɔ ʋotogi zu naama masadai unda. Masagi puugɔ maazu ɠilasiɛi (11), nii é la ga zɔiti kɛʋele ti leʋegai, naa ɠa zobogi zɔlɔɔ, toɠa masa saʋagɔiti too bu. 25 Toɠa bɛlɛlala ɓɔɛiti bo GALA daalɔɠɔma nii é Anii-Pɛ-Unda, é GALA nii é Anii-Pɛ-Unda naa ná-nu ɲadegaiti nimizaa, toɠa ɠɛ kisu ga é siɛgiti ta tɔgi valibo, nu ɲadegaiti ta lɔ zeezu kona saʋagɔ ta tukpɛ (3,5) daawu. 26 GALA ná-tukpɔɠaaleʋei ɠa ʋaa naa ʋolu, ta ná-masadai ɠula zea, é ɠoloɠolo, gaaʋala ba eyɛsu ɠɔ. 27 Etea masadaiti kpein, ta-masadai, ta-ɠundiɠilai, ti wɔɔlɔ ʋeleiti ta ve, GALA nii é Anii-Pɛ-Unda, naa ná-nu ɲadegaiti zea. Ná-masadai ɠa ga ɠɔoɠɔ masadai, eteai zu zobobɛ nuiti kpein ta ɠolo bɛ, ti ɗa botii ɠɛ bɛ.›

28 «Fai nii ɠaaɓelazuʋɛ ɠa. Nɔ̀un nà, Daniyɛle, gè wola luani nà-kisiɛiti su, dɔ̀tɔzuleʋeni, gè ɗa nɔ ɠisiɛ su.»

<- Daniyɛle 6Daniyɛle 8 ->