2 Daliyuse deveni ga é yeelo ná-nu wola ungila puufelegɔ (120) ʋa ga ti zei ná-masa zooi unda. 3 É kundiɠi wola saʋagɔ zeini ti unda, naati ka ná-nu wolaiti ti ɓena ʋoluvaawo ti ma é lo ta-wotiiti ba, naa ɠa a kɛ nu nɔpɛ ge mina masagi ɓɔlɔ, é ʋa lo ná-sɔlɔɔgiti ba. Daniyɛle ɠɛni ga kundiɠi wolai naa ta ɠila. 4 Daniyɛle leʋeni zɔ felegɔiti ba ta masagi ná-nu wolaiti kpein, ga zɛnvui nii é zea yɛ, nii a ɗa faiti zɔɠɔzuɠula la. Naama ʋele ma, masagi ɠɛni ɠisiɛzu ga é kundiɠilai gila kaliva ma, nii togai masadai ma yooi kpein ba.

5 Naama vaa zu, kundiɠi wolai zɔiti ta masagi ná-nu wolaiti ti tɔɔzeini ga fai ta ɠaiziaa nii ta Daniyɛle ʋeelala la, é lo masada yooi ná-faaɠaaɠulabaiti ba. Kɛlɛ ti la faaɠaaza nɔpɛ kaani, ta kakama vaa nɔpɛ, mazɔlɔɔ ba é ɠɛni ga lada nu gola. Faa nɔpɛ ge la ɠɛni ná, nii nu a la zelilo ma su. 6 Naama zunuiti ti ɠɛni ɓɔɠɔ ma: «Ade la faa nɔpɛ kaa, nii a Daniyɛle ʋeelala, kɛni ni ada gila kaana é ʋilɛ ná-GALAGI ná-tɔgi ʋa.»

7 Gaamago, kundiɠi wola felegɔiti ta masagi ná-nu wolaiti ti liini masagi ʋɔ bɛ, ti ɠɛ ma: «È-zii zuɠooza, Masagi Daliyuse. 8 Kundiɠi wolaiti kpein, ta koʋi laa wola ɠundiɠiiti, ta masagi ná-nu wolaiti, ta faawo bo nuiti, ta zou zɛʋɛ ɠundiɠiiti, ti maaɓɔgi wogɛ, ti zoloo ma ga masagi tɔgi zei, nii su vai a ɠɛ ga nii: Folo ʋuusaʋagɔ (30) laawu, nu nɔpɛ a fali woo laazeelina gala kiligi ta ma, ɓaa nui ta, é ɠula ɗa ɓɔɠɔi nɔ è ʋolu, masagi, naama nui ɠa ʋili zalaiti ta-yeɠei zu. 9 Masagi, devei nii maazuɓaa, è yeeʋo pilɛ su, naa ɠa a kɛ ta mina ɠula da, é ɠɛ ga Mɛde ta Pɛɛlese nuiti ta-lɔgi ɠɛʋele, nii é la ɗa ga valiboga.» 10 Naa ɠa é ba, masagi Daliyuse yeeʋo pilɛni tɔgi ma zɛʋɛi zu.

11 Siɛgi zu Daniyɛle kwɛɛni la ga masagi yeeʋo pilɛga naama levei ma zɛʋɛi zu, é liini ná-pɛlɛi wu. Sangasoi zu, fenɛtɛlɛiti ta ná, niiti ti laa ɠɛni laosu ga Zeluzalɛme letema ʋele. Miná ɠa ná ɓena ɠɛ saʋa folo-o-folo, é ɗa ʋilɛ ɲiibiɠa ná, é ɗa ná-GALA fali, é ɗa maamusɛ. É kɛɛni eɠɛʋelei pɔlɔma é ɠɛni kɛɛzu la. 12 Daniyɛle zili nuiti ti ʋaani ga gaazuvilɛi, ti ka, é ɗa GALA fali, é ɗa wooɠula ná-GALAGI ma. 13 Ti liini, ti ɓɔɛ masagi ʋɔ é ʋilɛ tɔgi ʋa é seiɗai, ti ɠɛ ma: «Màliɠii, è la yeeʋo pilɛni tɔ sɛʋɛi zu ɓaa, nii é ɠɛɛzu ma, folo ʋuusaʋagɔ (30) laawu, nu nɔpɛ nii a gala kili falina, ɓaa nui ta, é ɠula ɗa ɓɔɠɔi è ʋolu, naa maanɛɛʋɛ ga é ʋili zalaiti ta-yeɠei zu?» Masagi ɠɛ ti ma: «Zekana devei woni la, eɠɛʋelei Mɛde ta Pɛɛlese nuiti ta-lɔgi la, nii é la valiboga.» 14 Zunui naati ti ɓɔɛni ʋolu, ti ɠɛ ma: «Tama-o, kɔɔzogiti ti zeɠeai Zuda yooi zu, ti ɠila ka ná nii é ga Daniyɛle, é la unfesu è ma, é la unfesu tɔgi ma nii è yeeʋo pilɛgai su. Toɠa ná-GALAGI valizu ná zeizu ɠɛ saʋa foloi ma.»

15 Tɛi masagi naama ɓɔɛiti mɛnini, zii wola ɓɔlɔni koozu, é kɛɛni ʋele-o-ʋele ga é Daniyɛle maazasa, eyɛsu foloi da, é ɠɛni pelei ta ɠaiziɛzu, ʋelei a kizo da. 16 Kɛlɛ Daniyɛle zili nui naati ti ɠaleni ma gaamago, ti ɠɛ masagi ma: «Màliɠii, ɠizɛ su ga, eɠɛʋelei Mɛde nuiti ta Pɛɛlese nuiti ta-lɔgi la, devei ɓaa tɔgi nii kulaai masagi laaʋɛ, é bo, naa la valiboga.»

17 Naa ma, masagi devei veeni ga ti ʋa ga Daniyɛle, ti pili zalaiti ta-yeɠei zu. Masagi ɠɛ Daniyɛle ma: «Ɗa-ƓALAGI ɠila kpe nɔ, nii è dɛbizu folo-o-folo, naa zoo é è ɠizo kae.» 18 Ti ʋaani ga kɔtu ɠila, ti pilɛ zeɠei laaʋɛ. Masagi yeeʋo pilɛ ba, ta ná-botiɠɛ nu wolaiti ɓalaa ti yeeʋo pilɛ ba, nii a kɛ faa nɔpɛ ge mina zeɠe ma Daniyɛle letegi. 19 Naa ʋoluma, masagi ɠaleni ma ná-pɛlɛi wu kpidii. É la kɛɛni daamiani nɔpɛ pɔ, anɛɛ ɲiimɛnii é la ɠɛni boni, é ɠɛlɛni gaazu lele vaiti pɛ ba.

20 Sobui nɔ wozaɠalasuʋɛ, masagi wuzeɠeni, é li ga gaazuvilɛi zalaiti ta-yeɠe laaʋɛ. 21 É maaɓuɠazuʋɛ zeɠe laaʋɛ ʋa, é Daniyɛle lolini ga gaazuɠilii, é ɠɛ ma: «Zɛnvu su ƓALAGI ná-botiɠɛ nui Daniyɛle, ɗa-ƓALAGI nii è dɛbizu folo-o-folo, soogɛ ɓaa é è ɠizo zalaiti saingiti ma?» 22 Daniyɛle gooɠaaʋoteni, é ɠɛ ma: «Ee, masagi, è-zii zuɠooza faan! 23 Nà-GALAGI ná-geezuɠeelai leʋegɛ, é ʋaa, é zalaiti daaʋɛ zo, ti la mɔ faa nɔpɛ kɛɛni ga ze. Tɔɔzei ba ga gè la ɠɛɛni ga sɔba nu nà-GALAGI ɠaazu, gè la faaɠaaza nɔpɛ kɛɛni ɓalaagi ɗɔun è ɠaazu, masagi!»

24 Masagi wola ɠoozunɛɛni, é devei wo ga ti Daniyɛle ɠula zeɠei zu. Ti kulaai ma zeɠei zu, ti pɛtɛni ga pala ʋo gila kpalaa ge la ʋɛɛni ba, tɔɔzei ba ga é laani ná-GALAGI la. 25 Naa ʋoluma masagi devei veeni ga ti zunui naati so, niiti ti Daniyɛle maalɔɔni, ti ʋa ga tiye, ti ti ʋili zalaiti ta-yeɠei zu, é ʋɛɛ ti-anzaiti ta ti-lointi ba. Ti ɠɛɛzu ti zeeli zeɠei ɓomaʋɛ, zalaiti ti ti zoni, ti ti ma ɠaeiti kpein golowolo.

26 Naa ʋoluma, masagi Daliyuse sɛʋɛi ɠɛɛni nuɓusɛiti kpein ma, ziiti, ta zii woo wo nuiti kpein ma, ti zeini eteai zu ná pɛ: «Gè ɠɛ ziilɛigi ve wo ʋɛ ga mɔinɗa. 27 Gè devei woga ga nii: Nà-masadai ma yooi zu, ʋɛ kpein gè ná levezu, nui ɠilagilagi pɛ maanɛɛʋɛ é unfema wola ve Daniyɛle ná-GALAGI ʋɛ.