1 Yeeɠɛɠalai tanigaa ti leʋegai ma niima vaiti poluma, pɛtɛ nii é ɠɛɛni: Zunui ta ɠɛni Zizeleyɛle taazuʋɛ nuiti saama, daa ga Naɓɔte, leezɛn ɓelei ɠɛni zea Zizeleyɛle, Samali masagi Akaɓe ná-masa pɛlɛi ɠobaʋɛ. 2 Akaɓe ɗa ɠɛ Naɓɔte ma: «Ɗa-leezɛn ɓelei ve zèa, gè ná ɠɛ ga guluwulu kpelei, mazɔlɔɔ toɠa nà-masa pɛlɛi ɠoba. Nà maavalibo ga leezɛn ɓelei taɠili, nii pagai tɔun ba, ɓaa ni ɗa pɔ, nà sɔngɔi ɠɛɠalai ve è ya ga walii.» 3 Kɛlɛ Naɓɔte ɠɛni Akaɓe ma: «Ɠɔoɠɔ GALAGI kìzo naa ma ga gè ʋa zooi naa ve è ya, nii gè sɔlɔɔgai ga pogani kɛ̀ɛni zea.» 4 Akaɓe ɠaleni ma ná-pɛlɛi wu zii ɠoloɠologi ta ziiɠaawanai zu, tɔɔzei naama wooi ʋa, nii Zizeleyɛle nui Naɓɔte boni ma ga: «Gè la mɛ̀mɛwolani ta-ʋoganii veezu è ya.» É laani ná-betei zu, é ɠaaʋote pɛlɛi ma, é la daami woni.

5 Anzai Zezaɓɛle ʋaani koba, é ɠɛ ma: «Lee ma yiizoolɛ ɠa é è ma, è la kɛɛzu è ʋa daami wo?» 6 É ɠɛ naa ma: «Kɛ̀ɛʋɛ Zizeleyɛle nui Naɓɔte ma: ‹Ɗa-leezɛn ɓelei ve zèa, gè geya ga walii, ɓaa gè maavalibo ga leezɛn ɓelei taɠili.› Kɛlɛ kɛɛʋɛ mà: ‹Gè la nà-leezɛn ɓelei veezu è ya.› » 7 Anzai Zezaɓɛle ɗa ɠɛ ma: «Ɗa lɛi è ʋa ɠɛ masadai ɠɛɛzu Izilayɛle yooi zu ɓaa? Wuzeɠe, è daami wo, è ɠoozunɛ. Nɔ̀un nà Zizeleyɛle nui Naɓɔte ná-leezɛn ɓelei veezu è ya.»

8 É sɛʋɛiti kɛɛni Akaɓe laaseigi zu, é Akaɓe ná-poogi zei ti ʋa, é ti leʋe kundiɠiiti ta ɠalazogiti ma, ti ɠɛni ɲii wosu taa ɠila su ta Naɓɔteni. 9 Nii ɠa é boni sɛʋɛi naati su: «À zu so foloi leʋe ba, wo Naɓɔte lo nuɓusɛiti untuɠɔ. 10 Wo nu ɲaka felegɔ zei daawu, ti ɗa maalɔ, ti ɗa ɠɛ ma: ‹Naɓɔte GALA kotoʋɛ, naa ʋɛɛ masagi ʋa.› Naa ʋoluma à kula taai ʋa, wo yɛ sɔɔzu ga kɔtui, é za.»

11 Kundiɠiiti ta ɠalazogiti ti naa ɠɛɛni, nii Zezaɓɛle boni ti ma ná-sɛʋɛiti su. 12 Ti zu so foloi leʋeni ba, ti ɠɛ Naɓɔte ma, é lo ma ɠaalɛbai luɠɔ. 13 Nu ɲaka felegɔiti ti ʋaani, ti zei daawu, ti tɔɔzei ga maalɔa, ti ɗa ɠɛ ma: «Naɓɔte GALA kotoʋɛ, naa ʋɛɛ masagi ʋa!» Ti kulani naazu taai ʋa, ti yɛ sɔɔzu ga kɔtui, é za. 14 Taa ɠundiɠiiti ti keela leʋeni Zezaɓɛle ma ga Naɓɔte zɔɔʋɛ ga kɔtui, tama é zaa.

15 Zezaɓɛle mɛnigai ma ga ti Naɓɔte zɔɔʋɛ ga kɔtui, é za, é ɠɛni Akaɓe ma: «Wuzeɠe, è Zizeleyɛle nui Naɓɔte ná-leezɛn ɓelei zeɠe ga ɗɔnɔ, nii kɛlɛai feezu è ya ga è geya. Mazɔlɔɔ Naɓɔte la mɔ vulua, é zaa.» 16 Akaɓe mɛnigai ma ga Naɓɔte za, é wuzeɠeni ga é yei Zizeleyɛle nui Naɓɔte ná-leezɛn ɓelei zu, é ʋa seɠe ga nɔnɔ.

17 Ɠɔoɠɔ GALAGI ɓɔɛni naazu Tiseɓé nui Eli ʋɔ, é ɠɛ ma: 18 «Wuzeɠe, è Akaɓe laaɠomi, Izilayɛle masagi, é Samali, wɛlɛna ba é Naɓɔte ná-leezɛn ɓelei zu, ga é seɠe ga nɔnɔ. 19 Ɗa ɓɔɛ pɔ, è ɠɛ ma: ‹Ɠɔoɠɔ GALAGI wooi ɠaa: Toɠa ɠale, è ɓega ʋoluma ga zunui ʋaa, ɗa ga li mɔnɔ kɔligi zeɠezu ga ɗɔnɔ?› Ɗa ɠɛ ma ʋolu: ‹Ɠɔoɠɔ GALAGI wooi ɠaa: Ʋɛ nɔ gilɛiti ti Naɓɔte ɲamai ɠɔmɔgai ná, miná nɔ ɠa ti è-ɲamai ɠɔmɔsu ná.› »

20 Akaɓe Eli ɠaai ma, é ɠɛni naa ma: «Wɛlɛ, ɗa ʋa! È kàa kɛlɛ, sìli nui?» Eli ɠɛ ma: «Gè è ɠaa, è ɓɔɠɔ ʋɔdia faa ɲɔi ma, è Ɠɔoɠɔ GALAGI wanama vai ɠɛ. 21 Woilo Ɠɔoɠɔ GALAGI wooi ma: ‹Nà ʋaazu ga maanɔɠɔi è ma, gè è ɓale ná, gè ɗa-ʋɛlɛyeɠei wu zunuiti pɛ suwuɠaaleʋe, doungo ʋɛɛ kpakolo ba Izilayɛle yooi zu. 22 Nà ɗa-ʋɛlɛyeɠei ɠɛɛzu ga Zeloɓoame ná-pɛlɛyeɠei ɠɛʋele, Neɓate ná-doun zunui, ta Ɓaasa ná-pɛlɛyeɠei ɠɛʋele, Ayiya ná-doun zunui, mazɔlɔɔ è zìiɠaawana, è Izilayɛle lia kotoi ma.› 23 Ɠɔoɠɔ GALAGI ɓɔɛʋɛ é ʋilɛ Zezaɓɛle ɓalaa ba, é ɠɛ ma: ‹Gilɛiti ta Zezaɓɛle ma zuai mi Zizeleyɛle ziɠigi ɠobaʋɛ.› 24 Akaɓe ná-pɛlɛyeɠei wu nui nɔpɛ é zaazu taazuʋɛ, gilɛiti ka ta ma ʋoomai mi, zɔi ma é zaazu dɔɓɔi zu, wɔniiti ka ta naama ʋoomai mi.»

25 (Gaamazu Akaɓe ɠɛɠala nu la zɔlɔɔni, nii a yiimazeɠe ga Ɠɔoɠɔ GALAGI wanama vai ɠɛai ga tɔun kɛʋele, tama anzai Zezaɓɛle ɠa é ɠɛni diizu ma. 26 É ziɛ ʋelei wola ɲɔu ga é ɓɔɠɔ lɔɔ vai kɔɔɠɔ gani kɔɔ vai zu, eɠɛʋelei nɔ Amool nuiti ti ɠɛni kɛɛzu la, niiti Ɠɔoɠɔ GALAGI ti ɓɛɛni Izilayɛle nuiti tuɠɔ, é ti-zeizuʋɛ ve naati zea.)

27 Akaɓe naama wooiti mɛnigai ma, niiti Eli ti woni ma, é ná-seɠei ʋalini ga ga ɓɔɠɔmaayeii ma ʋoogi, é saa wɔlɔ wo seɠei loo ɠɔba, é zugi zo, é ɗa ziɛ vaavaa. 28 Ɠɔoɠɔ GALAGI ɓɔɛni Eli ʋɔ, Tiseɓé nui, é ɠɛ ma: 29 «È kaa, ʋelei Akaɓe ɓɔɠɔmaayeiɗa la gàazu? Tɛi é ɓɔɠɔmaayeiɗa bɛ̀, gè la mɔ zɛsu vulua, gè ʋa ʋaa ga maanɔɠɔi, nii gè ɠɛa ɠɛɛzu gè ʋaa la. Ná-doun zunui ná-yeeɠɛɠalai zu ɠa, gè ʋaazu la ga maanɔɠɔi naa.»

<- 1 Masagiti 201 Masagiti 22 ->