1 Siili masagi Ɓɛne-Ɠadade ná-kɔɔʋɛbɛi pɛ gaalɛɛni ba, é ʋɛɛ masa puusaʋagɔ maazu felegɔ (32) ʋa, naa ʋɛɛ sooiti, ta kɔɔɠɔ wotoloiti. Ti ʋaani, ti Samali zei kɛlɛ su ga ti kɔɔi vala ba. 2 É keelaiti teʋeni taazuʋɛ Izilayɛle masagi Akaɓe ma, 3 ti ɠɛ ma: «Ɓɛne-Ɠadade ɠɛ: ‹Ɗa-wali ta ɗa-zanugiti fe zèa, è-anzaiti ta è-loun zunui zɛbɛsu geleiti fe zèa.› » 4 Izilayɛle masagi gooɠaaʋoteni, é ɠɛ ma: «Màliɠii, nii è boga, zèe ɠa bu, nà-o, zeaɠɔli kpein, gá ga ɗɔnɔ.»

5 Ɓɛne-Ɠadade ná-keelaiti teʋeni ʋolu, ti ɠɛ Akaɓe ma: «Ɓɛne-Ɠadade ɠɛ: ‹Gè woo leʋega è ma ga è ɗa-waliiti ta ɗa-zanugiti fe zèa, naa ʋɛɛ è-anzaiti ta è-loun zunuiti ba. 6 Lina niima yeeɠɛɠalai ma, nà nà-botiɠɛ nu wolaiti teʋesu, ti ʋa, ti wɛlɛ ɗa-ʋɛlɛi ta ɗa-wotiɠɛ nuiti ta-ʋɛlɛiti bu, ti naa kpein seɠe, nii pagai è ɠaazu.› »

7 Izilayɛle masagi zooi ma ɠundiɠiiti pɛ gaalɛɛni ba, é ɠɛ ti ma: «À suɠwɛɛ, wo gaaɠa ga zunui nii ɠa ade ɠaiziɛzu ga faa ɲɔu. É keela leʋega mà ga gè nà-waliiti ta nà-zanugiti fe zea, naa ʋɛɛ ànzaiti ta dòun zunuiti ba, gè la ɠɛlɛni naa tanɔpɛ ba.» 8 Kundiɠiiti ta nuɓusɛiti pɛ ti ɠɛni Akaɓe ma: «Mina woilo goo ma, mina yeezei ná-faa nɔpɛ bu.»

9 É ɠɛni naazu Ɓɛne-Ɠadade ná-keelaiti ma: «À li, wo ɠɛ màliɠii masagi ma: ‹Nii kpein è boga mà mɔungi, nà naati kɛ, kɛlɛ gaaɓela kelei nii è boga, gè la zooga kɛɛzu.› » Keelaiti ti liini, ti naa wo Ɓɛne-Ɠadade ma. 10 Ɓɛne-Ɠadade wooleʋeni mɔnɔ Akaɓe ma, é ɠɛ ma: «Ni Samali vufiligi ɠa kula ɠɛɛna ga é kɔɔɠɔ nui niiti zeaʋɛ laave pòlu, naa ɠa ɠɛɛna galagiti ti sò ta-yiiɠaawanai pɛ su.» 11 Kɛlɛ Izilayɛle masagi ɠɛni ti ma: «À li, wo ɠɛ ma: ‹Zɔi é liizu kɔɔmaʋɛ, naa maa la nɛɛni, é ʋa ɓɔɠɔ lɛ su eɠɛ zɔi é zobo sɔlɔɔgai, é ɗa zeɠe kɔɔɠɔzuʋɛ.› »

12 Siɛgi zu Ɓɛne-Ɠadade naama wooi mɛnini da, é ɠɛni dɔɔi ɓɔlezu ta zɔɔma masagiti seɠe ɠotaiti bu. É ɠɛni ná-kɔɔɠɔ nuiti ma: «Ɛsɛ ge lo tosu.» Ti loni ti-losuʋɛti taai zo fai zu.

13 Naama ziɛgi zu GALA goo wo nui gila ge ʋaani, é Izilayɛle masagi Akaɓe ʋɛtɛ, é ɠɛ ma: «Ɠɔoɠɔ GALAGI wooi ɠaa: ‹È kɔɔʋɛbɛ wolai nii ʋɛtɛga? Nà dɔɔzu za è yeezu, ɗa suɠwɛɛ naazu ga nà ɠa gè ga Ɠɔoɠɔ GALAGI.› » 14 Akaɓe gaazaɠagi woni, é ɠɛ ma: «Ɠɔoɠɔ GALAGI ɠa leʋesu ga ɓɛ maaʋele, é dɔ zèezu?» Naa gooɠaaʋoteni, é ɠɛ ma: «Ɠɔoɠɔ GALAGI wooi ɠaa: ‹Nà dɔɔzu è yeezu ga nu niinɛiti maaʋele, ti lɔai salaʋusu vai zu ga niinɛ zou zɛʋɛ ɠundiɠiiti bɛ.› » Akaɓe gaazaɠani ʋolu ga: «Ɓɛ ɠa é kɔɔi lɔɔzeizu?» GALA goo wo nui gooɠaaʋote, é ɠɛ ma: «Ɗa ʋe.»

15 Akaɓe salaʋusu loungoiti gaalɛɛni ba niiti zou zɛʋɛ ɠundiɠiiti, ti ti-laaseigiti sɛʋɛni, naati ti ɠɛni ga nu unfelegɔ puusaʋa maazu fele (232), é Izilayɛle ɠɔɔʋɛbɛi mɔtaiti gaalu, ti ɠɛ ga nu waadɔfela (7.000). 16 Ti ɠulani ga folo gaalɔgai. Naazu Ɓɛne-Ɠadade ta masa ʋuusaʋagɔ maazu felegɔi (32), niiti ti ʋaani ɓɔsu ba, ti ɗa dɔɔi ɓɔle, é ɗa ti zo seɠe ɠotaiti bu. 17 Zou zɛʋɛ ɠundiɠiiti ta-zalaʋusuiti ka ti ɠulani mɔunpa. Ɓɛne-Ɠadade nuiti teʋeni ná, ga é kwɛɛ nii é ɠɛɛzu ná. Ti ʋaani, ti ɠɛ ma: «Nuiti kulaʋɛ Samali.» 18 É ɠɛni ti ma: «É ɠɛni ga ziilɛigi zuvali vai ʋe, ɓaa ti ʋa kɔɔi ʋɛɛzu ade ʋa, à ti ma vuluiti so, wo ʋa ga tiye.»

19 Salaʋusu niinɛiti ta kɔɔʋɛbɛi nii é ɠɛni ti ʋolu, ti ɠulani taai ʋa. 20 Ɛsɛ ge valani kɔɔɲɔɠɔi ʋa, é paa, Siili nuiti ti ʋela, Izilayɛle nuiti ti ʋilɛ ti ʋolu. Siili masagi Ɓɛne-Ɠadade ʋelani sooi gila kɔma, ta soo ɓizɛ zalaʋusuiti. 21 Izilayɛle masagi ná-kɔɔʋɛbɛi leʋeni, ti ti zili nuiti ta-zooiti ta kɔɔɠɔ wotoloiti suɠoloɠolo, ti Siili nuiti too bu ga gola.

22 Naa ʋoluma GALA goo wo nui ʋaani, é ɠɛ Izilayɛle masagi ma: «Zɛbɛzeɠe, è ɠisiɛ naa zu, nii ɗa kɛ, mazɔlɔɔ ɲɔmɔ zu niima ziɛgi nɔ ma, Siili nuiti ta ʋaazu, ti kɔɔi vala è ʋa.»

23 Siili masagi ná-botiɠɛ nu wolaiti ti ɠɛni ma: «Ta-ƓALAGI ɠa ga gize maazu ƓALAGI, naa ɠa é kɛa ti vɔniga ade ma. Ade vala ti ʋa nɛmɛi zu, naazu ada vɔni ti ma. 24 Pɛtɛ nii ɗa kɛ, masagi niiti kpein kula ti-losuʋɛti, è ti maavalibo ga zou zɛʋɛ ɠundiɠiiti. 25 Naa ʋoluma salaʋusuiti daaseigiti sɛʋɛ, ti mɔin eɠɛʋelei zɔiti ti ɠɛa mɔinni la, è ʋalagai ti ma, sooiti ti mɔin ta kɔɔɠɔ wotoloiti. Ade zɛba ade vala ti ʋa nɛmɛi zu, ada vɔni nɔ ti ma.» Ɓɛne-Ɠadade ziɛni ga ta-lɛnɛ gooi, é naa pɛ kɛɛni, nii ti boni ma.

26 Poluma ɠonagi ma yeeɠɛɠalai nɔ, é Siili ɠɔɔʋɛbɛiti pɛ gaalɛɛni ba, ti ʋa Afɛke taazuʋɛ kɔɔi vala vai zu Izilayɛle yooi ʋa. 27 Izilayɛle nuiti ɓalaa ti ta-ɠɔɔʋɛbɛiti gaalɛɛni ba, ti daamianigiti fe ti ya. Ti liini, ti ti laaɠomi ga kɔɔi. Izilayɛle nuiti ti loni ti ɠaazu, ti ɠɛ nɔ eɠɛ boli ɓulu felegɔ. Siili nuiti ma, ti ma ʋɛbɛi ʋuuni zooi zu ná pɛ. 28 GALA goo wo nui ʋaani, é ɠɛ Izilayɛle masagi ma: «Ɠɔoɠɔ GALAGI wooi ɠaa: ‹Tɛi Siili nuiti ti ɠɛ nɔ̀un nà ga gize maazu ƓALA, gè la ga pɛtu su ƓALA, naa maaʋele ma, nà niima ʋɛbɛ wolai lɔɔzu è yeezu. Wa suɠwɛɛ naazu ga nà ɠa gè ga Ɠɔoɠɔ GALAGI› » 29 Kɔɔʋɛbɛ felegɔiti ti yɛni loni ɓɔɠɔ laawu, é yɛsu folo lɔfela, foloi lɔfelasiɛi kɔɔi ɗa tɔɔzei, Izilayɛle nuiti Siili zalaʋusu waaungila (100.000) paa folo ɠilagi.

30 Mɔtaiti ti ʋelani, ti li Afɛke taazuʋɛ. Niiti ti yɛni ʋoluzu, nu waaʋuufelegɔ maazu lɔfela (27.000) ʋelani, ti li Afɛke taa wolai zu, kɛlɛ taai ma siɠigi ɠoloni ti ma. Ɓɛne-Ɠadade ʋelani, é li taazuʋɛ, é ɗa leʋeteʋe pɛlɛiti bu. 31 Ná-botiɠɛ nu wolaiti ti ɠɛni ma: «Woilo, gi mɛnigɛ ga Izilayɛle masagiti ta ga gaazumaawɔinɠaa nuiti. Ɓɛ gi saa wɔlɔ wo seɠeiti gili zaama, gi galuiti gili gɔungiti ba, gi li masagi ʋɔ bɛ, ɓafɔ toɠa è yɛ vulua.» 32 Ti saa wɔlɔ wo seɠeiti gilini zaama, ti galuiti gili tɔungiti ba, ti li masagi ʋɔ bɛ, ti ɠɛ ma: «Ɗa-wotiɠɛ nui Ɓɛne-Ɠadade wooi ɠaa: ‹Zɛ̀nvui yɛ zèa.› » Akaɓe ɠɛni ti ma: «Tɔun ka dɛ vulua kɛlɛ? Toɠa ga kɛ̀ɛloin.» 33 Naati ti ziilɛi faa ɠaani naama wooi zu, ti zuvilɛ ga ti so ga gooi, ti ɠɛ ma: «Ungo, toɠa ga è-ɠɛɛloin.» Akaɓe ɠɛni ti ma: «À li, wo ʋaa la!» Ɓɛne-Ɠadade ɠulani ná-dɔɔɠu ʋelei zu, é ʋa, é ɓɔɠɔ lɛ ga Akaɓe. Akaɓe tɛɛni, é sei ná-wotoloi zu. 34 Ɓɛne-Ɠadade ɠɛni Akaɓe ma: «Nà taaiti pɛ gaaɠale ma è ma, niiti kɛ̀ɛ ti ɠulani è-ɠɛɛ ya, ɗa zoo pɔdi loozuʋɛti daalaosu Damase, eɠɛʋelei kɛ̀ɛ ti laalaoni la Samali.» Akaɓe ɠɛ ma: «Nà ma, nà wɔɔlɔyai ve è ya, de minazeɠe kɛ yɔɠɔzu.» Ti minazeɠegi ɠɛɛni yɔɠɔzu, é ɓe naa ʋa, é li ɓɔɠɔ yeema.

35 Ɠɔoɠɔ GALAGI ɓɔɛni GALA goo wo nu ɓɔgi ma nu ɠila pɔ, é ɠɛ bɔɔlai ma: «Dòɠa!» Kɛlɛ naa la ɠɛni kɛɛni, é ʋa doɠa. 36 Ma mɔungi ɗa ɠɛ bɔɔlai ma: «Tɛi è la ɠoloni Ɠɔoɠɔ GALAGI ná-devei ʋɛ, ɗa zeɠena kòba, zalai ta ɠa valazu è ʋa, é è ʋaa.» Tama é zeɠeni nɔ feya bɔɔlai ɠoba, zala ɠila ge ɠula, é vala ba, é paa.

37 Ma mɔungi liini mɔnɔ, é taɠili ka, é faa ɠilagi nɔ wo naa ma. Naa doɠani, é maawana. 38 GALA goo wo nui ɓegai ma ga ɠaazuʋɛ maavelevele ga seɠe zakpaiti, nii a kɛ nu mina kwɛɛ, é liini, é lo masagi leʋe pelei zu.

39 Masagi leʋesuʋɛ, GALA goo wo nui ɓainni, é ɠɛ ma: «Nà-masagi! Zɛ̀gɛ kɔɔɠɔzuʋɛ, zunu ɠila ge ʋa ga kɔɔ luɔi ta pɔ̀, é ɠɛ mà: ‹Makɛ bɛ̀ zunui tɛi ma, a ʋelana, ɗa ɠa è yɛsu potogi zu, ni naa laade, è wali ɠae waasaʋagɔ (3.000) ve.› 40 Tama nɔ̀un gaazuvilɛi yɛgɛ de, gè ɗa lɔ, gè ɗa ɠula, kɔɔ luɔi ʋela.» Izilayɛle masagi ɠɛ ma: «È tukpɔɠaaleʋea ɗa ɓɔɠɔi!»

41 Gaamago, GALA goo wo nui seɠe zakpaiti kulani ɠaazu, masagi ɠwɛɛsu ɠa ba ga GALA goo wo nui ta ʋe. 42 É ɠɛni masagi ma: «Ɠɔoɠɔ GALAGI wooi ɠaa: ‹É yeeɓega zunui naa ʋa, é li, nii gè ɠɛa daa veeni saai ʋɛ. Naa ɠa é ba, ɗa ɠa è ga potogi, ɗa-nuɓusɛiti ta za ná-nuɓusɛiti potogi zu.› » 43 Izilayɛle masagi ɠaleni ma Samali zii ɠoloɠologi ta ziiɠaawanai zu.

<- 1 Masagiti 191 Masagiti 21 ->