1 À wɛlɛ ʋelei Ɠɛɛɠɛ ade nɛai la ʋɛ! Ná-nɛɛbɛi ɠa é kɛa ade lolisu ga GALA dointi. Tama da ga naati gaamazu. Wɛlɛ nii ɠa é kɛa eteai la de ɠwɛɛ: É la GALA kwɛɛni. 2 Nɛ̀ɛɲɔɠɔiti, ada niina ga GALA dointi, kɛlɛ ʋelei da ɠɛ la, naa la dɛ ɠulani kɛlɛma. Tama de nii ɠwɛɛ: Siɛgi zu Kilista ɠulazu la kɛlɛma, da ɠɛ ga tɔun kɛʋele, tɔɔzei da ka, ʋelei é la. 3 Nu-o-nu naama ɠitogi ziimaʋɛ, é lo Kilista ʋa, naa ɠa ɓɔɠɔ ɲade ga Kilista ɠɛʋele.

4 Nu nɔpɛ é kotoi ɠɛɛzu, naa ɠa GALA ná-tɔgi ɠoloɠolosu, mazɔlɔɔ kotoi ɠa é ga tɔ koloɠolo fai. 5 Wo suɠwɛɛ ga Yesu Kilista ɠulani kɛlɛma ga é kotoiti kpe, koto nɔpɛ ge la tɔun ba. 6 Naa ma, zɔi giliai yɛsu Kilista ʋa, naa ɠa ɓe kotoi ɠɛɛ vai ʋa. Zɔi é yɛsu kotoi ɠɛɛzu, naa la kaani, é la kwɛɛni.

7 Dòungoiti, à mina va bu nu ʋa wo yaava. Zɔi é telebo fai ɠɛɛzu, naa ɓɔɠɔi lelebogɛ, eɠɛʋelei Yesu Kilista lelebogai la. 8 Zɔi é yɛsu kotoi ɠɛɛzu, naa ɠa ga Inɛgi nɔnɔ, mazɔlɔɔ Inɛgi kotoi ɠɛɛni tɔɔzeizu mɔunpa. GALA Doun Zunui ɠulani kɛlɛma ɠiteɠite su ga é Inɛgi ná-kɛɛwotiiti koloɠolo.

9 Nu-o-nu é ga GALA doun, naa ɠa ɓe kotoi ɠɛɛ vai ʋa, mazɔlɔɔ zɛnvui ná-zobogi é zɔlɔɔsu GALA zea, naa ɠa ziimaʋɛ, tɔɔzei GALA ka ga Kɛɛɠɛ, é la zooga é ʋa yɛ kotoi ɠɛɛzu. 10 Naa ɠa é zeeɠaaɠwɛɛi ɠɛɛzu ga pagɔ GALA dointi ta Inɛgi ná-dointi zɔɠɔzu. Zɔi nɔpɛ é la ziɛzu ga telebodai, ɓaa é la kɛɛɠɛloin nɛɛzu ʋɛ, naa la ga GALA doun.

11 Wɛlɛ keela wooi nii ɠa wo mɛnini tɔɔzeizu mɔunpa: Ade ɓɔɠɔ nɛɛ ʋɛ ade ɠilagilagi pɛ. 12 Ade mina ɠɛ ga Kayɛn ɠɛʋele, nii é ɠɛni ga Inɛgi nɔnɔi, é deɠei ʋaani. Lee vaa zu é paani? Tɔɔzei Kayɛn ɲɔuni ná-kɛɛwotiiti su, tama deɠei leleboni nɔnɔiti su.

13 Wo laa mina vɔ, kɛ̀ɛleaiti, ni eteai zu nuiti ta wo wɔinzeɠena. 14 Ade kwɛɛ ga de ɓudɛa saai maazu, de lɔ zɛnvui zu, tɔɔzei da de-ɠɛɛleaiti nɛɛzu ʋɛ. Zɔi nɔpɛ é la ziɛzu ga nɛɛbɛi, naa ɠa dɛ zeini saai laawu. 15 Nu nɔpɛ é kɛɛɠɛloin wɔinzeɠezu, naa ɠa ga nu ʋaa nu, wo suɠwɛɛ ga ɠɔoɠɔ zɛnvui la nu ʋaa nu ya, é ʋa zei ziimaʋɛ. 16 Wɛlɛ ʋelei de nɛɛbɛi ɠwɛɛgai la: Yesu Kilista zɛnvui veeni da-vaa zu. Da ɓalaagi, de maanɛɛʋɛ de de-yɛnvui ve de-ɠɛɛleaiti ta-vaa zu. 17 Ni nu a eteai zu naavoloi zɔlɔɔna, é wɛlɛ, é ɗa kɛɛɠɛloin ɠa kpalai zu, é ɠaazumaavɔ la, toɠa zoo ɠɛɛzu ma ɠale, GALA ná-nɛɛbɛi ɠa zeini ziimaʋɛ? 18 Dòungoiti, ade mina nɛɛbɛi ɠɛ ga kpɔɛzuɠulai nɔ, ɓaa de-nɛgi nɔ, kɛlɛ kɛni é ɠɛ ga nɛɛbɛ ɠitei, é ɠulazu kɛlɛma ga kɛɛwotiiti.

19 Ni naa ɠa ɠɛɛna, da kwɛɛ ga da gaamai zu, de ladalai ɠɛ de-yiimaʋɛ GALA gaazu. 20 Ni de-yiimaʋɛ a de ʋeelalana, GALA bɔɔlɔʋɛ de-yiimaʋɛ ʋa, é faiti pɛ kwɛɛ. 21 Naa ma, nɛ̀ɛɲɔɠɔiti, ni de-yiimaʋɛ la de ʋeelalani, ladalai ɠa de ya GALA gaazu. 22 Nii nɔpɛ de falizu ma, da naa zɔlɔɔsu, tɔɔzei da ɠolozu ná-deveiti bɛ, de ɗa naa ɠɛ, nii nɛai bɛ. 23 Nii ɠa é ga devei é feezu de ya: de ɠidaaleʋe ná-Doun Zunui Yesu Kilista laaseigi ma, de ɓɔɠɔ nɛɛ ʋɛ de ɠilagilagi pɛ, eɠɛʋelei é ma levei veeni la de ya. 24 Zɔi é ɠolozu GALA ná-deveiti bɛ, naa ɠa yɛsu GALA ba, GALA ge yɛ tɔ ɓalaa ba. Wɛlɛ ʋelei de kwɛɛsu da ga GALA ka yɛsu de ʋa: Da kwɛɛsu ga Zɛnvu Ɲadegai maaʋele, nii é feeni ade ya.

<- 1 Zan 21 Zan 4 ->