1 Dòungoiti, nà niima vai zɛʋɛzu, gè teʋe wo ma, naa ɠa a kɛ wo mina koto ɠɛ. Kɛlɛ tama ni nui ta a koto ɠɛɛna, de maalobo nui ɠa Ɠɛɛɠɛ ʋɔ bɛ, tɔ ɠa é ga telebo nui Yesu Kilista. 2 Mazɔlɔɔ Yesu Kilista ɓɔɠɔ veeni ga koto gba zalaɠai, da ɠila nɔ dɔnɔi laade, kɛlɛ eteai zu nuɓusɛiti pɛ tɔnɔi ɓalaa.

3 Ni da ná-deveiti sona, naa ɠa de kwɛɛsu da ga de tɔun kwɛɛ. 4 Zɔi a ɠɛ, é kwɛni, kɛlɛ é la ná-deveiti sosu, naa ɠa ga zɛɛ nu, gaama nɔpɛ ge la zea. 5 Kɛlɛ zɔi a ɠolo daawooi ʋɛ, GALA ná-nɛɛbɛi ɠaavɔnigɛ naa yiimaʋɛ. Ʋele ɠana de kwɛɛsu da ga de ɠiliʋɛ GALA ba. 6 Zɔi a ɠɛ, giliʋɛ GALA ba, maanɛɛʋɛ é ná-eteai ziɛ eɠɛʋelei Kilista ná-eteai ziɛni la.

7 Nɛ̀ɛɲɔɠɔiti, deve niinɛ laade, gè ʋa ɠɛ ma vaa zɛʋɛzu wo ma. Toɠa ga deve wɔlɔmai, nii wo sɔlɔɔni tɔɔzeizu mɔunpa. Deve wɔlɔmai tɔna ɠa ga wooi wo mɛnini. 8 Anɛɛ naa ʋe, toɠa ga deve niinɛ, nii gè ma vai zɛʋɛzu wo ma, ma ɠaamai ɠulazu kɛlɛma ga Kilista maaʋele, ta wa ɓalaa wo maaʋele, tɔɔzei kpidii ɠana leʋe, wozakala kitei ɠana volozu niizu. 9 Zɔi é ɠɛɛzu ma, toɠa ziɛzu wozakalagi zu, tama é ɗa kɛɛɠɛloin wɔinzeɠe, naa ɠa dɛ kpidii zu. 10 Zɔi é kɛɛɠɛloin nɛɛzu ʋɛ, naa ɠa wozakalagi zu, kaka saɓu nɔpɛ ge la ziimaʋɛ, nii a too. 11 Kɛlɛ zɔi a kɛɛɠɛloin wɔinzeɠe, naa ɠa dɛ kpidii zu, toɠa ziɛzu kpidii zu. Ʋɛ é liizu ná, é la naa ɠwɛɛ, tɔɔzei kpidii gaazuʋɛ ʋɛa ma.

12 Nà sɛʋɛi ɠɛɛzu wo ma, dòungoiti, tɔɔzei wa-ɠotoiti suvaayɛga Yesu laaseigi maaʋele ma. 13 Nà sɛʋɛi ɠɛɛzu wo ma, ɠɛɛɠɛiti, tɔɔzei wo naa ɠwɛɛ, zɔi é ná kaite tɔɔzeizu. Nà sɛʋɛi ɠɛɛzu wo ma, nu niinɛiti, tɔɔzei wo pilɛ sɔlɔɔga Inɛgi ma.

14 Nà sɛʋɛi ɠɛɛzu wo ma, dòungoiti, tɔɔzei wo Ɠɛɛɠɛ ɠwɛɛ. Nà sɛʋɛi ɠɛɛzu wo ma, ɠɛɛɠɛiti, tɔɔzei wo naa ɠwɛɛ, zɔi é ná kaite tɔɔzeizu. Nà sɛʋɛi ɠɛɛzu wo ma, nu niinɛiti, tɔɔzei wo zuɓaaʋɛ, GALA daawooi ɠa zeini wo-yiimaʋɛ, wo pilɛ sɔlɔɔga Inɛgi ma.

15 À mina eteai nɛɛ ʋɛ, ɓaa eteai zu vai tanɔpɛ. Ni nui ta a eteai nɛɛna ʋɛ, Ɠɛɛɠɛ ná-nɛɛbɛi la ziimaʋɛ. 16 Mazɔlɔɔ nii dɔin é eteai zu, naa ɠa é ga, ɓɔɠɔyiimaɠɛɛ wɔin, nu ɠaazuʋɛ ná-gaazuɠulapɔi, ta eteai ziɛ vai ma wasogi, naa ta la ʋaani é ʋa zeɠe Ɠɛɛɠɛ ʋɔ, kɛlɛ ta zeɠezu eteai nɔ zu. 17 Eteai ɠana leʋe, ta ná-faiti nuɓusɛi ɠaazuɠulazu ti ʋa ɓalaagi, kɛlɛ zɔi a ziɛ ga GALA ziimai, naa ɠa yɛ ná ɠɔ.

18 Dòungoiti, yeeɠɛɠala ɠaaɓelagi ɠa é zeelia. Wo mɛnini ga kɛni Kilista zili nui ʋa, Kilista zili nu mɔinmɔin ka niina ná. De kwɛɛgɛ naa maaʋele ma ga yeeɠɛɠala ɠaaɓelagi ɠa. 19 Naama nuiti ti zeɠeni ade ʋa, kɛlɛ ti la ɠɛni ga de ta ɠiteɠite. Ni ti ɠɛni ga de ta, ta la yɛ ade ʋa. Kɛlɛ ti zeɠeni ade ʋa, naa ɠa a kɛ é ɠole ga ti taɠila kpalaa ge la ɠɛni ga dɔnɔ.

20 Wɔun wa, wo Zɛnvu Ɲadegai zɔlɔɔni, nii Kilista zeini wo ma, naa ma wo pɛ wo gaamai ɠwɛɛ. 21 Deɠɛmu, ni gè sɛʋɛi ɠɛa wo ma, é la ga wo la gaamai ɠwɛɛ, kɛlɛ tɔun tɔɔzei wo kwɛɛ, wo kwɛɛ ɓalaa ga zɛɛ nɔpɛ ge la ɠulazu gaamai zu. 22 Ɓɛ ɠa é ga zɛɛ nui? Toɠa ga zɔi é bosu ga Yesu la ga Kilista. Naama nui ɠa é ga Kilista zili nui, nii é ɠɛlɛzu Ɠɛɛɠɛ ʋa ta Doun Zunui. 23 Tama zɔi é ɠɛlɛzu Doun Zunui ʋa, naa la ɠilini Ɠɛɛɠɛ ʋa. Zɔi ma é Doun Zunui ɠwɛɛsu, naa ɠa ɠilizu Ɠɛɛɠɛ ɓalaa ba.

24 Naa ɠa é ba, wooi wo mɛniga tɔɔzeizu mɔunpa, à ɠaaɓa, wo naa makɛ wo-yiimaʋɛ. Ni tama nii wo mɛnini tɔɔzeizu mɔunpa, naa ɠa wo-yiimaʋɛ, wo ɠiliai ɠa yɛ Doun Zunui ʋa ta Ɠɛɛɠɛ. 25 Wɛlɛ nii ɠa Kilista minazeɠea ga é fe ade ʋɛ: ɠɔoɠɔ zɛnvui.

26 Gè niima vaiti sɛʋɛʋɛ wo ma naati ta-vaa zu, niiti ti wɔinni ti wo ɠaka. 27 Wɔun wa, Zɛnvui nii Kilista zeini wo ma, naa ɠa wo-yiimaʋɛ. Eɠɛʋelei ná-Zɛnvui wo ʋa la, wo ɓɛdɛ la mɔ ba ga nu wo ɠala. Tama Zɛnvui ɠa wo ɠalasu ga fai pɛ, nii ma é wo ɠalasu da, naa ɠa ga gaamai, nii zɛɛ vaa nɔpɛ ge la su. À ɠolo Zɛnvui ná-kalagi ʋɛ, wo ɠiliai yɛ de Kilista ʋa.

28 Ungo, dòungoiti, wo ɠiliai yɛ de Kilista ʋa, naa ɠa a kɛ, da-ladalai laazeeli, siɛgi zu é ɠulazu la kɛlɛma, unfegi mina de maaɓɔle gaazu, voloi é ʋaazu la. 29 Wo suɠwɛɛ ga Kilista lelebogɛ, naa ma, à suɠwɛɛ ɓalaa ga nu-o-nu é sɔle fai ɠɛɛzu, naa zɔlɔɔgɛ tɔun ba.

<- 1 Zan 11 Zan 3 ->