1 Bantu bonse baakolongheene nga muntu umo pa kifuka kimo kikata kyaali pa ntanzi ya mulyango wa menda. Baamwanine Ezra kasambilizia wa mizilo aleete kitabu kya mizilo yakua Musa yaalailue Baizraeli kuli Yawe. 2 Mu busiku bwa mambo bwa mwezi wa kilooba, kitambua Ezra waaleetele kitabu kya mizilo ku libumba lya balalume ni banakazi, ni ku bonse baali ni buvinde bwa kunvua. 3 Ezra waabelengele kitabu pa ntanzi yabo bonse pa musolo waali wali lya pa mulyango wa menda, kutendeka lukeelekeele mpaka koba mukati, ntanzi ya babo balalume ni banakazi, pamo ni bonse baali ni buvinde bwa kunvua, bantu bonse baali batwiliziizie vyaali vyabelengua kitabu kya mizilo.

4 Ezra kasambilizia wa mizilo waali waimeene pa kintamba kya bimuti, kyaali kyakitiilue sie pa mulandu wa ezio miilo. Ku kulio kwakue kwaali kwaimeene Matitia ni Sema, ni Anaia, ni Uria, ni Hilkia, ni Maseia, ni ku kuso kwakue kwaali kwaimeene Pedaia, ni Misaeli, ni Malkia, ni Hasumu, ni Hasubadana, ni Zakaria pamo ni Mesulamu.

5 Ezra waavingulwile kitabu ni bantu bonse bamumwene, pantu waali wali pa muulu kukila bantu bonse, ni lu-aavingulwile sie kekio kitabu, bantu bonse baimeene. 6 Ezra waamutasiizie Yawe Leza Mukulu.

Kupwako, bantu bonse baitabizia balanda nangue, “Evio sile! Evio sile!” Koku balendwile maboko mu muulu. Pa kyamba baafukeeme, bakontama ni kumupupa Yawe ni nkebu yabo yakumiizie pansi.

7 Bantu lubaimeene kubalua muntu pa kifuka kyakue, baba Balawi, Yeshua, ni Bani, ni Serebia, ni Yamini, ni Akubu, ni Sebetai, ni Hodia, ni Maseia, ni Kelita, ni Azaria, ni Yozabadi, ni Hanania, ni Pelaia, baatendekele kubalondolwela bantu mizilo. 8 Baabelengele bwino bwino mu kitabu kya mizilo yakua Leza, ni kulondolola mpaka ni bantu baunvwisia byaali byabelengua.

9 Bantu bonse lubaunvwisiizie mizilo, baatendekele kulila. Ni pakako, Nehemia waali ndabukizi, ni kitambua Ezra kabili kasambilizia wa mizilo, pamo ni Balawi balia baali basambilizia bantu, baabaanine bantu bonse nangue, “Bono i busiku buzuuke bwakua Yawe Leza wenu, kansi tekuloosie, ao kulila.” 10 Nehemia waalandile evi, “Ale bwelele ku nghanda muye mukite nsikunkulu, mulie manone, ni kumina divai isonsele. Inzi tekulabe kubapeelako balia basili na bilio bingi pantu bono busiku i busiku buzuuke bwakua Yawe Leza wetu. Tekuye mwali ni bulanda pantu nsansa yakua Yawe i maka enu.”

11 Ni pakako, Balawi baatalaziizie bantu bonse balanda nangue, “Talale pantu bono busiku buzuukile, kabili tekuye mwali ni bulanda.” 12 Kupwako, bantu bonse baya ku kulia ni kumina, ni kutwalilako basikwete nsempu ya bilio, ni kusangalala sana, pantu baunvwisiizie twebo tubaabelengeelue.

13 Busiku bwa bubili, bamasiiko ba mikowa pamo ni babitambua ni Balawi, baamukolonghaniine kalemba Ezra kuti basambilile bwino bwino twebo twa mizilo. 14 [a]Ni bo baasangile mwalembelue mizilo ya-aninue Musa na Yawe nangue Baizraeli bapalile bakabe baikala mu mitanda pa busiku bwa nsikunkulu ya mwezi wa kilooba, 15 kabili nangue, bapalile kupunda mu mizi yabo yonse pamo ni mu Yeruzalemu balanda nangue, “Sele ku lupili muye mutwame misambo ya mizeituni, ni misambo ya mizeituni ya mu kisonso, ni misambo ya ngazi, ni ya bunkindu, ni ya bimuti binge bikata, evi muye mwimike mitanda nga mulandiile mizilo.”

16 Kupwako, bantu baya kutwama misambo, bakitilako mitanda kubalua muntu pa muulu wa nghanda yakue, ni mu misolo yabo, ni mu misolo ya Nghanda yakua Leza, ni pa kifuka kikata kili pa mulyango wa menda, pamo ni pa kifuka kikata kya pa mulyango wa Efraimu. 17 Ni bonse baafumine mu buzia, baakitile mitanda, ni kwikalamo, pantu kutula ku nsiku yakua Yoshua mwina Nuni, mpaka pa bobo busiku, Baizraeli baali tebanakitepo nsikunkulu ya ozu musango. Kabili yaali nsansa ikata sana. 18 Kubalua busiku, kutula busiku bwa mambo, mpaka busiku bwa mpeleezio, Ezra waali wababelengela bantu kitabu kya mizilo yakua Leza. Ni busiku bwa kilooba, baakitile nsikunkulu. Busiku bwa mwanda kwaali kulonghana kuzuuke nga mubeeleele mafunde.

<- NEHEMIA 7NEHEMIA 9 ->