1 Mu mwezi wa Nisani, mu mwaka wa 20 mu kuteeka kwakua likolo Artasasta lu-aaleeteelue divai, naipokeleele ni kumutwalila likolo. Pa ozo musita naali nsinamonekepo wa bulanda ku menso akue, inga sie bobo bwenka busiku. 2 Likolo wangipuziizie, “Wewe teulwele, ale kiubeeleele ni bulanda ni kiki? Uli nga we ali ni bwavia mu mutima.”

Ni nene naatiinine sana. 3 [a]Na-asukile, “We likolo, ba wali ni bukose muyayaya. Ale ndikuwaminua syani koku muzi wane waaziikiluemo babikolue bane wasyele kibolia ni milyango yonse yaziziiziwe na mulilo?”

4 Likolo wangipuziizie, “Ukebeleki?”

Ni ne naapepele kuli Leza wa mwiulu. 5 I lunaamwasukile likolo nangue, “Kine kuti kyamuwamina likolo, kabili kine ne mubombi obe naitabilua ku menso obe, kuti kyawama untume ku Yudea mu muzi uziikiluemo babikolue bane kuti nkabe kuya kukuula paakale.”

6 Likolo wangipuziizie ni nabeeza waikeele pepi nakue nangue, “Lwendo lobe lwaakaba lwa nsiku inga? Kabili waakabwela musitaki?” Evi kyamuwaamiine likolo kuti an'mpeele nsambu ya kuya, ni nene i pakumwana musita.

7 Kabili naamwanine likolo nangue kine kuti kyamuwamina, an'mpeele mpapulo ya kutwala ku ndabukizi ya mu biputu bya kyalo bya ku bwala mwenzi evi bakangitabizie kupita mpaka kuya kufika mu Yudea, 8 kabili nalomba n'mpeelue lupapulo lwa kutwala kuli Asafu aliwasunga musitu wakua likolo, evi nkapeelue mbao ya kukita milyango ya byubo bya Nghanda yakua Leza, ni milyango ya mu kibumba kya muzi, ni ya mu nghanda mu naakaba naikala. Ni likolo wan'mpeele mwaali mwabeeleele buwame bwakua Leza pali nene.

9 Kupwako, naya kufika ku ndabukizi ya mu biputu bya kyalo bya ku bwala mwenzi wa Efrati, nabapeela mpapulo yaafumine kuli likolo. Ni likolo wantumine pamo ni bakulu ba balukale, ni baseli ba pa bafarasi kuti ngie pamo nabo. 10 Sanibalati Muhori, ni kiloolo Tobia Muamoni lubaunvwile ezi mpunda, baafiitilue sana pa mulandu wa muntu waizile kukebela Baizraeli mutende.

11 Lunaafikile ku Yeruzalemu, naikeeleko nsiku itatu, pa kyamba kya nsiku itatu, 12 naabuukile busiku, pamo ni bange bantu, kabili nsyaabwilileko muntu keebo kana-aninue na Leza wane kakuti nkabe kukita ku Yeruzalemu, kabili nsyaile na tunge tunama, inga sie kalia kanaali naselelepo. 13 Naafumiine ku mulyango wa lulambe busikunke, lya ku lubali lwa kiina kya menda kya nghina nzoka, ni ku mulyango wa kizyalala, ni kumona kibumba kya Yeruzalemu vikyaali kyatuutilue, ni milyango viyaali yaziziiziwe na mulilo. 14 Kabili naile mpaka ku mulyango wa kasulo, ni ku kiziba kyakua likolo, inzi tekwaali nkendo ya kupitapo ni punda unaali naselelepo. 15 Kupwako, nasela busikunke mu lulambe nalimukukazia kibumba kya muzi. Pa kyamba naabwelele ni kuya kwingila pa mulyango wa lulambe unaafumiinepo.

16 Babiloolo tebaamanine kunaali naile, kabili tebaamanine kinaali nakita. Bayuda, ni babitambua, ni bamasiiko, ni babiloolo, pamo ni balia bonse baali babomba ezi miilo, nsyaababwilile. 17 Kupwako, nabaana nangue, “Mone maavia atuli nao, Yeruzalemu wasyala kibolia, ni milyango iziziiziwe na mulilo! Ize tukuule paakale kibumba kya Yeruzalemu, evi tekuti tuye twafuupulua kabili.” 18 Naabalondolweleele buwame bwakua Leza vibwaali bwali pali nene, ni vina-aninue kuli likolo.

Baalandile nangue, “Ale twende tukuule paakale.” Kupwako, babamba ozu mwilo uweme.

19 Inzi Sanibalati Muhori, ni kiloolo Tobia Muamoni, pamo ni Gesemi Muarabu lubaunvwile ezi mpunda, baatusekele sana ni kutupunika balanda nangue, “Ni kiki keki kimulimukukeba kukita? Mulimwakeba kumusangukila likolo?”

20 Naabaasukile, “Leza wa mwiulu waakatupaala. Ni pakako, fwe babombi bakue twakaba kubamba kukuula paakale, inzi mwemue temuli na nsempu, ao nsambu, kabili temukalangulukua mu Yeruzalemu.”

<- NEHEMIA 1NEHEMIA 3 ->