1 Amrafeli likolo wa ku Sinari, ni Arioki likolo wa ku Elasari, ni Kedori-Laomeri likolo wa ku Elamu, pamo ni Tidali likolo wa ku Goimu, 2 baile kulua na Bera likolo wa ku Sodoma, ni Birsa likolo wa ku Gomora, ni Sinabu likolo wa ku Adima, ni Semeberi likolo wa ku Zeboimu, pamo ni likolo wa ku Bela (i Zoari). 3 Azo makolo asaano pamo ni balukale babo baakolongheene mu lulambe lwa Sidimu. Pa ono musita i muli Lyezi lya Mukele. 4 Azo makolo aabombeele likolo Kedori-Laomeri myaka lyanondo ni ibili. Inzi mu mwaka wa lyanondo ni itatu, azo makolo aasangukile. 5 Mu mwaka wa lyanondo ni ina, Kedori-Laomeri ni makolo a-aunvwene nao pamo ni balukale babo, baumine Barifaimu mu Hasteroti-Karnaimu, ni Bazuzimu mu Hamu, ni Baemi mu Sawe-Kiriataimu, 6 ni Bahoriti ku lupili lwa Seiri. Baile babakumbile mpaka kubafikia ku Eli-Parani pepi ni kaseeba. 7 Kabili baabweleele ku Eni-Misipati (kulikwakuutua Kadeshi), baumine kyalo kya Ba-amaleki, ni Ba-amori baali baikeele mu Hasasoni-Tamari.

8 Kabili likolo wa ku Sodoma, ni wa ku Gomora, ni wa ku Adima, ni wa ku Zeboimu, pamo ni wa ku Bela (i Zoari), baile kutantama mu lulambe lwa Sidimu pakuti balue nabo. 9 Kedori-Laomeri likolo wa ku Elamu, ni Tidali likolo wa ku Goimu, ni Amrafeli likolo wa ku Sinari, pamo ni Arioki likolo wa ku Elasari. Aza makolo ana aile kulua na makolo asaano. 10 Mu lolo lulambe lwa Sidimu mwaali mwali biina bingi bya kabulimbu. Likolo wa ku Sodoma ni wa ku Gomora lubaabutukile, baile kuponena mu biina. Inzi babo bange batatu baabutukiile ku mpili. 11 Azo makolo ana aatweme bunonsi bonse bwa mu Sodoma ni mu Gomora pamo ni bilio ni kuya nabio. 12 Loti mwina mwalawakue kwa Abramu waali waikeele mu Sodoma, ni ye kumo waatwaminiinue pamo ni bintu byakue.

13 Kwaali muntu umo waabutukile ku bobo bului ni kuya kutwala mpunda kuli Abramu. Abramu waali Muebrania waali waikeele pepi na bimuti byakua Mamure Muamori wa kwakue kwa Eskoli, ni wa kwakue kwa Aneri. Baba i baali bamukwasia Abramu. 14 Abramu lu-aunvwile nangue mwana mwina mwalawakue akwetue, waakolonghaniizie balalume 318 ba mu nghanda yakue, bantu baali basambiliziiziwe bului. Baile babakonkele mpaka ku Dani. 15 Musita wa busiku, Abramu waabasalanghaniizie bantu bakue mu mabumba mabumba ni kuya kusakukila balwani babo. Waaboomine ni kubakumba mpaka ku Hoba, ku nkungua ya Damaski. 16 Ni pakako, waabweziizie bintu byonse, ni kumubwezia Loti mwina mwalawakue pamo ni bintu byakue byonse. Kabili waabweziizie banakazi pamo ni bange bantu.

17 Abramu lu-aafumine ku kuuma balwani bakue, Kedori-Laomeri pamo ni ange makolo a-aunvwene nao, likolo wa ku Sodoma waile kusensekela Abramu mu lulambe lwa Sawe (ao Lulambe lwakua Likolo). 18 [a]Ni Melkisedeki waali likolo wa ku Salemu, kabili waali kitambua wakua Leza Kabezia Mpungu, waatwele mukate ni divai kuli Abramu, 19 ni kumupaala walimukulanda nangue, “Abramu apaalue na Leza Kabezia Mpungu, Kalenga wa lyulu ni kyalo! 20 Alumbue Leza Kabezia Mpungu waakupeele maka a kuuma balwani bobe!” Abramu ni ye waamupeele Melkisedeki kamo ka pa lyanondo ka pa bintu byonse.

21 Likolo wa ku Sodoma waamwanine Abramu, “N'mpeeleko sie bantu we usyale ni bobo bunonsi.”

22 Abramu wa-anine likolo wa ku Sodoma nangue, “Nene nalapa ntanzi yakua Yawe Leza Kabezia Mpungu, Kalenga wa lyulu ni kyalo 23 nangue, nene nsitwamapo kantu pa bintu byobe byonse, anzia kine ni nyunzi ao mukonda wa pa nkwabilo, evi tekuti ukalande nangue, ‘Nene i waamunonsiizie Abramu.’ 24 Inzi wewe lipako sie bilio byaaliile balukale ni kulipa bantu bankwasiizie: Aneri, ni Eskoli, pamo ni Mamure, evi baye nabio.”

<- KUTENDEKA 13KUTENDEKA 15 ->