1 Abramu ni mukazi wakue pamo ni byonse bi-aali nabio, baafumine ku Misri ni kuya ku Negebu. 2 Abramu waakilile kuba munonsi wa biteekua, ni wa mutofue pamo ni wa oro. 3 Waafumine ku Negebu mpaka waya kufika ku Beteli, palia paali waimikilenke liema lyakue pa bukata bwa Beteli ni Ai. 4 Papo i paali ni kitale ki-aakuulile pa mambo. Pa ezio nkendo Abramu i paali wamupupila Yawe.

5 Loti waile pamo ni Abramu, ni ye waali wakwete bisepe bya nghombe ni mikooko, kabili waali wakwete ni maema. 6 Inzi nkendo ya kulisiiziamo nama yabo yaamwenekele kukeepa, pantu baali bateekele nama ingi. Ni keki i kyaalengele tekuti bekale pamo. 7 Basungi ba biteekua byakua Abramu ni basungi ba biteekua byakua Loti baatendekele kukankabula. Ozo musita Bakanaani ni Baperizi, baali bakikeele sie mu kekio kyalo.

8 Abramu Waamwanine Loti, “Ewe, mona fwefue tuli benenke. Bantu bobe ni bantu bane, tebapalile kuya bakankabula. 9 Ni pakako, namona kuti tulekenkane. Saakula nkendo i utonene. Kine ulikuya lya kuso, nene ndikuya lya kulio, kine ulikuya lya kulio, nene ndikuya lya kuso.”

10 [a]Loti waakentele ni kumona lulambe lonse lwa Yordani, mpaka ku Zoari kwaali kwali menda engi nga bukaba bwakua Yawe, ao nga kyalo kya Misri. Pa ozo musita Yawe waali tanainoone mizi ya Sodoma ni Gomora. 11 Loti waasaakwile lulambe lonse lwa Yordani ni kuya lya ku kabanga. Evi i vibaalenkenkeene. 12 Abramu waikeele mu kyalo kya Kanaani. Loti wene waikeele pa bukata bwa mizi mu lulambe ni kwimika maema akue pepi ni Sodoma. 13 Inzi bantu ba mu Sodoma baali bali babi ni ba bibalo bingi ku menso akua Yawe.

14 Loti lu-aile, Yawe waamwanine Abramu nangue, “Kenta lya ku nkungua ni lya ku nkungulua, kabili kenta lya ku kabanga ni lya ku mboosi.” 15 [b]Yawe wamwanine Abramu nangue, “Keki kyalo kyonse kiwamona, naakakupeela wewe ni nvyalo yobe kuti kikabe kyenu lonse. 16 Naakakita nvyalo yobe kuba nga lufunko lwa pa kyalo, nvyalo isikavinda kupendua na muntu. Inzi kine muntu waakavinda kupenda lufunko lwa pa kyalo, ni vyalo yobe waakavinda kuipenda. 17 Ale endo waya mu kuleepa ni mu kutana kwa kyalo pantu i kindikukupeela.” 18 Abramu waakuusiizie liema ni kuya kwikala pepi na bimuti bya Mamure ku Hebroni ni kukuulako kitale kyakua Yawe.

<- KUTENDEKA 12KUTENDEKA 14 ->