5
Omusengero gw’esêzi
1 Gwârhi omukulu w’abimbiza. Oku rhurhêra. Lulanga lwa Daudi.
2 Oyumvîrhize izù lyâni, Yâgirwa Nyakasane,
omusengero gwâni oguyumve.
3 We ndwîrhe nâganîza, Mwâmi wâni na Nyamuzinda wâni,
we nsengîre Yâgirwa Nyakasane.
4 Erhi gubà mucêracêra,
erhi mîra izù lyâni lyahikaga emund’oli;
sêzi-sêzi erhi nkola ndwîrhe nakusêngera nandwîrhe nalangûza.
5 Bulya orhali Nyamuzinda wa kusîma mabî,
Yâgirwa; enkola-maligo orhankaziga yakujaho
6 Nanga, emihera erhankakuyimangaho
abajira ebigalugalu, orhababâkwo
7 Abaderha obunywesi, kuheza obaheza;
omuntu osîma omukò n’olyaliha,
Nyamuzinda arhamubonakwo
8 Ci niehe, bwonjo bw’obuzigire bwâwe bunene burhumire,
najà omu mwâwe; nacîkweba oku idaho,
nkuharâmye omu bwâmi bwâwe butagatîfu.
9 Nyakasane, onange omu bushinganyanya bwâwe,
bulyâla abanzi bampisire eka;
enjira yampisa emwâwe, oyiyumanyanye.
10 Bulyâla omu kanwa kâbo murhabà oburhali bunywesi,
omurhima gwâbo guyunjwîre bubî;
omurhima gwâbo eri nshinda nyigule,
n’olulimi lwâbo kali kêre ka môji abirhi.
11 Obamalîre, Yâgirwa Nyamuzinda
ojire batulikanyè n’emihigo yâbo mibî;
obakage, batumbaguze,
abo banyankola-maligo, bulya bàkugomîre!
12 Ci abacikwîkubagira, barhulûle banasîme;
bacîkwitakire emyâka n’emyâka bulya bayimangîrwe nâwe;
bacîshinge muli we abasîma izîno lyâwe!
13 Bulya we Nyamuzinda, we hà omushinganyanya obwangâ;
we mucinga n’obuzigire bwâwe,