LUKA 14

Yezu afumya omuntu w’akabunda olwa-Sabato

(Mat 12, 11; Luk 13, 15)

1 Okuhandi, olwa sabato Yezu anacijà omu mwa mukulu muguma w’omu Bafarizeyi mpu ayikule, nabo bakàmuhengûza. 2 Obwo erhi muntu muguma walwâla akabunda ali embere zâge. 3 Yezu anacibwîra abashamuka b’ihano n’Abafarizeyi, erhi: «Ewe, ka kuyêmêrîrwe okufumya omu lwa-Sabato erhi nanga?» 4 Bagumagumya. Anaciyanka olya mulwaâla, amufumya, amulika. 5 Okubundi ababwîra, erhi: «Ndi muli mwe, omugala, nîsi erhi enkafu yâge yankarhogera emugoke, alek’iyizikûla ho na halya omu lwa-Sabato?» 6 Banacibula oku bankamushuza.

Okucîshoga ebibwârhalo

(Mat 23, 12)

7 Okubundi atwa abàli balâlisirwe omugani, bulya amâbona okubacîshoga ebibwârhalo by’embere. Anacibabwîra, erhi: 8 «Nka oli mulâlike oku buhya, orhahîra mpu ocidêkereze oku ntebe ntanzi, bulya erhi omukengwa kukulusha ankayisha anali mulâlike naye, 9 “owammulâlika mwe naye alek’ikubwîra, erhi”: “Hundusa oyu oku ntebe, lyo orhaj’itamala n’enshonyi oku ntebe y’enyuma”. 10 “Ci irhondo okalâlikwa, onagend’icîtamalira oku ntebe nzinda, lyo owakulâlikaga, hano ayisha, akubwîra, erhi”: “Mwîra wâni, yegera embere!” “Obwo wanakengwa na balya muli balâlike mwe nabo”. 11 “Bulya ngasi muntu ocîkuza arhôhibwa, naye ocirhohya akuzibwa”».

Abakwânîne okulâlikwa

12 Anacibwîra n’olya wali omulâlisire, erhi: «Nka wajira idinie lya mûshi erhi lya bijingo, orhalâlikaga bîra bâwe, erhi bene winyu, erhi ab’omulala gwinyu, erhi bâlungwè bâwe bagale, lyo barhish’ikulâlika nabo, lunalek’ibà luhembo lwâwe. 13 Ci nka wajira idinie, onahamagale abakenyi, ebirema, abakunagizi n’emihûrha. 14 Obwo wanayish’ibona iragi, kulya kubà barhagwêrhi eci bakugalulira! Bulya wayish’igalulirwa aha bufûke bw’abimâna».

Abalâlike balahiraga okuyisha

(Mat 22, 2-20)

15 Muguma wa muli balya balâlike, erhi ayumva ntyo, amubwîra, erhi: «Iragi lyâge owânalye oku biryo by’omu Bwâmi bwa Nyamuzinda!» 16 Naye anacimushuza, erhi: «Muntu muguma anacijira idinie, alâlika bantu banji. 17 “Erhi amango g’okulya gahika, arhuma omwambali mpu aj’ilâlûla abalâlike, erhi”: “Mpu muyishage, bulya byoshi biri birheganye”. 18 “Ci bôhe babà nka balaganîne boshi, barhondêra okuhûna obwonjo. Omurhanzi, erhi”: “Nzind’igula ishwa, kukwânîne ngend’ilirhangula; nkuhûnyire, ombabalire”. 19 “Owundi, erhi”: “Nzind’igula mahali arhanu ga nkâfu[a], nkol’ij’igagereza, nkuhûnyire, ombabalire”. 20 “Owundi aderha, erhi”: “Nzind’ijà omu buhya, co cirhumire ntayisha”. 21 “Olya muganda erhi agaluka, abwîra nnawâbo okwo. Nnanyumpa anacikunira, abwîra omwambali, erhi”: “Okanye, ojè omu mashanganizo n’omu njira, ngasi bali bakenyi n’ebirema, n’emihûrha, n’abakunagizi, obalêrhe”. 22 “Omwambali, erhi”: “Waliha, najizire nk’oku warhegekaga, n’obugali ho buciri”. 23 “Nnawâbo olya mushi amubwîra, erhi”: “Ogonye engo n’enjira, osêze abantu bayishe, kuhika enyumpa yâni eyunjule”. 24 “Bulya mmubwîzire oku balya bantu bali balâlike barhâbayize ciru n’omuguma oku idinie lyâni”».

Owalonz’ishimba Yezu aleke byoshi

25 Ngabo nyinji yamukulikira. Anacihindamuka, ababwîra, erhi: 26 «Omuntu walonz’inshimba, akabà arhashombiri îshe, na nnina, na mukâge, n’abâna bâge, na bene wâbo, na bâli bâbo, ciru n’obuzîne bwâge, arhankabà muganda wâni. 27 “N’orhabarhwiri omusalaba gwâge, akankulikira, arhankabà muganda wâni”. 28 “Ndi muli mwe, akalonz’iyûbaka omutungo, arharhang’ibwârhala, akaganja bici gwafà n’okulola erhi agwêrhe ezaguyunjuza”; 29 “arhag’ibanda eciriba busha arhanayunjuze omutungo, lyo n’abantu bagera barhamushekera, mpu”: 30 “Loli omuntu warhondêraga okuyûbaka, lêro ayabirwa n’okuyunjuza!” 31 “Nîsi, mwâmi ohi wankarhabala mpu aj’ilwîsa owâbo mwâmi, abule kurhang’ibwârhala agerêreze erhi n’omurhwe gwâge gwa bihumbi ikumi ahash’ikoza owâbo nn’ebihumbi makumi abiri?” 32 “Bulya erhi ankarhînya, anarhuma obugo, owâbo aciri kulî, ahûne mpu bayumvanye”. 33 “Ntyo ninyu kwo na kuguma”: “ngasi yêshi orhalesiri ebi ajira, byoshi, arhankabà muganda wâni”».

Olwiganyo lw’omunyu

(Mat 5, 13; Mrk 9, 50)

34 «Omunyu gubà mwinjà. “Ci kwônene erhi gwankagaga, bici gwankacilungwamwo?” 35 “Gurhankacikwânana omu ishwa ciru erhi oku câvu: gwanakabulirwa erubala”. “Ogwêrhe amarhwîri g’okuyumva, ayumve!”»

<- LUKA 13 LUKA 15 ->