1 Ŋ hotta ɗoopaat, a pulohha cookmi, a raakee wiic ndaŋkiyaah na haf yasna-kanak, wiic nu nga raakka mbahne-buur te haf nu nga ɗah fiisuusa tiik ɓaseeh ŋ Kooh. 2 Ɗoopti ŋ hot mandee na ciɓndo, kot ciŋ ɗe mandee na kot uursu*13:2 uursu: a ɗoopaat saahiɗ, hafiŋ ɗe mand na haf ɓuu, waaye a yi uup yak gaynde., nguɓiŋ ɗe mannda na nguɓ gaynde ; iiñ-safaali eɗta ɗe hatiliŋ ɗe na ɓoofoha-buur, wiŋ ɗe, a tummba ɗe kilifa keeh-keeh.

3 Yino ŋ haf ciŋ ɗe mandee na ini gaañuk gaañi na ape. Waaye gaaña min ap waam wirra. Ɓi kehƴi jen feyuusa ŋ ineem, ɓa ñaakiɗta ɗoopta. 4 Ɓooɓa ñaamukka iiñ-safaala, sagu tuma a tumee ɗoopta kilifa. Ɓa jen ɓa nammba ñaamuk ɗoopta, ɓa woyeeɗa ne : « Yaa mand na ɗoopti ? Yaa min hiñoh na ɗe ? »

5 A onuusa ne a woyee woo yaksiɗkoha na woo ɓaseeh ŋ Kooh. A onuusa ne a tiindiɗ ini neɓ ɗe caɓin ndaŋkiyaah-nikiis na kanak (42). 6 A cammba ɓas Kooh, a ɓaseeɗa tiikiŋ Kooh, na genohaanaŋ Kooh, na ɓi gen ŋ Eel ci jen. 7 A teyɗohuusa hiñoh na ɓo'-Kooh, a nammba teyɗohu ne a saah ɓa ; a rahassa hatili a degohan heet ci jen yaah na cuuɓ ci jen na peɗeem ci jen na kur ci jen. 8 Ɓooɓi gen kehƴi jen hey ɗe ñaamke, ɗal ɓi tiik ciŋ ɓa fiisu wa Adina feru ngaŋ teerndiŋ kipes ki, wiŋ Kuyiŋ Mbaali ƴini hoosu.

11 Ŋ nammba hotis ɗoopaat wiiriis a pulohha kehƴi, a raakee wiic kanak findi wiic kuy mbaal ƴin, waaye a jombee findi iiñ-safaal. 12 A tiindɗoheeɗa hatiliŋ ɗoopti koc jen, ŋ fiki yeem. A ɓekka kehƴi na ɓi gen nga ne ɓa ñaamuk ɗoopti koc, ya gaañkee gaañi na ape te a wirra. 13 A tumeeɗa ɓi firnde yakak feyohiɗ, po a ruhsiɗeeɗa yongkaah puloh eel ci ngaŋ kehƴi ŋ fiki ɓooɓa jen.

14 Ŋ ineem a muuƴiɗta ɓi kehƴi sagu in ci feyohiɗ ci a onsee ne a tum ca ŋ fiki ɗoopti koc. A haɓɗiɗukoheeɗa ɓa nataaliŋ ɗoopteem, yi gaañsee na ndang te a pesissa. 15 A onuusa ne a pesiɗ nataaliŋ ɗoopti koc, wa min jomb, wa tum po ɓo' nu ñaamukɗaa ɗah, a apu. 16 A junnga ɓooɓa jen ne ɓa waakɗu mandarga ŋ yaah-ñaahum wala ŋ puk, yakak na komaaki, raakiɗ na ñakiɗ, ñaam na nikaaɗi ñaam. 17 Ali ɓo' mineeɗi rom wala toon ne fu raakɗi mandargaaneem ɗah, weɗ tiikiŋ ɗoopti wala kindi hend na tiikiŋ ɗe.

18 Ndii, wa meeksoh inah-inah. Ɓoyi ñaañ waakaat kindi hend na tiikiŋ ɗoopti, ini wa tokis. Wa kindi hend na tiik ɓo', wa teemet-yasna-yino na ndaŋkiyaah-yasna-yino na yasna-yino (666).

<- Teeɓ ki 12Teeɓ ki 14 ->