Link to home pageLanguagesLink to all Bible versions on this site
12
Iiñ-safaali na ɓitɓi
1 Firnde yakak pulla ŋ eel ci, a nikee ɓitiɓ, a lipukka nohi, caɓni nikka ŋ ooɓ kot ciŋ ɗe, mbahne-buur haɓɗohu hor ndaŋkiyaah na kanak (12) willa hafiŋ ɗe. 2 A nikee rook po heeɗa ɓasle, a leehkeeɗa raak ɗe miskasseeɗa keeh-keeh.

3 Firnde wiiriis pulissa ŋ eel ci : a nikee iiñ-safaal yakoh na yakoh ruumind haa yongkaah, a raakka haf yasna-kanak na wiic ndaŋkiyaah ; haf nu nga, raakka mbahne-buur. 4 Na koseekiŋ ɗe, a ɓoorra haaƴ yino ŋ haaƴ ci kaahay ciŋ hor ci ; a njaffa ca ŋ kehƴi. A tufukka ŋ fiki ɓitɓa ne yeem ɓasil rek ɗah, a ñam kuɓka.

5 Ɓitɓa ɓasilla kuɓu ƴaar yi adgohan cuuɓ ci jen adgoh dengiɗ na salma. Kuɓkiŋ ɓitɓi arra rapɗu ŋ sero Kooh, yi Buur, na sero ɓoofohaaniŋ ɗe.

6 Ɓitɓa nak, a saandohha ŋ kehƴa hulanga, ɗiska Kooh kooɗkiɗee ɗe ne a nik nga, a eɗsee kañam ini ree neeh junni na teemet-kanak na ndaŋkiyaah-yasna-yino (1260).

7 Ŋ ineem hiñoh raakka ŋ Eel ci, Mikayel na malaakaaci a adgoh hiñoheeɗa na iiñ-safaala na malaakaacaŋ ɗe, iiñ-safaala na malaakaacaŋ[a] ɗe nameeɗa hiñoh na ɓa. 8 Waaye iiñ-safaala raakɗi ndam nga, tahha po a yi na malaakaaciŋ ɗe, ɓa raakisɗi nikoha ŋ Eel ci. 9 A njafuusa ŋ hara a yi iiñ-safaali yakki, iiña ɗeɓgaan yi na woyse siɓniɗi, wala Seytaani, yi na ñaañohe Adina jen ; a njafuusa ŋ kehƴi a yi na malaakaaciŋ ɗe.

10 Ƴutta, ŋ kerahha ŋ Eel ci hooso meeɓuuɗ woyeeɗa ne :

« Ɗiski wa nik jamanooniŋ muci hayiɗ,
Koohiŋ ɓoo teeɓohiɗ hatiliŋ ɗe,
a tufkiɗta Nguuriŋ ɗe.
Ɗiski wa nik Kiristaaniŋ ɗe teeɓohiɗ min-min kiŋ ɗe.
Seytaani, yi na yambe ɓaah ciŋ ɓoo
te a meeɗta ɓa yamb noh na wek
ŋ fiki Koohiŋ ɓoo,
a njafuuɗ ŋ hara.
11 Waaye ɓeɗ ɓi ɓaah ciŋ ɓoo,
ɓa saahiɗ ɗe sagu ñif miŋ Kuyiŋ Mbaali ƴini
na woo kiŋ seedeeciŋ ɓa,
laam ɓa adgiɗeeɗi kiñin ciŋ ɓa,
ɓa sangeeɗi kaan.
12 Weɗ tah,
Eel ci na ɓooɓi gen nga,
neɓsiɗkaat !
Waaye mas kehƴi na cookmi.
Laam Seytaani ruhsiɗ nga ɗu
ayrukoh na ayrukoh
sagu inhi a inah ne
jamanooni a taskoh laayɗi. »
13 Wa iiñ-safaala hot ne a njafuuɗ ŋ kehƴi, a taambiɗta ɓitɓa ɓaslee kuɓka ƴaara. 14 Waaye ɓitɓa rahassa paɓ ci kanak ciŋ caangooni yakki ne a pund a kaɗ kehƴa hulanga, ɗiska a kooɗkiɗu ne a eɗu kañam nga, ini ree kiis kaahay na camban ; a ussa iiña.

15 Iiña puussa masuɓ laayiɗ haa huluɓ ŋ finho ɓitɓa ne wa coottoh ɗe. 16 Waaye kehƴi hirippa ɓitɓa, wa rangsukka, wa onnda masma iiña puuse. 17 Ŋ ineem, iiña ayrukka ɓitɓa, a kaɗta hiñoha na ɓi tas ŋ ɓi rimkoh nga ɗe, ɓi na taambɗe nakoh ciŋ Kooh te ɓa rissa ñaakiɗ in ci Yeesu woo. 18 Iiña tufukka ŋ sereendaŋ cookma.

<- Teeɓ ki 11Teeɓ ki 13 ->