Macce 19

Faɗ ɓitiɓ

1 Wa Yeesu ƴut woo woo ceem, a kurkohha Galile, a kaɗta ɓakaŋ kur caŋ Yudee ŋ finho kalaŋ Yurdan. 2 Mboolo yakak ñaakiɗta ɗe nga, a wiriɗta kosaayiɗ caŋ ɓa.

3 Farisen ci hayya nga ɗe, ɓa waaɗta ɗe woyɗukoh woo uupiɗ, ɓa meekissa ɗe ne : « Andi waasi teyɗohiɗ ne, wa neɓ ƴaar ɗah, a miniɗ faɗ ɓitiice ŋ in na nu wa min ki nik ɗah ? » 4 Yeesu loffa ɓa ne : « Wa mand haa ne ɗu jangɗi ŋ Fiis ci ne Kooh yi ferohi, wi a na fere ŋ camba, a fer ɓa ƴaar na ɓitiɓ ; 5 a woosa ne : “ Weɗ tah ƴaar hey saɓsukohe na yaay na baab, a ŋoɗ ŋ ɓitiice, jaar ɓa kanak, ɓa nik faan yino.[a] ” 6 Mbaa, ɓa nikisɗi kanak, ɓa faan yino kotii. Kon, ini Kooh ambsoh, ɓo' kinaata saɓsoh. »

7 Ɓa woosa ɗe ne : « Moo wa ye tah Musaa nakohha ne ɓo' faɗe ɓitiice ɗah, a fiisɗaat ɗe kayti teeɓoh ne a faɗiɗ ɗe ? » 8 A woosa ɓa ne : « E ndengi ɗu ndeng keeñ weɗ tah Musaa teyɗukiɗta ɗu ineem, wa nikoheeɗi ɗaa ŋ cambohaana. 9 Waaye ñam na woyee ɗu ne : yaa nu saɓsukoh na ɓitiice te nikɗi ne yeem njaalo'ee njaaloo ; a ɓay ɓitiɓ wiiriis ɗah, a na njaalo'e. »

10 Taalubeeci woosa ɗe ne : « Nik ne wa mand ɗaa ŋ ƴaar ɗah, e tokaaɗi ɓitiɓ ngisoh ! » 11 A loffa ɓa ne : « E ɓooɓi jen minan teyɗuk ini maa hee woye wii haa, waaye e ɓi Kooh ona dong. 12 Laam raakiɗ ɓi nga, ɓa na rimke rimuk na yoomkiŋ ɓa, ɓum nga a ɓo' na ɓucee ɓa, raakiɗ ɓi nga, ɓa na tokeeɗi ɓitiɓ sagu Nguuriŋ-Ɗafki. Ɓoyi min teyɗuk, teyɗukaat ini ŋ woo. »

Yeesu na komaakci

13 Ɓi ɓo' ɓayeeɗa ɗe ɓi komaaki ƴin ne a deg ɓa yaah ciŋ ɗe, a kiimiɗ ɓa. Waaye taalubeeciŋ ɗe ngaskeeɗa ɓooɓeem. 14 A woosa ɓa ne : « Faɗaat komaakci, kinaat ɓa hondoh hay nga so, ɓooɓi mand na ɓa ɓeɗ raak Nguuriŋ-Ɗafki. » 15 A degga ɓa yaah ciŋ ɗe po ƴutta, a kurkohha ndaam.

Ƴaara na raak-raakaŋ ɗe

16 Weɗ ƴaar reɓoh ŋ Yeesu, a woosa ɗe ne : « Jangɗohohi, ŋ joy ye haɓiɗ in baahiɗ ne ŋ min raak kipes ki heyɗi reehe ? » 17 Yeesu loffa ɗe ne : « Wa ye tah fu meeksee so ŋ ini kaɗ ŋ baah ? A Yino dong baah te a Kooh. Fu waaɗ raak kipes ki keeh-keehi ɗah, taambɗa nakoh ci. » 18 Ƴaara woosa ɗe ne : « Ci nde nakoh ? » Yeesu woosa ɗe ne :

« Fu apanɗi ɓo' ;

fu njaaloo'anɗi ;

fu rokanɗi ;

fu woyɗanɗi ɓo' ini raakɗi ;

19 eɗa yaay ɗu na baab ɗu cir ;

te fu waaɗ morom fu findi fu waaɗoh haf fu.[b] »

20 Ƴaara woosa ɗe ne : « In ceem jen mi yii taambiɗ ca, ŋ taskohu ye wiiriis ? » 21 Yeesu woosa ɗe ne : « Fu waaɗ mit ɗah, kaɗa fu toon ini fu raak, fu eɗa ñakiɗ ci te fu hey raake alal ŋ Eel ci. Ƴut ɗah, fu hay, fu ñaakiɗ to. » 22 Wa ƴaara kerah woo ceem, a cooteeɗa goyoh na goyoh, a nikee heɗ raak-raak.

23 Yeesu woosa taalubeeciŋ ɗe ne : « Ñam na woyee ɗu wa te wa keeh, wa yooɓɗi ne heɗ raak-raak aas ŋ Nguuriŋ-Ɗafki. 24 Ñam na woyissee ɗu ne ngeelemb taamb ŋ ngul kufic weɗ uup yooɓ heɗ raak-raak aas ŋ Nguuriŋ-Kooh. » 25 Wa taalubeeci kerah woo keem, wa feyya ɓa po ɓa inhisɗi ini ɓa haɓɗan, ɓa woosa ne : « Kon a ya ɓa min mucɗu ? » 26 Yeesu marakka ɓa, woosa ɓa ne : « Wa wooñiɗ ɓo' waaye raakɗi ini wooñ Kooh. »

27 Ŋ ineem Piyeer woosa ɗe ne : « Moo ɓoo nak ? Ɓoo faɗiɗ in ciŋ ɓoo jen, ɓoo ñaakɗiɗ ɗa ; ɓoo raakan ye ŋ ineem ? » 28 Yeesu loffa ɓa ne : « Ñam na woyee ɗu wa te wa keeh, mbehi in ci jen na hee ɓoƴsohse, wi Kuɓkiŋ ɓoyi na hee ɓoofohe ŋ ɓoofoha-buuri na teeɓohe yaki a yak, ɗu ɓi na ñaakɗee so, ɗu hey name ɓoof ŋ ɓoofoha-buur ndaŋkiyaah na kanak (12) ne ɗu adgoh cuuɓ ciŋ Israayel ndaŋkiyaah na kanak ci (12).

29 Te yaa nu faɗ kahan, wala taambɗoh ƴaar mbaa ɓitiɓ, baab, yaay, kuɓu, wala yohon saguuso ɗah, ini a ñak, a heya rahse ini uup waas teemet (100) te a hey raake kipes ki heyɗi reehe. 30 Laayiɗ ŋ ɓi adug woti, ɓeɗ mirndohan, te laayiɗ ŋ ɓi mirndoh, ɓeɗ adgan.

<- Macce 18 Macce 20 ->