1 Waam weɗ taalubeeci reɓoh ŋ Yeesu, ɓa meekissa ɗe ne : « Ya ɓa uup ngaŋ Nguuriŋ-Ɗafki ? » 2 A ɓeeɗukka komaaki ƴin, a tufkiɗta ɗe ŋ leerooɓa, 3 a woosa ne : « Ñam na woyee ɗu wa te wa keeh, ɗu ɓoƴsohɗi mandohaaɗ po ɗu mand na komaaki ɗah, ɗu aasanɗi ŋ Nguuriŋ-Ɗafki.

4 Weɗ tah, yaa nu ruhsiɗ haf ce po haa komaakndii ɗah, a yi uupan ŋ Nguuriŋ-Ɗafki. 5 Te yaa nu teyɗuk njaanj findi yii saguuso ɗah, a teyɗuk ko. 6 Yaa nu bakaaɗɗukoh yino ŋ komaakci ƴin ci kos so ɓii ɗah, ini hee ngisohe nga ɗe, weɗ ne a toku atoh ɓitiɗ ŋ mbooh, a diigɗu ŋ ɗiska uup nooɗ ŋ cookma.

7 Mas adinaani ! In ci na ɓaye ɓo' bakaaɗ laayiɗ ! Te ca minɗi nik raakaaɗi waaye mas ɓoyi na hee ca ɓeke ! 8 Yaahiŋ ɗa wala kotiŋ ɗa waaɗ ɗa ɓek ŋ bakaaɗ ɗah, nguɗaa ca, fu mbet ca usiɗ ; aas ŋ kipes ki na yaah yino wala kot yino, weɗ ngisoh fu njafu na kot ciŋ ɗa kanak ci wala yaah ciŋ ɗa kanak ci ŋ yongkaaha ƴimanɗi muk. 9 Hasiŋ ɗa waaɗ ɗa ɓek ŋ bakaaɗ ɗah, nihsaa, fu mbeta usiɗ ; aas ŋ kipes ki na has yino weɗ ngisoh fu njafu na has ciŋ ɗa kanak ci ŋ yongkaaha yakka.

10 Kinaat heef ali yino ŋ ɓi ƴissuut cii ! Ee, ñam na woyee ɗu wa, malaakaaci na niiɗee ɓa nik ŋ Eel ci na gene hot jahran Baabiŋ ngo yi nik nga. [ 11 ] [a]

12 Ɗu liiɓ ye ŋ inii ? Ɓo' raak mbaal teemet (100), yino muuƴ nga ɗah, a faɗanɗi ndaŋkiyaah-yasna-nikiis na yasna-nikiis ci (99) ŋ tangoora a kaɗ waaka yi muuƴ e ? 13 Ñam na woyee ɗu wa te wa keeh, a hot ɗe ɗah, sumi a suman nga, weɗ uupan wi a sum ŋ ndaŋkiyaah-yasna-nikiis na yasna-nikiis ci muuƴaaɗiici. 14 Wa mand ɗaa, Baabiŋ ɗu yi nik ŋ Eel ci waaɗɗi ne ali yino ŋ ɓi ƴin cii muuƴ.

15 Ɓaah fu bakaaɗ [nga ɗa] ɗah, kaɗa nga ɗe kiik fu, fu woo na ɗe. A kerhiɗ ɗa ɗah, fu raakiɗ keeñiŋ ɗe. 16 A kerhiɗɗi ɗa ɗah, huna na ɓo' yino wala kanak, fu kaɗis nga ɗe. Laam, Fiis ci woo ne : “ Seede kanak wala kaahay raak ɗah, in nu nik miniɗ tufkiɗu.[b] ” 17 A sang ɓa kerhiɗ ɗah, woyaa ɓooɓiŋ Janguuni. A sang kerhiɗ Janguuni ɗah, ambaa ɗe findi kosaaɗi na juuti'oh.

18 Ñam na woyee ɗu wa te wa keeh : In nu ɗu sangoh ŋ kehƴi ɗah, wa hey nike ini Kooh sangoh ŋ Eel ci, te in nu ɗu teyɗuk ŋ kehƴi ɗah, wa hey nike ini Kooh teyɗuk ŋ Eel ci.

19 Ñam woyis ɗu wa [te wa keeh] : Ɓo' kanak kerhiɗoh nga ɗu ndii, ŋ kehƴi, ne ɓa kiim Kooh ŋ in nu wa min nik ɗah, Baabiŋ ngo yi nik ŋ Eel ci hey ɓa wa haɓɗiɗe. 20 Laam ɗisik nu kanak mbaa kaahay coh ŋ tiikiŋ ngo ɗah, mi yii ŋ harmban ɓa. »

21 Weɗ Piyeer reɓoh ŋ Yeesu, a meekissa ɗe ne : « Kilifaani, ɓaah ho tumee so in ɗah, ŋ joy ɗe ɗaas po waas hend na ? Waas yasna-kanak e ? » 22 Yeesu loffa ɗe ne : « Ŋ wooɗi ɗa waas yasna-kanak rek waaye, waas ndaŋkiyaah-yasna-kanak waas yasna-kanak (70×7).

23 Laam, Nguuriŋ-Ɗafki mand na inii : A nikee buur, a waaɗta ne dag ciŋ ɗe teeɓ ɗe ini a dengkohee ɓa. 24 Wi a camb, a komuusa dagi joy ɗe wirind saaku hanjar junni-ndaŋkiyaah (10.000). 25 A minɗi ɗe wirind. Ŋ ineem buuri nakohha ne dagi toonsaat findi ñaam a yi na ɓitiice na kuɓuuciŋ ɗe na in ci a raak jen, a wirndohu kombot ciŋ ɗe. 26 Waaye dagi ƴekka ŋ fiki kilifaaniŋ ɗe, a woosa ɗe ne : “ On ndo ƴissuut, ŋ hey ɗa ca wirnde jen ! ” 27 A misikka kilifaani lool, yeem ɗaassa ɗe kombot ki, a faɗta ɗe, a cootta.

28 Wi dagi pul, a cohha na ƴaar ɓaah na ɗe panguk, yi joy ɗe wirind dinaar†18:28 dinaar: wa hanjar haalis, dinaar yino weɗ pangkoh bumit wirndassee ŋ neeh yino ŋ jamanoonaam. teemet (100) dong, a ammba ɗe, a ooƴca ɗe ; a woosa ɗe ne : “ Wirind ndo koporiŋ ngo ! ” 29 Ƴaari ƴekka ŋ fikiice kiimeeɗa ɗe an : “ On ndo ƴissuut rek, ŋ hey ɗa wirnde. ” 30 Waaye dagi sannga tic, a taƴca ƴaari ŋ kaso, a sekeeɗa ne a wirind ɗe.

31 Dag ci ɓinooɓi hotta ini raak, wa misikka ɓa lool, ɓa kaɗta, ɓa naandsukka kilifaana findi wa raakoh jen. 32 Weɗi kilifaaniŋ ɗe nakoh ɗe ɓeeɗkiɗu, a woosa ɗe ne : “ Fu dag añaandiɗ ! Fu ɗaasnukiɗ to po ŋ ɗaassa ɗa ini fu joyee so wirind jen. 33 Morom fu joyeen ɗa nam misik findi fu miskohee so. ” 34 Kilifaani ayrukka, a taƴca daga ŋ kaso ne a mbugalu. Daga nikka nga, a sekeeɗa ne a wirind kombot kaŋ ɗe jen. »

35 Yeesu degga nga ne : « Baabiŋ ngo yi ŋ Eel ci tumohan na ɓo' nu nga ɗu ɗaa ne ɗu ɗaasɗi morom ciŋ ɗu na keeñ soosiɗ ɗah. »

<- Macce 17Macce 19 ->