1 Ŋ ineem, Kooh barke'iɗta Noohin na kuɓuuciŋ ɗe, a woosa ɓa ne : « Nikaat ɓasil, rimaatɗohaat po ɗu riifiɗ kehƴi jen. 2 Ɗiski wa nik ndii ɗoopaat ciŋ kehƴi na sel ci na in ci ƴin ƴin ci ŋ kehƴi na cuurund ci, ca hey ɗu neƴƴohe laam, ŋ hey ca dege ŋ yaah ciŋ ɗu. 3 Findi kidig ci, in ci na pese te ca yoonde, ŋ eɗiɗ ɗu ca jen, ca kañam nga ɗu kotii. 4 Waaye ɗu heyɗi ñame sepet na kipes kiŋ wa, weɗ ne, na ñif miŋ wa. 5 Ñif miŋ ɗu, weɗ nam nik kipes kiŋ ɗu ; weɗ tah ɗoopaat mbaa ɓo' nu aam ñif ɓo' ɗah, ŋ hey ɗa wa taambe ; yaa nu aam ñif miŋ morom fu ɗah, ŋ hey ɗa wa meekse. 6 Ɓo' nu aam ñif ɓo' ɗah, wiŋ ɗa hey aamse ; laam Kooh fer ɓo' ŋ ñaamaariŋ ɗe. 7 Nikaat ɓasloh, rimaatɗohaat po ɗu riifiɗ kehƴi. »

8 Kooh woyissa Noohin na kuɓuuciŋ ɗe ne : 9 « Mi yii ambtiɗoh na ɗu na ɓi na hee rimkohe nga ɗu, 10 na in ci na pese na ɗu jen, findi sel ci na ɗoopaat ciŋ kahan ci na ciŋ bilaf fi, ceɗ ci pul na ɗu ŋ gaali na in ci na hee pese ŋ kehƴi jen. 11 Ambtiɗohiŋ ngo na ɗu, wa na hee nikohe an : Ŋ heyɗi boomisse kipes na masuɓ laayiɗ te masuɓ laayiɗ ɗumbissanɗi kehƴi. »

12 A hannda deg nga ne : « Inii weɗ na hee teeɓohe ambtiɗohiŋ ngo na ɗu, ɗu na in ci na pese na ɗu, gomal nu gomal. 13 Ŋ tumiɗ ñaangi-ñaangiiniŋ ngo ŋ eel ci weɗ ini na hee teeɓohe ambtiɗohiŋ ngo na ɓi kehƴi. 14 Ŋ nangɗoh eel ci ŋ ɗafki te ñaangi-ñaangiini pul ɗah, 15 ŋ hey naandsuke harmban ndo na ɗu na cuuɓ ciŋ ɗoopaat ci jen. Masuɓ laayiɗ ɗumbissanɗi heɗ kiñin ci. 16 Ŋ hot ñaangi-ñaangiini puliɗ ɗah, ŋ naandsuk ambtiɗohi ŋ ambtiɗoh po faw na in ci na pese ŋ kehƴi jen. » 17 Kooh woyissa Noohin ne : « Ini teeɓoh ambtiɗohiŋ ngo na ɓi kehƴi, weɗi weem. »

18 Kuɓuuciŋ Noohin ɓa puloh ŋ gaala nikee Sem na Haam yi baabiŋ Kanaan, na Yaafet. 19 Ɓeɗ ɓi kaahay cii, ɓeɗ caacuuciŋ ɓooɓiŋ kehƴi jen.

20 Noohin nikka guuroh, a yi koc guur reseñ. 21 Wa raakka mbeh, a annda ŋ biiñaŋ wa po a laarra, a wolsukka po a hoolla ŋ ɗooƴ ɗiipaŋ ɗe. 22 Haam, baabiŋ Kanaan, hotta ɗe tas-ɓarang ; a woosa taambɗoh caŋ ɗe kanak ca nikee ŋ hara wa. 23 Ŋ ineem, Sem na Yaafet ɓayya uuf, ɓa deggaa ŋ yuug caŋ ɓa, ɓa tiindeeɗa paa finho po ɓa reesa, ɓa ulla ɗe wa. Ɓa yurhiɗkoheeɗi na baab ɓa laam ɓa waaɗeeɗi ɗe hot tas-ɓarang.

24 Wa Noohin laarsuk, a inahha ini kuɓkiŋ ɗe ƴini tum, 25 a woosa ne : « Kanaan nikaat ñaami uup heefu ŋ ñaam ciŋ ɓaah ciŋ ɗe. » 26 A ɓaatta nga ne : « Nikiɗi Koohiŋ Sem, a yakɗaah ! Kanaan nikaat ñaamiŋ Sem ! 27 Kooh ɓaataat saangniŋ Yaafet te a gen na Sem ŋ jam ŋ genohaacaŋ yeem. Kanaan namaat nik ñaamiŋ Yaafet. »

28 Ŋ finho toɓa yakka Noohin pesisiɗ kiis teemet-kaahay na kiis ndaŋkiyaah-yatuus (350). 29 A kaan wa a raak kiis teemet-yasna-nikiis na kiis ndaŋkiyaah-yatuus (950).

<- Camba 8Camba 10 ->