1 Ina masma na raake neeh teemet na neeh ndaŋkiyaah-yatuus (150) ŋ kehƴi jen, Kooh ɗaakkoheen Noohin nof, a yi na ɗoopaat ca nikee na ɗe ŋ gaala. Weɗ a puuɗsoh ŋ kehƴi, masma haawsukeeɗa. 2 Wa pulohee ŋ ɗooƴ kehƴi na wa juurkohee ŋ eel ci, ca tufukka ; toɓa seekka. 3 Masma cooteeɗa ƴin ƴin ; ŋ finho neeh teemet na neeh ndaŋkiyaah-yatuus ceem (150), wa haawsukka kotii. 4 Mbaɗi, caɓna yasna-kanakɗoh raakee neeh ndaŋkiyaah na neeh yasna-kanak (17) ; gaala gaƴca ŋ tangooca ŋ Ararat. 5 Masma uupeeɗa nga haawsuk po ngaŋ mbeha koc ŋ caɓna ndaŋkiyaahɗoh, tangooca hotkeeɗa.

6 Wa degga neeh ndaŋkiyaah-nikiis (40), Noohin rangissa palaŋteera a haɓɗiɗee gaala. 7 A tuuƴca ngaak-suur ŋ hara, yeem kaɗeeɗa hayeeɗa, po findi masma ŋiisoh. 8 Noohin nammba tuuƴ hoɗ ne a inah andi masma ŋiisiɗ. 9 Waaye a raakɗi ɗiski a yongan laam kehƴi riifeen na masuɓ, a dokukka. Noohin puliɗta yaah a ammba ɗe, a ɓekka ɗe ŋ ɗooƴ gaala. 10 A sekissa neeh yasna-kanak, a tuuƴissa hoɗa. 11 Na niina, a hayya na saaf oliiw as ŋ nguɓiŋ ɗe. Noohin inahha kotii ne masma haawsukiɗ ŋ kehƴi. 12 A ɓaatta sek neeh yasna-kanak a tuuƴissa hoɗa, yeem taalndiɗta, a dokkisɗi nga ɗe.

13 Kiis ka Noohin raakoh kiis teemet-yasna-yino na kiis yino (601), ŋ caɓna koc nga, ŋ mbeha adug nga, raak masma reehiɗ ŋ kehƴi. Noohin kunissa gaala, a marakka, a hotta ne kehƴi suyiɗ.

14 Wa caɓna kanakɗoh raak neeh ndaŋkiyaah-kanak na neeh yasna-kanak (27), raak kehƴi suyiɗ kong, 15 weɗ Kooh woyoh Noohin ne : 16 « Pula gaali, fu na ɓitiifu na kuɓuuciŋ ɗa na ɓitiɓ ciŋ ɓa ; 17 fu puliɗ cuuɓ ciŋ ɗoopaat ci nik na ɗa, ciŋ kahan ci na ciŋ bilaf fi, sel ci na in ci ƴin ƴin ci jen ; ca pasarkohaat, ca nikaat ɓasloh, ca rimaatɗohaat laayiɗ ŋ kehƴi. » 18 Noohin pulla gaala, na ɓitiice, na kuɓuuciŋ ɗe ƴaar ci, na ɓitiɓ caŋ ɓa. 19 Ɗoopaat ca jen, na sel ca na in ca ƴin ƴin ca ; ca puleeɗa gaala cuuɓ cuuɓ.

20 Ƴutta, Noohin haɓiɗta seeƴkiɗoha haf ce ŋ Nikiɗi, a ɓayya ŋ ɗoopaat ca hooliɗ ca[a] na ŋ sel ca hooliɗ ca, a hoomiɗta[b] ca nga.

21 Wa eeñɗeem ree ŋ Nikiɗi, a neɓuusa nga, a woosa ŋ ɗooƴ ce ne : « Ŋ heyɗi alkisse kehƴi muk sagu ɓo'. Wa keeh ne ŋ kikomaakiikaŋ ɓa, weɗ keeñ ciŋ ɓa na cambohee ɓa hiir ŋ in moɗaaɗi ; ŋ heyɗi ɗumbɗisse in ci na pese ŋ kehƴi muk ŋ findi ŋ tumoha an. 22 Feeh kehƴi wii nga ɗah, in cii kurkohanɗi nga : sok na nguɗ, doh na soos, yuk na reh, noh na wek. »

<- Camba 7Camba 9 ->