1 Wa wa deg kiis ndaŋkiyaah na kiis nikiis (14), ŋ dokukka Yerusalem, mi na Barnabaas, ŋ nammba ɓayndoh ɓaah ɓoo Tit. 2 Ŋ kaɗta nga laam e Kooh teeɓee so ne ŋ joyiɗa tum. Ŋ teeɓpa ɓa Yegɗohiŋ Muci, wi ŋ woo ɓi nikɗi Yawuut ; ŋ ɗaayee na ɓooɓa uupee eɗu cir, ŋ woosa ɓa wa, ŋ waaɗeeɗi ne pangkiŋ ngo wotɓa na woti nik ɓarang ɓarang.

3 Waaye wa jam dong raakee, Tit sah, yi hunee na so, a nikee Gerek, te Gerek ci na nguɗkeeɗi. Moona ɓa wooɗi ɗe ne a nguɗuk. 4 Hanaa ɓi woyee ne ɓa ɓaah ciŋ ɓoo te ɓa nikɗaa, ɓi ɗembee aassa ŋ ɗooƴ ɓoo ne ɓa marak raaki ɓoo raak haf ɓoo ŋ niki ɓoo nik ŋ Kiristaani Yeesu ; ɓa tumee ineem ne ɓa tonduk nga, ɓa tum ɓoo ñaam. 5 Ɓoo teyɗukiɗɗi ɓa wa waas yino, ɓoo waaɗee ne keeh kiŋ Yegɗohiŋ Muci ris nga ɗu.

6 Ini kaɗ ŋ ɓi ambsee findi ɓooɓi uup eɗu cir - tiik nu ɓa mineen raak ɗah, wa bugulɗi so, Kooh na markeeɗi ŋ ɓoyi ŋ findi a mand ! - Ɓooɓi eɗu cir ɓeem, ɓa degɗi so ali in. 7-9 Saak na Piyeer na Saaŋ kay hot hot ne ŋ dengkohuuɗ ne ŋ woo ɓi nikɗi Yawuut Yegɗohiŋ Muci, findi Piyeer dengkohu ne a woo Yawuut ci Yegɗohiŋ Muci. Laam, Yi na ambohe Piyeer ŋ ki'apootarkiŋ ɗe ŋ Yawuut ci, a yi nam mbo amboh ŋ ki'apootarkiŋ ngo ŋ ɓi nikɗi Yawuut. Wa ɓa hot baahohi ŋ baahohu, ɓeɗ ɓi ambsee findi ɓi adgoh Janguuni, ɓa eɗta ɓoo yaah, mi na Barnabaas, ne ɓoo nik yino na ɓa. Ɓoo kerhiɗohha ne ɓoo hey kaɗe ŋ ɓi nikɗi Yawuut, ɓeɗ ɓa kaɗ ŋ Yawuut ci ; 10 ɓa nakee ɓoo dong ne ɓoo faɗoh nof ñakiɗ ci, te ineem, mi yii tuma poyi keeh-keeh.

11 Waaye wa Piyeer hay Añcos, ŋ woo ɗe jahran ne ŋ hunɗi ŋ tumohaaɗiŋ ɗe, sagu ne a nikeeɗi ŋ keeh. 12 Laam, bala ɓi ɓo' ɓaah ŋ ɓi Saak hayan ɗah, a meeɗ meeɗ ɓaah kañam na kosiɗ ci nikɗi Yawuut ; waaye wa ɓa ree, a cammba nooksuk, a ñamisɗi na ɓa, sagu neƴƴoh Yawuut ci kosiɗ ci risee taambiɗ mbaah ciŋ ɓa. 13 Yawuut ci kosiɗ ci ɓinooɓi hunnda na Piyeer ŋ naafeehaakiŋ ɗe, po ɓa kaɓpaa sah Barnabaas.

14 Waaye, wa ŋ hot ne ɓa kooɗɗi waas yurhiɗ, wi hun na keeh kiŋ Yegɗohiŋ Muci, ŋ woosa Piyeer ŋ fiki kosiɗ ci jen ne : « Fu yi Yawuut, fu na pese findi ɓi ɓaah ŋ cuuɓ ci cinooci, waaye findi Yawuut haa. Fu min na hiiroh kosiɗ ciŋ cuuɓ ci cinooci ne ɓa pes findi Yawuut ?

15 Ɓoo rimuk Yawuut, ɓoo ɓaahɗi ŋ cuuɓ ci cinooci na bakaaɗe. 16 Waaye ɓoo inhiɗ ne Kooh na ambeeɗi ɓo' findi yurhiɗ taamboh ŋ tum in ci waasiŋMusaa nakoh, waaye taamboh ŋ kosi a kos Yeesu Kiristaa. Ɓoo ŋ haf ɓoo, ɓoo namiɗ kos Kiristaani Yeesu findi ɓi nikɗi Yawuut, ne ɓoo onu kiyurhi puloh ŋ kosi ɓoo kos ɗe. Wa pulohɗi ŋ taambiɗ nakoh ciŋ waasi, laam Kooh ambanɗi ali ɓo' findi yurhiɗ sagu taambiɗ ini waasi nakoh.

17 Waaye, nik ne ɓoo na waake onu kiyurah ŋ niki ɓoo nik ŋ Kiristaani ɗah, wa na teeɓohe ne ɓoo nam nik bakaaɗoh. Andi ineem tokis ne Kiristaani na pangkiɗe bakaaɗ ? Muk ! 18 Ŋ tufkiɗissee nakoh ciŋ waasi ŋ faɗee ɗah, ŋ ineem mi na teeɓohe ne mi na ɗale waas.

19 Laam waasi tahiɗ po ŋ ini kaɗ nga, ŋ kaaniɗ, ne ŋ min pes wuu Kooh. Ŋ daaƴuuɗ ŋ kurwaana na Kiristaani. 20 A mi na pese kotii haa, a Kiristaani na pese nga so. Kipes kiŋ ɓoyi ŋ nikoh, mi na pesee wa na kos Kuɓkiŋ Kooh, yi waaɗ to, po a eɗohha haf ce wuu so.

21 Ɗu hotiɗ ne mi na heefeeɗi baahohiŋ Kooh ; nikee ne taambiɗ waasi na tahe ɓo' ambu findi yurhiɗ ŋ fiki Kooh ɗah, kon Kiristaani kaan ŋ ɓarang ɓarang. »

<- Ɓi Galaat 1Ɓi Galaat 3 ->