Fiisi Pool kaɓɗoh ɓi Galaat Rangsohaani Pool ɓaahee ŋ Israayel ci, ŋ cuuɓiŋ Benyaamin.[a] A nikee Farisen.[b] Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci.[c] Waaye wa raakka mbeh, a cohha na Yeesu, a kossa[d] po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13. Ɗiski na woyse Galaat, ca kur laayiɗ nik nga, findi Añcos-Pisidi na Ikoñum na Listar.[e] Kon Pool fiis kaɓɗohii ɓi kur laayiɗ. Ɓo' amb ne a fiis kaɓɗohii ŋ finho ɓaaɓiŋ ɗe yakki koc,[f] wi a tufkiɗoh ɓi Jangu ngaŋ Galaat, waaye wa yooɓɗi inhu findi wa kaɗoh. Ŋ saar 2, aaya 1-10, raakiɗ kaɗiŋ ɗe ŋ Yerusalem a naandsuk. Wa miniɗ nik ne weɗ kaɗi nam naandsuku ŋ teerndiŋ Tum ciŋ Apootar ci, ŋ saar 11:27-30 na 12:25, mbaa wa raak ɗe cohɗi na ɓi Galaat paaɗ. Kon nik ne wa kaɗoh ɗaa ɗah, wa miniɗ nik ne a fiis kaɓɗohii ŋ harmban ɓaaɓiŋ ɗe yakki koc na wi kanakɗoh. Pool fiisiɗ kaɓɗohii sagu ne, a kerheen ne raakiɗ ɓi ɓo' ɓi ɓekee ŋ haf ciŋ ɓi Galaat "yegɗoh muc wiiriis". A waaɗeeɗi ne ɓa faɗ kosi ɓa kos Yeesu, a woytoheeɗa ɓa. Fiisi Pool kaɓɗoh ɓi Galaat kaɗtiɗoh an : - Pool kañɗiɗ ɓi Galaat te a teeɓiɗ ɓa ne a Apootar1:1-5 - "yegɗoh muc wiiriis" 1:6-10 - Yegɗohiŋ Muci Pool na yegɗohe puloh ŋ Kooh 1:11–2:10 - Pool degiɗ Piyeer ŋ waas 2:11-21 - Teeɓoh ne Yegɗohiŋ Muci keeh 3:1–4:7 - Raak haf fu ŋ Fuuɗsi Hoolohngaani, waaye ŋ nakoh ci haa 4:8–5:26 - Nakoh pes ŋ waaɗ morom fu 6:1-10 - Dengkoh ci mirndoh 6:11-18
1Kañɗohi 1-2 Mi yii kañiɗ ɗu, ɗu ɓi Janguuciŋ Galaat, ñam Pool, Apootari ɓo' woosɗi, yi ɓo' tufkiɗɗi, waaye a Yeesu Kiristaa na Kooh Baabi woos so, Kooh yi hultiɗ ɗe. Mi na ɓaah ciŋ ɓoo kosiɗ ci nik na so jen, ɓoo ɓii kañiɗ ɗu. 3 Kooh Baabiŋ ɓoo, baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam ! 4 Yeesu Kiristaa, a yi eɗoh haf ce wuu bakaaɗ ciŋ ɓoo, ne a puliɗ ɓoo ŋ adinaani baahaaɗiinii, te weɗ ini Kooh Baabiŋ ɓoo waaɗ, 5 Kooh yi yakɗaah po faw ! Amiin ! Yegɗoh Muc yino dong raak 6 Ŋ feyuuɗ lool ŋ ini ɗu na are eɗ finho Yi ɓeeɗuk ɗu ngaŋ baahohiŋ Kiristaani, po ɗu kee taambɗa "yegɗoh muc" wiiriis. 7 Keeh-keeh, yegɗoh muc wiiriis raakɗi. Raak ɓooɓi na yahrohe liiɓ ciŋ ɗu, ɓa waaɗ ɓoƴsoh Yegɗohiŋ Muci, wi kaɗ ŋ Kiristaani. 8 Waaye ali ɓo' nga ɓoo wala malaaka puloh Eel ci sah woo ɗu yegɗoh muc wiiriis, ɗalohiɗ na wi ɓoo woo ɗu ɗah, a alku'aat ! 9 Ɓoo woyeena, te mi yii woyisa : Ɓo' woo ɗu yegɗoh muc ɗalohiɗ na wi ɗu rahas ɗah, a alku'aat ! 10 Andi mi na waake ne ɓooɓi neɓu nga so ? Wala mi na waake ne Kooh neɓu nga so ? Andi mi na waake ini neɓ ɓooɓi ? Ŋ waakeen ini neɓ ɓooɓi poyi ɗah, ŋ heeɗi nike ñaamiŋ Kiristaani. Findi Pool nikoh Apootar 11 Ɓaah ciŋ ngo, mi yii inhiɗ ɗu ne Yegɗohiŋ Muci ŋ yegɗoh, wa liiɓ ɓo' haa, 12 mi ŋ haf fo ŋ rahsohɗi wa ŋ ɓo' te ɓo' jangiɗɗi so wa, waaye Yeesu Kiristaa a yi teeɓ po wa.13 Ɗu kerhiɗ findi ŋ mandee ɗeɓgaan, wa ŋ nik ŋ waasiŋ Yawuut ci : Ŋ meeɗ meeɗ tolfiɗ ɓi Janguuniŋ Kooh tolfiɗ miskiɗ ne ŋ ɗumba. 14 Ŋ waasiŋ Yawuut ci, ñam saandee ɓo' laayiɗ ŋ gomal ciŋ ngo, ñam uupee ɓa sawar ŋ mbaah ciŋ caac ciŋ ɓoo.
15 Waaye ŋ baahohiŋ Kooh, a waɗkiɗ to wa ŋ nik ŋ rookaŋ yaay ɓoo, a ɓeeɗukka so ne ŋ pangkiɗ ɗe. Wa wa neɓ ɗe, 16 a teeɓiɗ to Kuɓkiŋ ɗe ne ŋ woo ɓi nikɗi Yawuut Yegɗohiŋ Muci ŋ ini kaɗ nga ɗe. Ŋ ineem, ŋ meekisɗi ali ɓo', 17 ŋ kaɗɗi sah Yerusalem ne ŋ marak ɓi koc co nik Apootar, ŋ jaar kaɗ Arabi, ŋ dokukka Damas.
18 Wa degga kiis kaahay, ŋ kaɗta Yerusalem ne ŋ inhoh na Piyeer, ŋ nikka ɗiskaŋ ɗe neeh ndaŋkiyaah na yatuus (15). 19 Waaye ŋ hotɗi ali Apootar wiiriis, ɗal Saak, taambɗoh Heɗi. 20 Ini ŋ fiisiɗ ɗu weem, Kooh yi tiimb mbo inhiɗ ne ŋ leyɗi.
21 Ƴutta ŋ kaɗta kur caŋ Siri na Silisi. 22 Ŋ ini kaɗ ŋ ɓi Janguuciŋ Kiristaani nik ŋ Yudee, ɓa inheeɗi so. 23 Ɓa kerhee ɓooɓi woyee rek ne : « Ƴaari meeɗ ɓoo tolfiɗ, a na yegɗohe kotii Yegɗohiŋ Muci ŋ ini kaɗ ŋ kosi a jeemee yahroh. » 24 Ɓa yakiɗta Kooh ŋ ini kaɗ nga so.
Ɓi Galaat 2 ->
13 Ɗu kerhiɗ findi ŋ mandee ɗeɓgaan, wa ŋ nik ŋ waasiŋ Yawuut ci : Ŋ meeɗ meeɗ tolfiɗ ɓi Janguuniŋ Kooh tolfiɗ miskiɗ ne ŋ ɗumba. 14 Ŋ waasiŋ Yawuut ci, ñam saandee ɓo' laayiɗ ŋ gomal ciŋ ngo, ñam uupee ɓa sawar ŋ mbaah ciŋ caac ciŋ ɓoo.
15 Waaye ŋ baahohiŋ Kooh, a waɗkiɗ to wa ŋ nik ŋ rookaŋ yaay ɓoo, a ɓeeɗukka so ne ŋ pangkiɗ ɗe. Wa wa neɓ ɗe, 16 a teeɓiɗ to Kuɓkiŋ ɗe ne ŋ woo ɓi nikɗi Yawuut Yegɗohiŋ Muci ŋ ini kaɗ nga ɗe. Ŋ ineem, ŋ meekisɗi ali ɓo', 17 ŋ kaɗɗi sah Yerusalem ne ŋ marak ɓi koc co nik Apootar, ŋ jaar kaɗ Arabi, ŋ dokukka Damas.
18 Wa degga kiis kaahay, ŋ kaɗta Yerusalem ne ŋ inhoh na Piyeer, ŋ nikka ɗiskaŋ ɗe neeh ndaŋkiyaah na yatuus (15). 19 Waaye ŋ hotɗi ali Apootar wiiriis, ɗal Saak, taambɗoh Heɗi. 20 Ini ŋ fiisiɗ ɗu weem, Kooh yi tiimb mbo inhiɗ ne ŋ leyɗi.
21 Ƴutta ŋ kaɗta kur caŋ Siri na Silisi. 22 Ŋ ini kaɗ ŋ ɓi Janguuciŋ Kiristaani nik ŋ Yudee, ɓa inheeɗi so. 23 Ɓa kerhee ɓooɓi woyee rek ne : « Ƴaari meeɗ ɓoo tolfiɗ, a na yegɗohe kotii Yegɗohiŋ Muci ŋ ini kaɗ ŋ kosi a jeemee yahroh. » 24 Ɓa yakiɗta Kooh ŋ ini kaɗ nga so.
Ɓi Galaat 2 ->