1 Wa coha reeh, Musaa na Aaruna kaɗta ŋ Firawna, ɓa woosa ɗe ne : « Inii weɗ Nikiɗi, Koohiŋ Israayel woo : “ Faɗa cuuɓiŋ ngo ɓa kaɗ haɓɗa feet wuu so ŋ bilaf fa. ” » 2 Firawna loffa ne : « Ya ɓa Nikiɗi po ŋ kerhiɗee ɗe ŋ faɗee Israayel ci ne ɓa coot ? Ŋ inahɗi Nikiɗi te ŋ heyɗi faɗe Israayel ci ne ɓa coot. » 3 Ɓa woosa ɗe ne : « Koohiŋ Heber ci, a yi teeɓuk ɓoo. Ne wa neɓ ɗa ɗah, ona ɓoo, ɓoo kaɗ ɗiska ree tiindu neeh kaahay ŋ bilaf fa, ɓoo seeƴuk nga wuu ce, bala a laɓan ɓoo na kosaay ki na kaɓkohe ɗah, wala a tuuƴ kur wiiriis ne ɓa hiñoh na ɓoo. » 4 A loffa ɓa ne : « Musaa, fu na Aaruna, wa ye tah ɗu ɓekee ɓooɓi ngaŋ faɗ pangkiŋ ɓa ? Dokkaat ŋ pangkaŋ ɗu. 5 Weɗi, ɗu waaɗ nguɗ pangkiŋ ɓooɓii te ɓa laayiɗ ŋ kur ki. »

6 Mbaɗi mbaɗi, Firawna nakka Israayel ca adgohee pangka na Misraaca niiɗee ɓa ne : 7 « Kotii, kinaat eɗis Israayel ci mbaang haɓɗoha muul findi ɗu meeɗ tumoh, ɓa kaɗootaat waaka, 8 ɗu na hee ɓa muulɗukohe muul hend na ca ɓa meeɗ haɓiɗ. Kinaat haawis ali in nga, ɓa na tiriɓ tiriɓɗuke weɗ tah ɓa leehkee ne ɓa waaɗ kaɗ seeƴka wuu Koohiŋ ɓa. 9 Sifaat ɓa panguk po ɓa talissanɗi sikɗuk lee. » 10 Weɗ ɓooɓa adgohee pangka, na ɓa niiɗee ɓa, kurkoh ŋ ɗiskaŋ Firawna, ɓa kaɗta ŋ Israayel ca, ɓa woosa ɓa ina Firawna woo an : « Ɗu heyɗi eɗissasse mbaang, 11 kaɗaat ɗu waakootaa ŋ ɗiska ɗu mina raakoh ɗah, te ali in haawsassanɗi ŋ pangkiŋ ɗu. »

12 Wa ɓa kerah woo ceem, Israayel ca pasarkohha ŋ ɗooƴ Misra jen, ɓa parheeɗa tas caŋ mbaang ca sagu hotaaɗi mbaang. 13 Ɓooɓa niiɗee pangkoh ca ngaseeɗa ɓa, an : « Kooh-nu-wiis ɗah, ɗu na hee haɓɗe muul hend na ca ɗu meeɗ haɓiɗ, findi wa ɗu meeɗ eɗu mbaang, te pangkiŋ ɗu mitaat nak ! » 14 Ɓa kaɗeen po ɓa meeɗta laɓ ɓa kooɗsee ŋ Israayel ca ne ɓa adgoh pangka. Ɓa hay ɗah, ɓa woyee ɓa ne : « Wa ye tah ɗu mitiɗɗi muul ci ɗu naksee neeh cii, findi ɗu meeɗa tumoh ? »

15 Israayel ca adgohee pangka kaɗta ŋ Firawna, ɓa woosa ɗe ne : « Moo kilifaani ! Wa ye tah po fu tumohee na ñaam ciŋ ɗa an ? 16 Ɓa eɗisɗi ɓoo mbaang, ɓa na woye ɓoo ne ɓoo haɓɗaat muul te ɓa laɓee ɓoo, ini ɓooɓiŋ ɗa na haɓɗe waas haa. » 17 Firawna loffa ne : « Ɗu na tiriɓɗuke weɗ tah ɗu woyee ne ɗu waaɗ kaɗ seeƴka wuu Nikiɗi. 18 Acca ! Kaɗaat ɗu pangka ! Ɗu heyɗi eɗse mbaang te ɗu muulan hend na ci ɗu naku. » 19 Ɓa hotta ne ina ɓa nikoh miskiɗ, sagu ina ɓa woyu ne : « Ali in haawsassanɗi nga ! »

20 Wa ɓa puloh ɗiskaŋ Firawna, ɓa cohha na Musaa na Aaruna, raak ɓeem sekeeɗa ɓa. 21 Ɓa woosa ɓa ne : « Nikiɗi hotaat ini ɗu haɓiɗ, a atte. Ɗu tahiɗ po in ciŋ ɓoo na ote ot Firawna na dag ciŋ ɗe. Ini ɗu haɓiɗ, wa mand haa, ɗu eɗ ɓa ndang ne ɓa ap ɓoo. »

22 Weɗi Musaa wiirkoh ŋ Nikiɗi a woosa ɗe ne : « Moo Nikiɗi ! Wa ye tah fu tumee cuuɓii miskiɗ ? Wa ye tah fu woossa so ndii ? 23 Ina fu woosoh ho ŋ Firawna poyi, ɓa na tume cuuɓiŋ ɗa miskiɗ te fu haɓiɗɗi in, ne fu muciɗa. »

<- Pula 4Pula 6 ->