1 Musaa loffa Nikiɗi ne : « Marka ! Israayel ci kosanɗi so te ɓa kerhiɗanɗi so, ɓaa hee woye ne Nikiɗi teeɓukɗi so. » 2 Nikiɗi woosa ɗe ne : « Fu amb ye ŋ yaahiŋ ɗa ? » Musaa loffa ɗe ne : « Wa ndooɗ. » 3 A woosa ɗe ne : « Njafaa ŋ kehƴi. » Musaa njaffaa, wa ɓoƴsukka iiñ ; Musaa saandoheeɗa. 4 Nikiɗi woosa ɗe ne : « Raɗsa yaah, fu amb ɗe ŋ kose. » A raɗissa yaah, a ammba ɗe. Iiña nikissa ndooɗ ŋ yaahiŋ ɗe. 5 Nikiɗi woosa ɗe ne : « Inii weɗ fu na hee tume ne Israayel ci kos ne e mi teeɓuk ɗa, mi yi Nikiɗi, Koohiŋ caacuuciŋ ɓa, Koohiŋ Ibrahiima, Isaahha na Yaŋhooɓa. »

6 Nikiɗi woyissa ɗe ne : « Ooɓa yaahiŋ ɗa ŋ daɗiŋ ɗa. » Musaa ooɓpaa, a nihissa nihis rek, hotta wa oɓsukiɗ po wa nikka yaanow. 7 Nikiɗi woosa ɗe ne : « Ooɓisaa ŋ daɗiŋ ɗa. » A ooɓissaa, wa a nihissa, wa dokkissa moɗoɗ findi faaniŋ ɗe. 8 Nikiɗi woosa ɗe ne : « Israayel ci kosɗi ɗa te ɓa kosɗi ŋ firndeeni koc ɗah, mbaa ɓa hey kose ŋ wi mirndoh. 9 Ɓa kosɗi ŋ firndeeci kanak ci te ɓa sikɗukɗi ɗa ɗah, fu hey ɓaye ŋ masmaŋ kalaŋ Niil, fu yiifa ŋ merhey mi ; masmi fu ɓay weem, hey ɓoƴsuke ñif ŋ kehƴi. »

10 Wa Nikiɗi woo in ceem jen, Musaa woosa ɗe ne : « Ɗaas so Heɗ ɓoo, ñaamiŋ ɗa woyoh haa, ŋ moosɗi minoh woo, wa wotɓa haa, wa wisetɓa haa te wa ina fu woyoh na so haa. Ali in ɓoƴsukɗi nga, a woo kiŋ ngo weɗ ñiinɗi. » 11 Nikiɗi loffa ɗe ne : « Ya ɓa waakiɗ ɓo' nguɓ ? Ya ɓa na muumɗe, ɗikɗe, hotɗe wala a fuulɗe ? A mi yi Nikiɗi haa e ? 12 Mbaa, kaɗa ! Mi ŋ haf fo, ŋ hey nike na ɗa ne fu jombee ɗah ; ŋ hey ɗa teeɓe in ci fu joy woo. » 13 Musaa woosa ɗe ne : « Cooy, Heɗ ɓoo, ɗaas so, fu miniɗ woos ɓo' wiiriis. »

14 Ŋ ineem, Nikiɗi ayrukka ɗe lool, a woosa ne : « Moo, Aaruna yakak fu, yi ɓaah na ɗa cuuɓiŋ Lewi nak ? Ŋ inhiɗ ne a miniɗ jomb baahiɗ, a yii ŋ waas na hee cohe na ɗa, te a hot ɗa ɗah, keeñiŋ ɗe hey soose. 15 Fu hey ɗe woye ini a joy woo, mi ŋ haf fo, ŋ hey nike na ɗu, ɗu kanak ne ɗu woyee ɗah, te ŋ hey ɗu teeɓe in ci ɗu joy haɓiɗ. 16 A yi na hee ɗa woyɗe na ɓooɓi, a nik tassiɗohiŋ ɗa, fu mand nga ɗe findi Kooh na woyohe na woosuuɗiŋ ɗe. 17 Amba ndooɗii ŋ yaahiŋ ɗa, fu tumohee wa firnde. »

18 Weɗi Musaa gurdoh ŋ Yetoro, payum ce ƴaar, a woosa ɗe ne : « Mi yii kiim ɗa, on ndo, ŋ waaɗ dokuk ŋ ɓaah caŋ ngo Heber ca ŋ Misra, ŋ marak andi ɓa ris pes wala. » Yetoro woosa ɗe ne : « Ee kaɗa ŋ jam. » 19 Raak Nikiɗi woyeen na Musaa ŋ kur kaŋ Majaan ne : « Kaɗa, dokka Misra, ɓooɓa waaɗee ɗa ap jen ɓa kaaniɗ. »

20 Weɗi a ɓayoh ɓitiice na kuɓuuciŋ ɗe, a rapiɗta ɓa ŋ mbaam, a kaɗeeɗa Misra. A ammba ndooɗaŋ Kooh ŋ yaah. 21 Nikiɗi woosa ɗe ne : « Ɗiski wa nik, fu yii dokkeeɗa Misra. Amba in ci feyohiɗ ci ŋ eɗ ɗa. Tuma po fu haɓiɗ ca ŋ fiki Firawna, waaye ŋ hey ndengɗe keeñiŋ ɗe po a faɗanɗi cuuɓiŋ ɗu ne wa kaɗ. 22 Teemb ndeem, fu hey ɗe woye ne inii weɗ Nikiɗi woo : “ Israayel a yi saawiŋ ngo, 23 ŋ woyeen ɗa ne faɗaa ɗe a kaɗ to ñaamka, fu sannga ; marka, ñam yii na hee ape kuɓkiŋ ɗa saawi. ” »

24 Wa ɓa na kaɗe, ŋ ɗiska ɓa iɗsiɗke, Nikiɗi raakka Musaa nga, a waaɗta ɗe ap. 25 Sefora arra ɓay atoh kaañiɗ, a nguɗta sumtaahiŋ kuɓkiŋ ɗe, a laaliɗta ɗe wa ŋ kot, a woosa ɗe ne : « Fu ƴaar ro ŋ ñif. » 26 Nikiɗi faɗta ɗe. Sefora woyeen ineem sagu nguɗka[a].

27 Nikiɗi woyeen Aaruna ne : « Kaɗa ŋ bilaf fa fu coha na taambɗoh fu Musaa. » A kaɗta a raakka ɗe ŋ tangooraŋ Kooh, a morgiɗukka ɗe. 28 Musaa woosa ɗe in ca Nikiɗi woos ɗe jen, a nammba ɗe woo in ca feyohiɗ ca a nak ɗe ne a tum ca jen. 29 Ɓa kaɗta, wa ɓa ree Misra, ɓa cohɗohha yakak caŋ Israayel jen. 30 Aaruna woosa ɓa in ca Nikiɗi woo Musaa jen. A nammba tum in ca feyohiɗ ca ŋ fiki ɓooɓaŋ ɓa. 31 Ɓa kossa, ɓa inahha ne Nikiɗi hotiɗ ɓa na findi ɓa na torhiɗohse ŋ Misra, ɓa ƴekka ne ɓa ñaamuk.

<- Pula 3Pula 5 ->