2 Genaat kiim Kooh, wa hun na yunuk na corkiɗ ɗe. 3 Namaat ɓoo ɓaahndoh ŋ kiim ciŋ ɗu Kooh, ne a rangsiɗ ɓoo waas, ɓoo min yegɗoh Woo ki, ini ɗasɗukiɗi ŋ ini kaɗ ŋ Kiristaani ; yegɗohiŋ Woo keem, weɗ tah ho ambu ŋ kaso. 4 Kiimaat Kooh ne ŋ jangɗoha hooliɗ findi ŋ joya tumoh.

5 Ɗu nik na ɓi ɓaahɗi na ɓoo kos ɗah, nikaat na ɓa na liiɓohaaɗ moɗiɗ, tondkaat ŋ jamanooni Kooh on ɗu ne ɗu haɓiɗ in ci ɗu min. 6 Woo kiŋ ɗu genaat neɓ, wa raak meɗa, ne ɗu min inah findi ɗu lofohan yaa nu nga.

7 Tisikos, ɓaah ɓoo yi ŋ keeñkoh, a cariɗ oolku ŋ pangkiŋ Heɗi, a huntohiŋ ngo ŋ Heɗi ngaŋ kiñaam, a hey ɗu woye ini kaɗ nga so jen. 8 Ŋ woosiɗ ɗe nga ɗu, ne a woo ɗu ini ɓoo nikoh te a soosiɗ keeñ ciŋ ɗu. 9 Ŋ woos ɗe na Onesim, yi puloh ndeem, nga ɗu. A ɓaah ɓoo ŋ kos, a cariɗ oolku te ŋ keeñkohiɗ ɗe. Ɓa hey ɗu naandsuke in ci raak ndii jen.

10 Aristarka, yi nik na so ŋ kasooni, a yii kañiɗ ɗu. Maarko, yi nik taambɗoh ngaŋ Barnabaas yii nam ɗu kañiɗ. Ɗu rahsiɗ nakoh ci ŋ ini kaɗ nga ɗe po ƴutiɗ ; a hey ɗu marke ɗah, taambkohaat ɗe moɗoɗ. 11 Ƴaari teeku Yeesu, yi na name woyu Yustus, yii nam ɗu kañiɗ. Ngaŋ Yawuut ci, ɓeɗ ɓi kaahay cii dong, ɓeɗ na pangke na so wuu Nguuriŋ-Kooh. Ɓa ambohiɗ to keeh-keeh !

12 Epafras, yi nam puloh ndeem, nga ɗu, yii kañiɗ ɗu. A ñaamiŋ Kiristaani Yeesu, a gen ɗu hiñohɗe ŋ kiim ciŋ ɗe Kooh, ne ɗu gen ndeng ŋ kosi ɗu kos, ɗu mit te ɗu hun keeh-keeh na ini Kooh waaɗ jen. 13 Ŋ miniɗ ɗe seede ne a na pangke panguk miskiɗ wuu ɗu ɓi Kolos na ɓi Lawdise na ɓi Hiyerapolis.

14 Luk, paƴohi ŋ keeñkoh, yii kañiɗ ɗu. Demaas yii nam ɗu kañiɗ. 15 Kañɗiɗaat ɓoo ɓaah ciŋ ɓoo kosiɗ ci ŋ Lawdise, kañɗiɗaat ɓoo Nimfa na ɓi Janguuni na cohe ŋ kahan ce.

16 Ɗu jangɗu fiisi ŋ kaɓɗoh ɗu wii ɗah, tumaat po ɓi Janguunaŋ Lawdise nama jangɗu, te ɗu nam jangɗu wi ɓi Lawdise eɗu.

17 Woyaat Arsip ne a tufkohaat pangki a teyɗukiɗ Heɗi, ne a mina tiindiɗ baahiɗ.

18 Mi Pool, ñam fiisoot kañɗohii na yaahiŋ ngo. Liiɓaat nga so ŋ niki ŋ nik ŋ kaso.

Baahohiŋ Kooh nikaat na ɗu !

<- Ɓi Kolos 3