Ɓi Kolos 3

1 Kon nik ne ɗu hultiɗ na Kiristaani ɗah, waakaat in ca nik ŋ ɗafka, ɗiska Kiristaani ɓoof ŋ ñaahmiŋ Kooh. 2 Liiɓ ciŋ ɗu nikaat ŋ in caŋ ɗafka, waaye ŋ in ciŋ kehƴi haa. 3 Laam ɗu kaaniɗ te kipes kiŋ ɗu ɗasɗukiɗ na Kiristaani ngaŋ Kooh. 4 Kiristaani, a yi kipes kiŋ ɗu, te mbehi a teeɓohkan, ɗu hey name teeɓohuk na ɗe, ɗu ɓaah ŋ yaki a yak.

Kiɓo' ki asi

5 Mbaa tumohaaɗ nu nik nga ɗu te wa ɓaahha ŋ Adina ɗah, apaata ; findi : Njaaloo, usuɓ, maɗ kaci'ɗohiɗ, maɗ tum in baahaaɗi na waaɗ kopor maanaam ñaamuk kooh nikaaɗi. 6 In ceem ceɗ na tahe ayrukiŋ Kooh hay [ŋ sangoh ci]. 7 Ɗu namee tum in ceem wa ɗu pesohee ca ɗeɓgaan. 8 Waaye kotii, namaat saɓsukohis na in cii jen : Ayruk, añaand, tum ɓo' miskiɗ, ɗooɓoh na woo moɗaaɗi. 9 Kinaat leytiɗohis, ɗu wolkiɗ kiɓo' kiŋ ɗu maañiɗa na tumohaaɗ caŋ wa. 10 Ɗu ɓekkiɗ kiɓo' as, wi na doknasse as ŋ mandohaaɗiŋ Yi fera ne ɗu rahas ki'inah keeh-keeh. 11 Wa Gerek haa, wa Yawuut haa, wa nguɗkiɗ haa, wa nguɗkaaɗi haa, wa kerhaaɗi gerek haa, wa jangaaɗi ali in haa, wa ñaam haa, wa nikaaɗi ñaam haa ; waaye Kiristaani a yi jen nga ɗu jen.

12 Ŋ ineem, ɗu ɓi Kooh kooɗ ne ɗu hool wuu ce te a waaɗta ɗu, raakaat keeñ moɗiɗ, ɗu baah, ɗu eɗef, ɗu soos te ɗu min muñ seke. 13 Yaa nu nga muñɗaat morom ce, ɗu ɗaastiɗohe ; raak yi ambiɗ morom ce in ɗah, a ɗaasaat ɗe ; findi Heɗi ɗaasoh ɗu, namaat tum ɗaa. 14 Waaye ini uupiɗ in ceem jen etoh, weɗ ne ɗu waaɗtiɗoh, te waaɗoh weɗ ambtiɗohi mit.

15 Jamiŋ Kiristaani adgohaat keeñ ciŋ ɗu, ɗu ɓeeɗku ŋ jameem ŋ niki ɗu nik faan yino. Genaat corkiɗ Kooh ! 16 Woo kiŋ Kiristaani genaat nga ɗu na raak-raakiŋ wa jen ; jangɗohaat ŋ harmban ɗu te ɗu ñaahtiɗohee na liiɓoha moɗiɗ nu nik, wa hun na ƴeek ciŋ Sabuur na ƴeek corkiɗoha Kooh, na ƴeek ci puloh ŋ Fuuɗsi Hoolohngaani jen ; ɗu ƴeek ca na keeñ ciŋ ɗu ne ɗu corkiɗ Kooh. 17 In nu ɗu na tume ɗah, wa nik ŋ woo wala ŋ tumohaaɗ, tumaata ŋ tiikiŋ Yeesu Heɗi, ɗu corkiɗee Kooh Baabi saguuce.

Findi ɓi kahan joy pesoh

18 Ɓitiɓ ci, teyɗukɗaat ƴaar ciŋ ɗu, findi wa joy nikoh ŋ niki ɗu nik ŋ Heɗi. 19 Ƴaar ci, waaɗaat ɓitiɓ ciŋ ɗu te kinaat raak aay-keeñ nga ɓa. 20 Komaakci, kerhiɗaat yaay ciŋ ɗu na baab ciŋ ɗu ŋ in ci jen, ineem weɗ neɓ Kooh. 21 Baab ci, kinaat ayrukiɗ kuɓuuciŋ ɗu, po ɓa kee faɗsuka.

Ñaam ci na heɗ ciŋ ɓa

22 Ñaam ci, kerhiɗaat heɗ ciŋ ɗu ŋ adinaanii, kerhiɗaat ɓa ŋ in ci jen, wa nikuu ŋ has ciŋ ɓa dong po haa ɗu na waake ini neɓ ɓa, te ɓa ɓo' dong, waaye kerhiɗaat ɓa te wa nik keeh nga ɗu, wa hun na nup Heɗi. 23 In nu ɗu na tume ɗah, pangkaat nga na keeñ hooliɗ findi ɓoyi na pangkiɗe Heɗi waaye findi ɓoyi na pangkiɗe ɓo' haa. 24 Te inhaat ne, Heɗi hey ɗu aafohe ini a gapee ɓooɓiŋ ɗe, laam Heɗ ɗu Kiristaani, a yi ɗu na pangkiɗe. 25 Waaye yi na tume yurhaaɗi, a hey aafohse yurhaaɗiini a tum. Kooh na talsoheeɗi ɓo'.

<- Ɓi Kolos 2 Ɓi Kolos 4 ->