Ini kooɗoh mbaɗi kosiɗ ca nikee ŋ Yerusalem tolfiɗasseeɗa. Wa nikee tolfiɗ miskiɗ. Ɓa jen, ɗal Apootar ci, ɓa pasarkohha ŋ kur caŋ Yudee na caŋ Samari. 2 Raak ɓi ƴaar kosiɗ Kooh lool uumbiɗ Ecen, ɓa rooyya ɗe rooy miskiɗ. 3 Waaye Sool ŋ haf ce, a heeɗa reehɗe ɓi Janguuna. A aaseeɗa ŋ kahan nu kahan, a pulɗeeɗa kosiɗ ca, ƴaar na ɓitiɓ, a taƴeeɗa ŋ kaso. 4 Ɓi pasarkohee nak, kaɗeeɗa ŋ ɗisik nu ɗisik, ɓa woyeeɗa Yegɗohiŋ Muci.

5 Ŋ pasarkoheem, weɗ Filip kaɗoh kur-taah ngaŋ Samari, a yegɗohha Mucɗohi Gapohse ŋ ndaam. 6 Wa ɓa kerah ɗe te ɓa hotta firndeeca a tume, mboolnda jen hunnda, tummba tek, ɓa sikɗukeeɗa ɗe baahiɗ. 7 Laam jiini laayiɗ nikee puleeɗa na leehuk ŋ kosaayiɗ ca te lafañ laayiɗ na ɓeendkiɗ laayiɗ wirra. 8 Ŋ ineem sum keeh-keeh raakka ŋ kur-taaheem.

9 Raakeen ƴaar ɓaatsiɗiɗ gen nga teeku Simong. A nikee luhusoh te a feyeen ɓi Samari lool. A tumee haf ce ɓo' yakak. 10 Ɓooɓa jen, yakak na komaaki meeɗ meeɗ sikɗuk woo ciŋ ɗe baahiɗ, ɓa woyee ne : « Ƴaarii, a yi hatiliŋ Kooh, hatili na woyse "yakki" ! » 11 Simong maañiɗ feyeeɗa ɓa na luhusiŋ ɗe, weɗ tah ɓa sikɗukeeɗa ɗe baahiɗ.

12 Waaye wa ɓa kos Filip yi woo ɓa Yegɗohiŋ Muci, wi kaɗ ŋ Nguuriŋ-Kooh na tiikiŋ Yeesu Kiristaa, ɓa ɓoktuusa jen, ƴaar na ɓitiɓ. 13 Simong sah kossa, a ɓoktuusa. A waaɗisɗi saɓsukoh na Filip, a feysee feyu jameet ŋ firndeeca na keemaan ca raake.

14 Wa Apootar ci nikee ŋ Yerusalem kerah ne ɓi Samari teyɗukiɗ woo kiŋ Kooh, ɓa tuuƴca Piyeer na Saaŋ nga ɓa. 15 Wa ɓa ree, ɓa kiimiɗta ɓa Kooh ne ɓeem rahas Fuuɗsi Hoolohngaani. 16 Raak Fuuɗsi Hoolohngaani ruhseeɗi ŋ ali ɓo' nga ɓa paaɗ ; ɓa ɓoktassee ŋ tiikiŋ Heɗ ɓoo Yeesu dong. 17 Ŋ ndeem Piyeer na Saaŋ degga ɓa yaah ciŋ ɓa, ɓeem rahassa Fuuɗsi Hoolohngaani.

18 Simong hotta ne kosiɗ ca rahas Fuuɗsi Hoolohngaani wa Apootar ci deg ɓa yaah ciŋ ɓa, ŋ ineem a kommba Piyeer na Saaŋ kopor. 19 A woosa ɓa ne : « Namaat to eɗ hatilii po ɓo' nu ŋ nam deg yaah ciŋ ngo ŋ haf ɗah, a rahas Fuuɗsi Hoolohngaani. »

20 Waaye Piyeer loffa ɗe ne : « Koporiŋ ɗa sooƴaat na ɗa ! Ini Kooh na onohe, fu liiɓ ne fu mina min romoh koporiŋ ɗa e ? 21 Fu ɓaahɗi, fu ɓaahlaanɗi ŋ inii laam liiɓohaaɗ ciŋ ɗa yurahɗi ŋ fiki Kooh. 22 Mbaa ɓoƴsoha liiɓohaaɗ ciŋ ɗa moɗaaɗiiceem te fu kiim Heɗi, wa miniɗ nik ne a hey ɗa ɗaase liiɓohaaɗ ciŋ ɗa. 23 Ŋ hotiɗ ne fu riifiɗ na aay-keeñ te bakaaɗ tumiɗ ɗa ñaam. » 24 Simong loffa Piyeer na Saaŋ ne : « Ɗu ŋ haf ɗu, kiimɗaat to Heɗi po ali in, ŋ in ci ɗu woo rahsuu so. »

25 Wa Piyeer na Saaŋ ƴut seede na yegɗoh woo kiŋ Heɗi, ɓa dokukka Yerusalem. Ŋ waasi, ɓa yegɗohha Yegɗohiŋ Muci ŋ kur laayiɗ ŋ Samari.

26 Wa Piyeer na Saaŋ coot, malaaka Heɗ ɓoo woosa Filip ne : « Kurka, fu kaɗ ŋ ɓak yaah-ñaahum ne fu yurhiɗkoh na pulohaaɗ-noh ɗah, ŋ waasa puloh Yerusalem kaɗta Gasaa, wa waas hulang. » 27 Filip jaarra kuruk, a kaɗta. Weɗ a cohoh na ƴaar gen Ecopi.

Ƴaareem ɓucsee ɓucu[a]. A nikee kilifa yakak, a yi meeɗ taambkoh raak-raakaŋ Kandaas, buura ɓitɓaŋ Ecopi. Ƴaareem hayee Yerusalem ne a ñaamuk Kooh. 28 Wa raak ɗe hayiɗ po wiirkeeɗa, a ɓooffa ŋ wotiiriŋ ɗe, a jangeeɗa Fiis ciŋ woosuuɗi Esayi.

29 Fuuɗsi Hoolohngaani woosa Filip ne : « Daba wotiireen. » 30 Filip nuppa dabbaa, a kerahha ƴaaraŋ Ecopiica jangeeɗa Fiis ciŋ Esayi, a meekissa ɗe ne : « Ini fu na jange, fu inhiɗ ini wa tokis e ? » 31 Ƴaara woosa ɗe ne : « Ŋ min na inhoh ini wa tokis te ŋ raakɗi ali ɓo' ne a teeɓ po ! » Weɗ a woyoh Filip ne a rapaat, a ɓoof ŋ serooce. 32 Raak inii weɗ a jangee ŋ Fiis ci :