1 Weɗ seeƴkiɗoha yakka meeksoh Ecen ne : « In ci fu na yambse ca keeh e ? » 2 Ecen loffa ne : « Ɓaah ciŋ ngo na baab ciŋ ngo, sikɗukaat to. Kooh yi Heɗ ndam, teeɓkiɗ caac ɓoo Ibrahiima, waam raak ɗe ŋ Mesopotami bala a hayan gene ŋ Haaraan ɗah.[a] 3 Kooh woosa ɗe ne : “ Faɗa kur ki fu genoh, fu faɗ ɓaah ciŋ ɗa ; fu kaɗ ŋ kur ki maa hee ɗa teeɓe.[b] ” 4 Ŋ ineem, Ibrahiima pulohha kur kaŋ Kaldeeca, a kaɗta, a gennda ŋ Haaraan.

Ŋ finho kakaan kaŋ baab ɓa, Kooh haytohha ɗe ŋ kur ki ɗu genoh wii woti-woti. 5 Kooh onɗi ɗe ali keheƴ, a onɗi ɗe sah in hend na ɗiski a min deg kot. Waaye a gappa ɗe ne a hey ɗe one kur ki, a yi na ɓi na hee rimkohe nga ɗe ŋ finhooce, te moona waam raak ɗe raakɗi kuɓu ndoom.

Ibrahiima raakka kuɓu ƴaar Isaahha, a nguɗta ɗe ŋ mbeha yasna-kaahayɗoh.[e] Isaahha nammba tum kuɓkiŋ ɗe Yaŋhooɓa ɗaa, yeem nammba tum kuɓuuciŋ ɗe ndaŋkiyaah na kanak ci (12) ɗaa, ɓeɗ ɓi caac ciŋ cuuɓ ciŋ ɓoo.

9 Siisa ɓeem siisee taambɗoh ɓa Yuusufa[f] tahha po ɓa toonnda ɗe ne a tumsa ñaam ŋ Misra.[g] Waaye Kooh nikee na ɗe, 10 a pulɗohha ɗe ŋ miskiɗ ciŋ ɗe jen. Kooh tummba po a neɓpa Firawnaana, buuraŋ Misra, a nammba ɗe on liiɓohaaɗ moɗiɗ ŋ fiki buura po yeem tummba ɗe goornooraŋ Misra na kilifaanaŋ kahan ce jen.[h]

11 Weɗ aɗ raakoh ŋ kur kaŋ Misra jen na Kanaan. Wa misikka nga ɓa lool, po caac ciŋ ɓoo raakisɗi ñamaah. 12 Wa Yaŋhooɓa kerah ne bele raakiɗ ŋ Misra, a woossa caac ciŋ ɓoo nga, wa nikka kaɗaŋ ɓa koc. 13 Wi ɓa kaɗ kotaŋ ɓa kanakɗoh, Yuusufa tummba po taambɗoh ciŋ ɗe inhissa ɗe, ŋ ndeem Firawnaana inahha ɓi kahan Yuusufa. [i]

14 Yuusufa woosohha ne baab ɓa Yaŋhooɓa kaɗaat ɓaysa, a yi na ɓi kahan ɓa jen : ɓa nikeen ɓo' ndaŋkiyaah-yasna-kanak na ɓo' yatuus (75). 15 Yaŋhooɓa kaɗoh Misra ɗaa[j] ; a kaanoh nga,[k] a yi na caac ciŋ ɓoo. 16 Fiɗaaf caŋ ɓa ɓayuusa Sisem, ɓa ɗasɗuusa ŋ ruy-ruya Ibrahiima romee na koporiŋ ɗe ŋ ɓi rimkoh Hamor ngaŋ Sisem.[l]

17 Jamanoona Kooh hee mitɗohe ina a gapee Ibrahiima nikee reɓeeɗa ; raak cuuɓiŋ ɓoo ɓaatkiɗ, wa uupeeɗa uup laay ŋ Misra, 18 po findi buur wiiriis adgohoh kur ka, buureem inheeɗi Yuusufa. 19 A ñaañohha cuuɓiŋ ɓoo, a tummba caac ciŋ ɓoo miskiɗ po a mbetɗukoheeɗa ɓa gooy caŋ ɓa ne ɓeem kaan.

20 Jamanooneem weɗ Musaa raakohu, a nikka komaaki moɗiɗ ŋ Kooh ; a taambkohseeɗa ŋ kahan baab ɓa po a raakka caɓin kaahay ; 21 wi a mbetu, kuɓki ɓitɓiŋ Firawnaana parahha ɗe, a koɗta ɗe findi kuɓuuce. 22 Wa kaɗoh ɗaa, Musaa jangɗuusa ki'inhiŋ ɓi Misra jen, a nikka ɓo' raakiɗ hatil ŋ woo na tum.[m]

23 Wi a raak kiis ndaŋkiyaah-nikiis (40) weɗ a liiɓoh kaɗ marka ɓaah ciŋ ɗe, Israayel ci. 24 A hotta ƴaar gen Misra torhiɗeeɗa yino nga ɓa, a langɗoheeɗa ƴaara torhiɗasse, a wirndukɗeeɗa ɗe, a appa ƴaaraŋ Misraaca. 25 A liiɓee ne ɓaah ciŋ ɗe hey inhe ne Kooh waaɗ taamboh nga ɗe ne a muciɗ ɓa, waaye ɓa inheeɗaa.

26 Wa Kooh wiis, a hotta kanak ŋ ɓaah ciŋ ɗe hiñoheeɗa. A waaɗta ɓa kerhiɗohiɗ, a woosa ɓa ne : “ Ƴaaɓi, e ɗu ɓaah, wa ye tah ɗu hiñohe ? ” 27 Waaye ƴaara torhiɗohee teyɗukɗi Musaa, a yennja ɗe, a woosa ɗe ne : “ Ya ɓa tum ɗa kilifaaniŋ ɓoo na atte'ohiŋ ɓoo ? 28 Fu waaɗ to nam ap findi fu apoh ƴaariŋ Misraaci wotɓa e ? ” 29 Wa Musaa kerah woo keem, a saandohha, a raayya ŋ kur kaŋ Majaan.[n] A nikka ŋ ndaam, po a raakka kuɓu ƴaar kanak nga.[o]

30 Wa degga kiis ndaŋkiyaah-nikiis (40), malaaka teeɓukka Musaa ŋ kehƴa hulangaŋ tangooraŋ Sinaay, ŋ jaalaŋ yongkaahaŋ kidga ƴina gile. 31 Wa Musaa hot ineem, a feyuusa. A reɓpa ne a maraka baahiɗ, weɗ a kerhoh hoosooriŋ Heɗ ɓoo an : 32 “ A ñam Koohiŋ caac ciŋ ɗa, Koohiŋ Ibrahiima na Isaahha na Yaŋhooɓa ! ” Musaa tiitta po saakɗoheeɗa, a kaañisɗi marak. 33 Heɗ ɓoo woosa ɗe ne : “ Wolsa ñafaɗ ciŋ ɗa ; ɗiski fu tufuk wa keheƴ hooliɗ. 34 Ŋ hotiɗ torhiɗi cuuɓiŋ ngo na torhiɗasse ŋ Misra. Ŋ kerhiɗ iin ciŋ ɓa te ŋ ruhsiɗ ne ŋ naaf ɓa. Ɗiski wa nik, haya ŋ woos ɗa Misra.[p] ”

35 Musaa yeem, a yi ɓaah ciŋ ɗe taaske, ɓa woyeeɗa ɗe ne : “ Ya ɓa tum ɗa kilifa na atte'oh ? ” Musaa a yi Kooh woos ne a nik kilifaani na yi na hee naafe cuuɓiŋ ɗe, taamboh ŋ ɓaatɗohiŋ malaakaani teeɓkee ɗe ŋ kidga ƴina. 36 A Musaa puliɗ Israayel ci Misra. A tumiɗ in feyohiɗ na keemaan laayiɗ ŋ kur keem,[q] na wa ɓa huusee Cookma-Ruumnda[r] na wa ɓa nik ŋ kehƴa hulanga kiis ndaŋkiyaah-nikiis (40).[s]

37 A Musaa namee woo Israayel ci ne : “ Kooh hey ɗu woosohe Woosuuɗ findiiso, a pulohan ŋ cuuɓiŋ ɗu.[t] ” 38 Wa ɓooɓa coh ŋ kehƴa hulanga, a Musaa namee nik ŋ harmban caac ciŋ ɓoo na malaakaana woyee na ɗe ŋ tangooraŋ Sinaay. A rahassa woo ciŋ kipes ki, ne a eɗ ɓoo ca.[u]

39 Waaye caac ciŋ ɓoo waaɗeeɗi kerhiɗ Musaa, ɓa sannga ɗe teyɗuk, keeñ ciŋ ɓa jen nikee ŋ dokuk Misra. 40 Ɓa kaɗta ŋ Aaruna, ɓa woosa ɗe ne : “ Musaa ƴaari pulɗoh ɓoo Misra yii, ɓoo inahɗi ini rahas ɗe. Mbaa, haɓɗiɗa ɓoo kooh ci adgohan ɓoo. ” 41 Ɓa tiɓɗukka ɗoon, ɓa tummbaa koohiŋ ɓa, ɓa seeƴkeeɗa nataaleem. Ɓa neɓuusa ŋ ina ɓa tiɓoot na yaah ciŋ ɓa.[v]

42 Ŋ ndeem, Kooh suungɗukka ɓa, a faɗta ɓa ɓa ñaamkeeɗa caɓni na nohi na hor ciŋ eel ci findi wa fiisohu ŋ Fiis ciŋ woosuuɗ ci an : “ Cey cuuɓiŋ Israayel ci, ɗoopaat ca ɗu seeƴkee na sarah ca cinooca ɗu haɓɗee ini ree kiis ndaŋkiyaah-nikiis (40) ŋ kehƴa hulanga, ɗu haɓɗee ca wuu so e ? 43 Muk ! Ɗu haɓɗee ca wuu so haa ! Ɗu ɓayndohee ɗiipaŋ[w] Molok na horaŋ Romfa yi ɗu tum koohiŋ ɗu, ceɗ nataal ci ɗu haɓiɗ ne ɗu ñaamuk ca. Ineem weɗ tah po ŋ hey ɗu toore ŋ ɗiska uup us[x] Babilon. ” »

44 Ecen taalndiɗta an : « Ŋ kehƴa hulanga, caac ciŋ ɓoo nikee na Ɗiipa ɗaakohsee in ca teeɓohee Ambtiɗohi. Ɗiipaam haɓɗohsee findi Kooh nakohee Musaa, laam a woyee Musaa ne a haɓɗaata jok findi a teeɓohee ɗe wa ŋ nataal.[y] 45 Ɗiipeem caac ciŋ ɓoo taamb nga nameena lam. Ɓa ɓayndoheena, wa Yosuwe adgoh ɓa, ŋ jamanoona ɓa degoh kur ka yaah ; kur kaŋ cuuɓ ca Kooh aañee ŋ fikiiɓa.[z] Wa rissa nga po ŋ jamanoonaŋ Dawuuda. 46 Kooh baahoheen Dawuuda, Dawuuda kiimmba ɗe ne a min taɓah genoha ne ɓi kahan Yaŋhooɓa ñaamkee ɗe nga.[aa] 47 Waaye a kuɓkiŋ ɗe Suleymaan mirndoha taɓah.[bb]

48 Waaye kinaat liiɓ keeh-keeh ne Kooh yi ŋ ɗafka ɗafka gen ŋ in ci yaah ɓo' haɓiɗ. Kerhaat ini woosuuɗi woo, an : 49 “ Heɗ ɓoo woo ne : ‘Asamaan weɗ ɓoofohaaniŋ ngo, kehƴi nikka degoha kot ciŋ ngo. Kon ɗu taɓahɗan ndo kahan mand na ? Wala winde ɗisik weɗ ŋ iɗsiɗkohan ? 50 A ñam fer in cii jen haa e[cc] ?’ ” »

51 Ecen marakka ɓa woosa ɓa ne : « Ɗu ndeng ndeng haf ! Ɗu rannga keeñ ciŋ ɗu na nof ciŋ ɗu ŋ ɓeeɗkohiŋ Kooh findi ɓi ɓaahɗi ŋ Ambtiɗohiŋ ɗe. Ɗu ris hiñoh na Fuuɗsi Hoolohngaani, ɗu mand na caac ciŋ ɗu ! 52 A yinde woosuuɗ a yi caac ciŋ ɗu tolfiɗɗi ? Caac ciŋ ɗu apiɗ ɓi yegɗohee ne Yurhiɗi hey haye. Te ɗu ɓi woti-woti, ɗu woriɗ ɗe, ɗu boommba ɗe. 53 Ɗu rahsiɗ waasiŋ Kooh taamboh ŋ malaakaaci, waaye ɗu taambiɗɗaa. »

54 Wa atte'oh ca kerah woo ciŋ Ecen ceem, ɓa ayrukka ɗe po ɓa heeɗa pooke. 55 Waaye Ecen riiffa na Fuuɗsi Hoolohngaani, a marakka ŋ Eel ci, a hotta siñaariŋ Kooh, a hotta Yeesu tufkiɗ ŋ ñaahmiŋ ɗe. 56 A woosa ne : « Ŋ hotiɗ Eel ci rangsukiɗ, Kuɓkiŋ ɓoyi tufukka ŋ ñaahmiŋ Kooh. »

57 Wa ɓa kerah woo keem, ɓa leehukka ŋ ɗafka, ɓa rannga nof ciŋ ɓa. Ɓa jen ɓa faɗsukka Ecen. 58 Ɓa faseeɗa ɗe po ɓa puliɗta ɗe kur-taaha, ɓa tapeeɗa ɗe atoh ne ɓa ap ɗe. Seede'oh ca faɗee kulɓaacaŋ ɓa ŋ kot ciŋ komaaki mitiɗ fiir na woyse Sool.

59 Wa ɓa tapee Ecen atoh, a kiimeeɗa Kooh an : « Heɗ ɓoo Yeesu, teya ruuhiŋ ngo. » 60 Weɗ a ƴekoh gik, a leehukka ŋ ɗafka an : « Heɗi, kina ɓa amboh bakaaɗii ! » Wi a woo ineem, a nguɗta.

<- Tum ciŋ Apootar ci 6Tum ciŋ Apootar ci 8 ->