1 Wa Festus tum neeh kaahay ŋ kur ca a joy adgoh, a pulohha Seesare a kaɗta Yerusalem. 2 Kilifaacaŋ seeƴkiɗoh caŋ waasiŋMusaa na kilifaacaŋ Yawuut ca hayya, ɓa kalaameesa Pool nga ɗe. Ɓa kiimeeɗa keeh-keeh 3 ne a amboh ɓa, a haytoh Pool Yerusalem. Ɓa waaɗee ɗe jo'nduk ŋ waasi, ɓa ap ɗe. 4 Festus loffa ɓa ne : « Pool yaa ŋ Seesare, ŋ yaah soldaar ci te mi na dokke ndaam maañaaɗi. 5 Kon ɓi ɓo' oolkuuɗ nga ɗu hunaat na so, ɓa ree ɗah ɓa yamb ɗe, nik ne a tum in moɗaaɗi ɗah. »

6 Festus tumɗi ini uup neeh yasna-kaahay mbaa neeh ndaŋkiyaah ndaam, ƴutta a dokukka Seesare. Wa Kooh wiis a kaɗta a ɓooffa ŋ atte'ohaana, a nakohha haytohu Pool. 7 Wa yeem ree, Yawuut ca pulohee Yerusalem willa ɗe, ɓa yambeeɗa ɗe in laayiɗ, yakiɗ. Waaye in ci ɓa yambee ɗe jen, ɓa minɗi teeɓoh ali firnde nga. 8 Waaye Pool ngeliɗta haf ce an : « Ŋ tumɗi ali in moɗaaɗi, wa waasiŋ Yawuut ci haa, wa Kahan Kooh haa, wa buuri yakkiŋ Rom haa. »

9 Festus waaɗta ne Yawuut ca neɓu nga ɗe, a meekissa ɗe ne : « Fu waaɗiɗ kaɗ Yerusalem ne fu atte'u nga ŋ fikiiso, ngaŋ ini kaɗ ŋ inii e ? » 10 Pool loffa ne : « Ñam yii tufukka ŋ ngeloha, ŋ ngelohaaciŋ buuri yakkiŋ Rom te ŋ joy atte'ohu nga. Ini kaɗ ŋ Yawuut ci nak, ŋ tooñɗi ɓa te fu ŋ haf fu, fu inhiɗa baahiɗ. 11 Ŋ tooñeen wala ŋ tum ini car ne ŋ apu ɗah, ŋ heeɗi sange kaan nga ; waaye nik ne in ci ɓa na yambee so keeh haa ɗah, ali ɓo' joyɗi so deg ŋ yaah ɓa. Ŋ ɓaysaat ŋ buura yakka ! »

12 Wi a woo ineem, Festus hotohha na atte'oh ca ɓinooɓaŋ ngelohaana, ƴutta a woosa ne : « Fu woo ne fu ɓaysaat ŋ buura yakka, fu ɓaysan nga ɗe. »

13 Wa degga ɓi neeh, buura teeku Agiripa na Berenis taambɗoh ce ɓitiɓ, hayya Seesare ne ɓa kañiɗ Festus. 14 Nika ɓa joyee nik nga ɓi neeh tahha po Festus woosa buura ina kaɗ ŋ Pool an : « Raakiɗ ƴaari Feliksa faɗ ndii, ŋ kasooni. 15 Wa ŋ kaɗ Yerusalem, kilifaacaŋ seeƴkiɗoh ca na yakak caŋ Yawuut ca kalaame'iɗ ɗe, ɓa nakka so ne ŋ deg ɗe in. 16 Ŋ loffa ɓa ne : “ Ɓi Rom mbaahkohɗi eɗoh ɓo' yambuuɗ raak ɗe ngelɗi. A joyiɗ onu ne a min taasuk ŋ fiki ɓi na yambee ɗe. ”

17 Weɗ ɓa hunoh na so ndii, ŋ sannga ɗaak ineem, Kooh wiis wiis rek, ŋ kaɗta ŋ ɓooffa atte'ohaana, ŋ nakohha haytohu ƴaareem. 18 Ɓi na yambee ɗe hayya, waaye ɓa wooɗi ali in ŋ in ci moɗaaɗiici ŋ liiɓee ne ceɗ a tum. 19 Ɓa leer na ɗe ŋ ini kaɗ ŋ taastiɗoh ngaŋ ini kaɗ ŋ waas-Koohiŋ ɓa na ƴaar na woyse Yeesu, a kaaniɗ waaye Pool na ndengɗe ne a yi pes.

20 Mi nak, wa ŋ inahɗi in nga, ŋ meekissa Pool andi a waaɗiɗ kaɗ Yerusalem ne a atte'u ineem ndaam. 21 Waaye Pool nakohha ne a risaat ambuuɗ, a ɓayu ŋ buuri yakki ŋ Rom ne atteeniŋ ɗe tumohu ndaam. Ŋ nakohha ne a risaat ambuuɗ po mbaɗna ŋ tuuƴan ɗe ŋ buuri yakki. »

22 Agiripa woosa Festus ne : « Ŋ namiɗ waaɗ sikɗuk ƴaareem de'. » Festus loffa ɗe ne : « Kim ɗah, fu hey ɗe sikɗuke. »

23 Ŋ ineem, wa Kooh wiis, Agiripa na Berenis hayya ɗiski na ngelohse, hay roofiɗ. Ɓa hunee na kilifaaciŋ soldaar ci na kilifaaciŋ kur ki, Festus nakohha ne Pool haytohu. 24 Ƴutta a woosa ne : « Buur Agiripa na ɗu ɓi nik na ɓoo ndii jen, ƴaari ŋ fikiiɗu yii, Yawuut ci ŋ findi ɓa hend hayiɗ ñaɗtuke nga so ; ndii na Yerusalem jen ɓa na leehkee so ne, a joyɗi pesis.

25 Mi nak, ŋ hotiɗ ne a tumɗi ali ini joy ɗe tah apu. Waaye a nakoh ɓayu ŋ buuri yakki, weɗ tah ŋ ambiɗ ne, ŋ hey ɗe ɗe kome. 26 Ŋ raakɗi ini hool lo, wi ŋ fiisan kilifaani yakki ŋ ini kaɗ nga. Weɗ tah ŋ ɓayya ɗe ŋ fikiiɗu, ŋ fikiifu sah Agiripa ne ɗu ƴut ɗe meekis ɗah, ŋ raak ini ŋ fiisan. 27 Fu amb ɓo', fu tuuƴ ɗe Rom te fu wooɗi hooliɗ in ci a na yambse, weem liiɓaah haa. »

<- Tum ciŋ Apootar ci 24Tum ciŋ Apootar ci 26 ->