1 Wa degga neeh yatuus, Anañaas, seeƴkiɗoha yakkaŋ waasiŋMusaa hayya Seesare, a hunnda na ɓi yakak na ngeloh na woyse Tertullus. Ɓa kaɗta ŋ Goornoor Feliksa ne ɓa ngela na Pool.

2-3 Pool ɓeeɗkuusa, Tertullus cammba ɗe yamb ŋ woo cii : « Feliksa kilifaani, ɓoo ɓii ŋ jam keeh-keeh saguufu ŋ findi fu na tiinɗohe kur ki na in ci as ci fu haytoh ŋ nguuriŋ ɓooɓii, ɓoo hotiɗ in ceem Kooh-nu-wiis na ɗisik nu nik te ɓoo ɓii corkiɗ ɗa nga keeh-keeh. 4 Ŋ waaɗɗi ɗa maañiɗ ndii na woo laayiɗ, weɗ tah mi yii kiim ɗa ŋ baah kiŋ ɗa, fu sikɗuk ɓoo ƴissuut rek.

5 Ŋ ineem ɓoo hotiɗ ne ƴaarii, a nduhum ŋ kur, a na ɓeke hiñoh ŋ Yawuut ci ŋ Adina jen, a ɓaah ŋ ɓi adgoh ɓi lang na ƴaariŋ Nasareet ci.[a] 6 A jeemiɗ sah hoolaaɗi'iɗ Kahan Kooh. Ŋ ineem ɓoo ammba ɗe. [Ɓoo waaɗta ɗe atte ŋ waasiŋ ɓoo, 7 waaye a Lisiyas, kilifaaniŋ soldaar ci, a yi hay a naaffa ɗe na doole ŋ yaah ciŋ ɓoo. 8 A woosa ɓoo ne ɓoo hayaat nga ɗa.] Fu miniɗ ɗe meekis sah ŋ ini kaɗ ŋ in ceem jen, fu hey hotoote ne in ci ɓoo na yambe ƴaarii, ca keeh. »

9 Yawuut ca ɓaatta ndengiɗ woo ciŋ Tertullus.

10 Wa Tertullus ƴut woo, goornoora eɗta Pool woo ka ne a namaat woo, Pool woosa ne : « Ŋ inhiɗ ne a fu na atte'e ɓooɓi ŋ kur kii ɓi kiisi kiis ; weɗ tah ŋ oolkiɗ hay ŋ fikiifu ne ŋ taas in ci ŋ yambu.

11 Fu sah, fu miniɗa marak, wa uupɗi neeh ndaŋkiyaah na kanak (12), ŋ kaɗiɗ Yerusalem ne ñaamuk Kooh. 12 Te ali ɓo' hotɗi so jombeeɗa na ɓo' wala ɓekeeɗa mboolndi ŋ yoond, wa ŋ ɗooƴ Kahan Kooh haa, waa ŋ sinaagog ca haa, wa ŋ ɗisik wiiriis ŋ kur-taaha haa.

13 Te ɓooɓii minɗi ɗa teeɓ ali firnde ŋ in ci ɓa na yambee so cii. 14 Ŋ teyɗukiɗ inii ŋ fikiifu, weɗ ne : Taamboh ŋ waasiŋ Yeesu, wi ɓa amb ne wa waas tufkaaɗi, mi na ñaamke Koohiŋ caac ciŋ ɓoo nga, maanaam ŋ kosiɗ in ci fiisu ŋ waasiŋ Musaa na fiis ciŋ woosuuɗ ci jen.

15 Ŋ raakiɗ ini ŋ oolkoh ŋ Kooh te ɓeɗ ɓii, ɓa nam oolkoh ineem. Weɗ ne Kooh hey hultiɗe kaaniɗ ci, yurhiɗ na yurhaaɗi jen. 16 Weɗ tah ŋ nam gen ŋ ndengɗuk ne ŋ raak hel daliɗ ŋ fiki Kooh na fiki ɓooɓi.

17 Wa tumiɗ ɓi kiis laayiɗ ŋ nikeeɗi nga, ŋ neeh cii ŋ hayya ne ŋ kom ɓi cuuɓiŋ ɓoo kopor ɓaatɗohaa ɓa, te ŋ nam seeƴuk wuu Kooh. 18 Wi maa haɓɗe ineem, ɓa raak ko ŋ Kahan Kooh ɓoktukiɗ po ƴutiɗ, mboolo ndeereeɗi so, ɗuuɗ raakeeɗi nga. 19 Waaye raakiɗ Yawuut ci nikee nga puloh Asi. Ɓeɗ joyee hay ndii ne ɓa seede in ci ɓa na yambee so ŋ fikiifu, ne ɓa raakiɗ ini ɓa taamban ndo ɗah.

20 Ɓeɗ ɓi nik ndii nak, ɓa woyaat ini moɗaaɗiini ɓa hot ne ŋ tumiɗa wa ŋ tufkiɗu ŋ saangnaŋ yakak ca. 21 Hanaa woo ki ŋ woyee ŋ ɗafka wii, wi ŋ tufuk ŋ ɗooƴ ɓa ne : “ Ŋ ɓayu woti ne ŋ atte'u ɗah, a ini ŋ kos ne kaaniɗ ci hey hulte ! ” »

22 Feliksa inheen in laayiɗ ŋ ini kaɗ ŋ waasiŋ Heɗi, a faɗta ɓa ne ɓa kaɗ po mbeh wiiriis, a woosa ne : « Lisiyas kilifaaniŋ soldaar ci hay ɗah, ŋ hey marke ini ɗu leer. »

23 A nakka ƴaara adgohee soldaar ca ne a taalndiɗaat a niiɗee Pool waaye a on ɗe a raak haf ce ƴissuut te ɓooɓiŋ ɗe minee ɗe hay taambkohe.

24 Wa degga ɓi neeh, Feliksa hayya na ɓitiice Dursil, yeem nikee Yawuut. A ɓeeɗkiɗukka Pool, a sikɗukeeɗa ɗe ŋ ini kaɗ ŋ kos Yeesu Kiristaa. 25 Waaye, wa Pool woo po a ɓayya woo ka ŋ kiyurah, na amb haf fu, na atteeniŋ Kooh na haye, Feliksa tiitta, woosa ɗe ne : « Fu miniɗ kaɗohaah, ŋ rahsis ne ŋ min woo na ɗa ɗah, ŋ hey ɗa ɓeeɗkisse. » 26 Feliksa liiɓee ne Pool hey ɗe eɗe kopor, weɗ tah a meeɗta ɗe ɓeeɗkiɗuk ne a ɓeesɗoh na ɗe.

27 Wa degga kiis kanak, Porsiyus Festus namsiɗta Feliksa. Feliksa waaɗee ne Yawuut ca neɓu nga ɗe, tahha po a faɗta Pool ŋ kasoona.

<- Tum ciŋ Apootar ci 23Tum ciŋ Apootar ci 25 ->