1 Wa ɓa kurkoh Filippi, Pool na Silaas taammba Amfipolis na Apoloni, ɓa kaɗta Tessalonik. Ŋ ndaam, Yawuut ca raakeen sinaagog nga. 2 Pool kaɗta nga, findi a na tumohee wa. Mbehi na iɗsiɗkohse reesa ɗah, a woyee na ɓa ŋ ini kaɗ ŋ Fiis ci, po ca nikka mbeh iɗsiɗkoha kaahay. 3 A toksiɗeeɗa ɓa Fiis ci, a teeɓeeɗa ɓa ne Mucɗohi Gapohse joyee joy kaan, a hulit. A woosa ne : « Yeesu yi mi na woyee ɗu yeem, a yi Mucɗohi Gapohse. »

4 Woo ceem aassa ɓi Yawuut, ɓa hunnda na Pool na Silaas. Ɓo' laayiɗ ŋ Gerek ci nup Kooh, na ɓitiɓ laayiɗ ɓaah ŋ raakiɗ tiik ca nammba hun na ɓa.

5 Waaye Yawuut ca ɓinooɓa, siis ammba ɓa, ɓa parahha ɓi ɓo' mbalay mbalay ŋ mbeeddaaca, ɓa nangɗohha ɓa po ɓa ɗuuɗiɗta kur-taaha. Ɓa kaɗta kahan Yasoon waaka Pool na Silaas ne ɓa ɓay ɓa ŋ fiki ɓooɓa. 6 Waaye ɓa raakɗi ɓa nga, ɓa ɓayya Yasoon na ɓi ɓo' wiiriis ŋ ɓaah caŋ ɓoo kosiɗ ca, ɓa faseeɗa ɓa po ŋ fiki kilifaacaŋ kur ka. Ɓa woyeeɗa ŋ ɗafka ne : « Ƴaaɓii yoondɗiɗ adinaani jen te ɓa reyiɗ naa ndii kotii ! 7 Yasoon dalɗiɗ ɓa ŋ kahan ce. Ɓa jen ɓa na haɓɗe ini ɗaloh na nakoh ciŋ buuri yakkiŋ Rom, ɓa woo ne buur wiiriis raakiɗ, teeku Yeesu ! »

8 Woo ceem jaahiɗta mboolnda na kilifaaca. 9 Kilifaaca sannga faɗis Yasoon na ɓinooɓa, po ɓeem tayle kopor, ɓa hannda faɗsu.

10 Ɓaah caŋ ɓoo kosiɗ ca jaarra ɓay Pool na Silaas ŋ ɗooƴ weka, ɓa cootiɗta ɓa Beree. Wa ɓa ree, ɓa kaɗta sinaagogaŋ Yawuut ca. 11 Yawuut ca genee nga ɓeɗ uupee rangsuk ɓaŋ Tessalonik, ɓa teyɗukeen woo kiŋ Kooh te ɓa sawarra nga lool. Kooh-nu-wiis ɗah, ɓa jangee Fiis ci ne ɓa marak andi ini ɓa na jangɗasse wa keeh wala. 12 Laayiɗ nga ɓa kossa. Ɓitiɓ raakiɗ tiik na ɓi ƴaar laayiɗ ŋ Gerek ca nammba kos.

13 Waaye wa Yawuut ca genee Tessalonik kerah ne Pool yaa nam yegɗoh woo kiŋ Kooh ŋ Beree, ɓa nammba kaɗ ndaam, ɓa yopeeɗa mboolnda, ɓa ɓekeeɗa ɓa ŋ ɗuuɗ. 14 Ŋ ineem ɓaah caŋ ɓoo kosiɗ ca arra cootiɗ Pool po ŋ cookma, waaye Silaas na Timoote tassa ŋ Beree.

15 Ɓi ɓendee Pool ɓayya ɗe po Ateen. Ƴutta ɓa dokukka Beree na nakohiŋ Pool ne Silaas na Timoote raakaat ɗe ndaam findi wa uup gaawoh ɗah.

16 Wa Pool nik ŋ Ateen, a sekeeɗa Silaas na Timoote, a hotta findi kur ka riifoh na nataal ciŋ kooh ci nikaaɗiici, a raakka aay-keeñ miskiɗ. 17 A jombeeɗa na Yawuut ca na ɓa nikeeɗi Yawuut te ɓa ñaamkeeɗa Kooh ŋ sinaagoga. Kooh-nu-wiis a meeɗ meeɗ woo na ɓooɓa a raakee ŋ ɗiska na toonohse jen.

18 Ŋ ineem, wa raakeen ɓi ɓo', ɓa ɓaahee ŋ liiɓoh ci na woyse Epikireen na ɓi na woyse Istowiseen*17:18 Epikireen na Istowiseen: Epikireen ci na Istowiseen ci, ɓa nikee liiɓoh. Ɓa meeɗ jang in ciŋ kipes ki, findi ca nikoh na findi ca na tiindohe. Waaye, ŋ harmban ɓa, ɓa ɗaloheen hot-hot. Epikireen ci, liiɓohaaɗiŋ ɓa kaɗeeɗi ŋ kooh ci, ini uupee ɓa nikiɗ, weɗ neɓiɗ ci nik ŋ kipes ki na findi fu min tum po fu raakuu miskiɗ. Istowiseen ci nak, ɓa teyɗukeen ne kooh ciŋ Gerek ci raakiɗ, waaye, ɓa raakiɗ hotohaaɗ wiiriis nga ca. Ɓa huneeɗi na Epikireen ci ŋ ini ɓa ambee ne e neɓiɗ ci uup raak etoh ŋ kipes., ɓa taastiɗoheeɗa na ɗe. Ɓum woyeeɗa ne : « Jombohii waaɗ woo ye ? » Ɓinooɓa, wa ɓa kerah Pool woyeeɗa Yegɗohiŋ Muci, wi kaɗ ŋ Yeesu na hultiŋ kaaniɗ ci, ɓa woyeeɗa ne : « Wa mand haa ne a na yegɗohe kooh ci ɓoo inahɗi. »

19-20 Weɗ ɓa hunoh na Pool, ɓa ɓayya ɗe cohohaanaŋ ɓa na woyse Aryopaas, ɓa woosa ɗe ne : « Fu yii ɓek ɓoo nof na in ci ɓoo inahɗi te ɓoo waaɗiɗ inah ini ca tokis. Kon teeɓa ɓoo in ci fu na jangɗohe. » 21 (Ɓi Ateen jen na hanheeca genee na ɓa nikohee naandsuk na sikɗuk in as.)

22 Wa Pool tufuk ŋ fiki ɓooɓa cohee ŋ Aryopaasa, a woosa ne : « Ɗu ɓi gen Ateen, ŋ hotiɗ ne nik kos ɗah, ɗu ndengɗukootiɗ nga. 23 Laam wi maa tiindsuke, ŋ markeeɗa in ci ɗu na ñaamkohe, raakiɗ seeƴkohaani ŋ hot nga sah, wa fiisu inii : “ Wuu koohi inhassaaɗiini. ” Ini ɗu na ñaamke te ɗu inahɗaa, ineem weɗ ŋ hay ne ŋ inhiɗ ɗu wa.

24 Kooh yi fer adinaani na in ci nik ŋ ɗooƴi jen, te a yi Heɗ Eel ci na kehƴi, a genɗi ŋ ɗisik ci na kiimohse ci yaah ɓo' haɓiɗ. 25 A namɗi etoh ne yaah ɓo' taambkohee ɗe po haa a etoh etoh in, a yi kay na one ɓo' ci jen kipes na iik na in ci jen. 26 A taamboh ŋ ɓo' yino, a ferra cuuɓ nu nik, ne ca gen kehƴi jen ; waa nu nga na jamanooniŋ wa na kikiƴ ciŋ wa.

27 Kooh tumiɗ ineem ne ɓooɓi min ɗe waak, ɓa saaɓɗee po ɓa hend nga ɗe. Moona a usɗi ali ɓo' nga ɓoo. 28 Laam a yi tah ɓoo pese, kaɗee haye, nikka ; findi yino ngaŋ jangtukoh ciŋ ɗu woyoha an : “ Ɓoo nam nik set ciŋ ɗe. ” 29 Kon nik ne ɓoo set ciŋ Kooh ɗah, mbaa ɓoo joyɗi amb ne Kooh mand na in pesuuɗ moɗiɗ, findi nataal urus, haalis wala atoh ci ɓo' haɓiɗ ŋ liiɓoha ɓo'.

30 Kooh marakɗi ŋ in ca haɓɗassee ɗeɓgaan jen, wa ɓooɓa inahɗi, kotii a yii ɓeeɗuk ɓooɓi jen, ŋ ɗisik nu ɓa min nik ɗah, ne ɓa ɓoƴsoh pesohaaɗ. 31 A gapiɗ mbehi a atte'ohan adinaani jen atte yurhiɗ, te a kooɗiɗ ɓo' wuu ineem. Ŋ hultiɗi a hultiɗ ɓoyeem, a teeɓiɗ ɓooɓi jen wooriɗ ne a yi atte'ohi a kooɗ. »

32 Wa ɓa kerah Pool woyeeɗa ŋ hultiŋ kaaniɗ ci, ɓum njembteeɗa ɗe, ɓinooɓi woosa ɗe ne : « Ɓoo hey ɗa sikɗukisse ŋ ineem mbeh wiiriis. » 33 Ŋ ineem Pool pulla, cootta. 34 Raakka ɓooɓi kos, ɓa taambiɗta ɗe ; Denis ya ɓaahee ŋ ɓooɓaŋ Aryopaasa ɓaah nga, na ɓitiɓ teeku Damaris, na ɓi ɓo' wiiriis.

<- Tum ciŋ Apootar ci 16Tum ciŋ Apootar ci 18 ->