1 Wa Pool taamb ŋ Siri na Silisi, a kaɗta Derbe, ƴutta a kaɗta Listar. Raakeen ŋ ndaam taalube teeku Timoote, yaay ɓa nikee Yawuut kosiɗ, waaye baab ɓa nikee Gerek. 2 Ɓaah caŋ ɓoo kosiɗ ca nikee ŋ Listar na Ikoñum seede'een baah kiŋ Timoote. 3 Pool waaɗta ne a hun na ɗe ; ŋ ineem a ɓayya ɗe, a nguɗta ɗe sagu Yawuut ca genee ŋ ɓak caam. Laam ɓa inheen jen ne baab ɓa Gerek.

4 Pool na Silaas hunnda na Timoote, ɓa taambeeɗa kur na kur, ɓa woyeeɗa kosiɗ ca ini Apootar ci na yakak caŋ Janguunaŋ Yerusalem woo ŋ cohaŋ ɓa, ɓa nakka ɓa ne, ɓa taambɗaat ineem. 5 Ŋ ineem, kosiɗ ca uupeeɗa ndeng ŋ kosiŋ ɓa, ɓa ɓaateeɗa laay Kooh-nu-wiis.

6 Fuuɗsi Hoolohngaani hondohha Pool na Silaas yegɗoh Yegɗohiŋ Muci ŋ kur caŋ Asi. Weɗ ɓa taamboh ŋ ɓakiŋ Firisi wi ɓaah ŋ Galaat. 7 Wa ɓa ree ŋ sero kur caŋ Misi, ɓa jeemmba kaɗ caŋ Bitini waaye Fuuɗsiŋ Yeesu onɗi ɓa ne ɓa kaɗ ndaam. 8 Weɗ ɓa taamboh ŋ Misi, ɓa kaɗta Torowaas, ŋ sero cookma. 9 Na weka, in hayɗohha Pool findi heeƴ : An a hot ɓo' gen Maseduwaan tufkiɗ kiimeeɗa ɗe keeh-keeh ne : « Aasa bato, fu hay Maseduwaan, fu ɓaatɗoh ɓoo ! »

10 Wa Pool heeƴ heeƴeem, wa hooleen ɓoo ne e Kooh na ɓeeɗke ɓoo ne ɓoo kaɗ woya Yegɗohiŋ Muci ŋ ndaam. Jaarra ɓoo markeeɗa findi ɓoo kaɗohan Maseduwaan.

11 Weɗ ɓoo kooɗoh bato ŋ Torowaas, ɓoo yurhiɗta kur ka na woyse Samotaraas, a masuɓ wila. Ŋ Kooh-wiisiina, ɓoo kurkohha ndaam, ɓoo kaɗta Neyapoli. 12 Ɓoo pulohha ndeem, ɓoo kaɗta Filippi. Filippi, wa ɓaahee ŋ kur-taah ca ɓi kur kaŋ Rom raakootee, te ngaŋ Maseduwaan jen, weɗ uupɗee njiriñ ŋ kur-taah caam. Ɓoo nikka ŋ kur keem ɓi neeh.

13 Wa mbehi na iɗsiɗkohse ree, ɓoo pulla ŋ bilaf faŋ kur-taaha, ŋ sero huluɓ, ɗiska ɓoo liiɓee ne wa ɗisik kiimoha Kooh. Ɓi ɓitiɓ coheen ndaam, ɓoo ɓooffa, ɓoo ɓeesɗoheeɗa na ɓa.

14 Wa raakeen ɓitiɓ nga ɓa teeku Liidi, a nikee toonoh cuup ruumind, a genee kur-taahaŋ Tiyatiir, a nikee ɓo' nupiɗ Kooh. A sikɗukeeɗa ɓoo baahiɗ. Heɗ ɓoo rangissa keeñiŋ Liidi yeem po a teyɗukka ini Pool woye. 15 A ɓoktuusa a yi na ɓi kahan ce, ƴutta a kiimmba ɓoo ne : « Nik ne ɗu hotiɗ ne ŋ kosiɗ Heɗ ɓoo ɗah, hayaat ɗu dal ŋ kahan ndo. » A tummba po ɓoo teyɗukka.

16 Wa raakka mbeh, ɓoo kaɗeeɗa ɗiska na kiimohse Kooh, ɓoo cohha na cafaƴ, a nikee ñaam. Ñaameem hunee na jiini, jiinndi ɓekee ɗe ŋ markis. Markisiŋ ɗe meeɗ meeɗ kom ɓooɓi raakee ɗe kopor laayiɗ. 17 A ñaakɗeeɗa Pool, raak ɓoo hun na Pool, a woyeeɗa ŋ ɗafka ne : « Ɓooɓii, ɓa surgaaciŋ Koohi uup yak, ɓa hay ne ɓa teeɓ ɗu waasiŋ muci. » 18 A gennda gen a woyeeɗa ineem ɓi neeh laayiɗ, waaye wi wa kaɗ po wa yaaɓiɗta Pool, Pool gurdukka jiinnda nikee ŋ kuɓka cafƴa, a woosa ɗe ne : « Ñam woo ɗa wa, ŋ tiikiŋ Yeesu Kiristaa, pula ŋ ɓoyii ! » Ŋ ɗiska ɗiska jiinnda pulla ŋ kuɓka cafƴa.

19 Wa ɓi heɗ ñaama hot ne ɓa malkisɗi ina ɓa meeɗ maluk nga ɗe, ɓa ammba Pool na Silaas, ɓa faseeɗa ɓa po ŋ ɗiska na toonohse, ŋ fiki kilifaaca. 20 Ɓa kommba ɓa kilifaaca adgohee kur ka, ɓa woosa ɓa ne : « Ƴaaɓii ɓa na yoonde kur kiŋ ɓoo te ɓa Yawuut. 21 Ɓa na jangɗohe mbaah ci fu inah ne waas onɗi ɓoo ne ɓoo teyɗuk ca wala taambiɗ ca, ɓoo ɓi ɓaah ŋ Rom. »

22 Mboolnda nammba hun nga, ɓa keennda Pool na Silaas. Weɗ kilifaaca nakohoh ne ɓa wolsassaat, ɓa laɓu ndooɗ. 23 Wa ɓa laɓ ɓa laɓ miskiɗ po ƴutta, ɓa rannga ɓa ŋ kasoona. Kilifaaca woosa ƴaara niiɗee kasoona ne a niiɗaat ɓa baahiɗ. 24 Denga ƴaara niiɗee kasoona dengse, tahha po, a ɓayya ɓa ŋ ɗooƴ ɗooƴ kasoona, a jatannga kot ciŋ ɓa jatang miskiɗ na hang.

25 Ŋ ndengelnde weka, Pool na Silaas kiimeeɗa Kooh, ɓa ƴeekeeɗa yakkiŋ Kooh, ambuuɗ ca ɓinooɓa sikɗukeeɗa ɓa. 26 Ɗekka po kehƴi yoondɗukka keeh-keeh po fondamaanaŋ kasoona yoondɗukka, jaarra buntaaca jen rangsukka, jatang caŋ ɓooɓa ambsee jen toksukka. 27 Weɗ ƴaara niiɗee kasoona yunkoh, a hotta buntaaca rangsukiɗ, a fuurra ndangaŋ ɗe ne a ap haf ce. A liiɓee ne ambuuɗ ca fusiɗ[a].

28 Waaye Pool woosa ŋ ɗafka ne : « Kina tum haf fu miskiɗ, ɓoo jen ɓoo ɓii nga. » 29 Ƴaara meeksohha niitoha, a arra aas, a tiitta po a saakɗoheeɗa, a ƴekka ŋ fiki Pool na Silaas. 30 Ƴutta a puliɗta ɓa ŋ hara, a meekissa ɓa ne : « Kilifaaci, ŋ joy tum na po ŋ min muc ? » 31 Ɓa loffa ɗe ne : « Kosa Yeesu Heɗi, fu hey muce, fu na ɓi kahan fu. »

32 Ŋ ineem, ɓa woosa ɗe woo kiŋ Heɗi, a yi na ɓi gen kahan ce jen. 33 Ŋ wahtuuneem ŋ ɗooƴ weka, ƴaara niiɗee kasoona ɓayya Pool na Silaas, a ɓookiɗta ɓa gaañ caŋ ɓa ; a ɓoktuusa ŋ ɗiska ɗiska, a yi na ɓi kahan ce jen. 34 Ƴutta, a ɓayya ɓa ŋ kahan ce, a degiɗta ɓa kañam, a summba lool ŋ ini a kos Kooh, a yi na ɓi kahan ce jen.

35 Wa Kooh wiis, kilifaaca kanak ca adgohee kur ka tuuƴca ɓi alkaate ne ɓa woya ƴaara niiɗee kasoona ne a faɗis ƴaaɓaam. 36 Yeem woosa Pool ne : « Kilifaaci woosohiɗ nga so ne ɗu faɗsu ; kon pulaat ɗu kaɗ na jam. »

37 Waaye Pool woosa alkaateeca ne : « Ɓa atteeɗi ɓoo, ɓa laɓɗukka ɓoo ŋ fiki ɓooɓi, ƴutta ɓa taƴca ɓoo ŋ kasooni, te moona ɓoo ɓaah ŋ Rom. Kotii ɓa waaɗ ɓoo faɗis te wa yegsuu e ? Muk ! Ɓa hayaat ɓeɗ ŋ haf ɓa, ɓa puliɗ ɓoo ! »

38 Alkaateeca woosa kilifaaca kanak ca ineem, ɓeem tiitta lool wa ɓa kerah ne Pool na Silaas ɓaah ŋ Rom. 39 Ɓa hayya ɓa ɗaasnuke, ɓa puliɗta ɓa ŋ kasoona, ɓa kiimmba ɓa ne ɓa pul kur-taaha.

40 Wa ɓa pul kasoona, Pool na Silaas kaɗta kahan Liidi. Ɓa hotohha na ɓaah caŋ ɓoo kosiɗ ca, ɓa ñaahha ɓa ŋ kosa ɓa kos. Ƴutta ɓa cootta.

<- Tum ciŋ Apootar ci 15Tum ciŋ Apootar ci 17 ->