1-2 Wa kaɗ kaɗ po ŋ mirndaani, ɓoo minisɗi sek. Weɗ ɓoo woyoh ne ɓoo hey faɗe Timoote a kaɗ, ɓoo tas ŋ Ateen kiik ɓoo. Ɓoo woossa ɗe nga ɗu. Timoote a ɓaah ɓoo keeh-keeh ; a na pangke na Kooh ŋ Yegɗohiŋ Muci, ŋ ini kaɗ ŋ Kiristaani. Ɓoo nakiɗ ɗe ne a ndengiɗ ɗu, a ñaah ɗu ŋ ini kaɗ ŋ kosiŋ ɗu, 3 po ali ɓo' nga ɗu naarkuu, sagu miskiɗ ci ɗu na degse woti-woti. Ɗu ŋ haf ɗu, ɗu inhiɗ ne in ceem ɓaah ŋ in ci rahsan ɓoo ŋ kosi ɓoo kos. 4 Laam wa ɓoo nik na ɗu sah, ɓoo woyeen ɗu ne ɓoo hey raake miskiɗ ; te wa raakoh ɗaa, findi ɗu inhoha. 5 Wa wa kaɗ po ŋ minisɗi sek, ŋ woossa Timoote ne a markiɗ to ini kaɗ ŋ kosiŋ ɗu, laam ŋ neƴƴoheen ne Seytaani fiir ɗu po pangkiŋ ɓoo kee nika ɓarang ɓarang.

6 Waaye ɗiski wa nik, Timoote kaɗiɗ po a hayiɗ, te a eɗiɗ ɓoo yegɗoh neɓiɗ ŋ ini kaɗ ŋ kosiŋ ɗu, na waaɗohi ɗu waaɗoh ŋ harmban ɗu, na sumi ɗu na sume ɗu naandsukka ɓoo ɗah, na waaɗi ɗu waaɗ ɓoo hotis findi ɓoo namoh ɗu waaɗ hotis. 7 Ŋ ineem, ŋ ɗooƴ tiis ci na miskiɗ ci ɓoo nikoh jen, hel ciŋ ɓoo daliɗ nga ɗu, ɓaah ci, sagu kosiŋ ɗu. 8 Kon ɗiski wa nik, ɗu ris ndengiɗ ŋ niki ɗu nik ŋ Heɗi, weɗ tah ɓoo ɓii iik kotii.

9 Ɓoo joyiɗ corkiɗ Kooh laayoh na laayoh ŋ ini kaɗ nga ɗu, ŋ sumi ɓoo sum lool saguuɗu ŋ fikiice. 10 Noh na wek ɓoo ɓii kiim ɗe keeh-keeh ne a on ɓoo, ɓoo hotis ɗu te ɓoo mitiɗ ini tas ŋ kosiŋ ɗu. 11 Kooh, Baabiŋ ɓoo ŋ haf ce, na Heɗ ɓoo Yeesu rangsiɗaat ɓoo waasi kaɗ nga ɗu ! 12 Heɗi genaat ɓaat keeh-keeh waaɗohi nik ŋ harmban ɗu, na waaɗi ɗu waaɗ ɓooɓi jen, wa nikaat findi ɓoo waaɗoh ɗu. 13 A on keeñ ciŋ ɗu hatil ne ɗu nik hooliɗ wuu ce, raakaaɗi sikka ŋ fiki Kooh Baabiŋ ɓoo, ŋ mbehi Heɗ ɓoo Yeesu hayan, na hooliɗ ciŋ ɗe jen. [Amiin !]

<- 1 Tessalonik 21 Tessalonik 4 ->